.jpg)
គ្រូពេទ្យកំពុងយកសំណាករកវីរុសកូវីដ ១៩ ពីប្រជាពលរដ្ឋនៅក្នុងសង្កាត់កាកាប ខណ្ឌពោធិ៍សែនជ័យ រាជធានីភ្នំពេញ។ ហេង ជីវ័ន
ភ្នំពេញៈ មន្ត្រីជាន់ខ្ពស់នៃក្រសួងសុខាភិបាលប្រកាសថា មកដល់ពេលនេះ ស្ថានភាពនៃជំងឺកូវីដ ១៩ បានឈានដល់បន្ទាត់ក្រហមក្នុងការឆ្លងរាលដាលនៃវីរុសនេះទៅក្នុងសហគមន៍ ដែលបញ្ហានេះជាការបារម្ភ និងមិនត្រូវឱ្យស្ថានភាពនេះឈានលើសពីបន្ទាត់ក្រហមនោះទេ។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ ១៩ ក្នុងក្របខ័ណ្ឌទូទាំងប្រទេសលើកឡើង កាលពីថ្ងៃទី ២៩ ខែ មិថុនាថា៖ «យើងមិនចង់ឱ្យស្ថានភាពនៃការវាយលុករបស់ជំងឺកូវីដ ១៩ នេះលើសពីបន្ទាត់ក្រហមទេ ដោយសារនៅពេលដែលលើសពីបន្ទាត់ក្រហមហើយ គឺពិតជាមានការពិបាកណាស់ ដែលវាឈានទៅដល់ការរាតត្បាតទ្រង់ទ្រាយធំនៅក្នុងសហគមន៍របស់យើង»។
លោកស្រីបញ្ជាក់ថា នៅពេលស្ថានភាពនៃការរាតត្បាតចូលក្នុងសហគមន៍ទ្រង់ទ្រាយធំហើយ មូលដ្ឋានសុខាភិបាលសាធារណៈ និងមន្ទីរពេទ្យនឹងហួសពីសមត្ថភាពហើយ ដោយសារអ្នកជំងឺច្រើន មិនមានកន្លែងសម្រាប់សម្រាកទេ។ ការឆ្លងរាលដាលក្នុងទ្រង់ទ្រាយធំនឹងធ្វើឱ្យមានការបាត់បង់ជីវិតច្រើន ហើយប្រជាពលរដ្ឋក៏ពិបាកក្នុងការប្រកបរបររកទទួលទានជាដើម។
មន្ត្រីនាំពាក្យរូបនេះសង្កត់ធ្ងន់ថា៖ «នៅពេលមានការវាយលុកខ្លាំង ចាំបាច់ណាស់ គឺត្រូវតែបិទខ្ទប់បន្តទៀត ឬបិទកន្លែងណាមួយដើម្បីកុំឱ្យមានការឆ្លងរាលដាលនៃវីរុសនេះទៅកាន់តែច្រើនទៀត ដែលធ្វើឱ្យមានការប៉ះពាល់ធំណាស់ ទាំងសេដ្ឋកិច្ចគ្រួសារ សេដ្ឋកិច្ចជាតិ»។
លោកស្រី ឱ វណ្ណឌីន ថ្លែងនាពេលកន្លងមក។ហេង ជីវ័ន
ផលវិបាក ១ ទៀតគឺ ការប៉ះពាល់ដល់សុខភាព និងអាយុជីវិតរបស់ប្រជាពលរដ្ឋដែលធ្វើឱ្យការបាត់បង់ជីវិតមានការកើនឡើង ប្រសិនបើគ្រប់គ្នាមិនខិតខំចូលរួមក្នុងការកាត់ផ្តាច់ការចម្លងនេះទេ។ ពិសេស គឺបុគ្គលម្នាក់ៗតែម្តងដែលស្ថិតក្នុងការវាយលុកនៃវីរុសកូវីដ ១៩។
ទន្ទឹមនឹងនេះ រដ្ឋមន្ត្រីក្រសួងសុខាភិបាល លោក ម៉ម ប៊ុនហេង ក្នុងពេលចុះពិនិត្យមើលការដ្ឋានសាងសង់មន្ទីរពេទ្យមិត្តភាពកម្ពុជា-ចិនព្រះកុសមៈ នាព្រឹកថ្ងៃទី ២៩ ខែមិថុនា ក៏បានលើកឡើងផងដែរពីការបារម្ភទាក់ទងនឹងការមានវត្តមានរបស់វីរុសបំប្លែងខ្លួនថ្មីនៃមេរោគកូវីដ ១៩។
លោក ម៉ម ប៊ុនហេង មានប្រសាសន៍ថា៖ «ដើម្បីទប់ស្កាត់ការឆ្លងរាលដាលកាន់តែខ្លាំង ក្រសួងសុខាភិបាលបានពង្រឹងការធ្វើតេស្តរកកូវីដ ១៩ និងដាក់ដោយឡែក។ ជាពិសេសបងប្អូនខ្មែរ ដែលមកពីប្រទេសថៃ និងប្រទេសវៀតណាម ត្រូវធ្វើចត្តាឡីស័កដាក់ខ្លួនដោយឡែក ដើម្បីកុំឱ្យច្របូកច្របល់គ្នានឹងអ្នកដែលមានការឆ្លងកូវីដ ១៩ ក្នុងព្រឹត្តិការណ៍សហគមន៍ ២០ កុម្ភៈ»។
លោកបន្តថា សម្រាប់អ្នកជំងឺដែលឆ្លងនូវមេរោគបំប្លែងថ្មីប្រភេទ Delta នេះ ក្រសួងក៏បានរៀបចំឱ្យមានការដាក់សម្រាកព្យាបាលដាច់ដោយឡែកពីអ្នកជំងឺផ្សេងៗដែរ ហើយក្រសួងនឹងធ្វើការពង្រឹងនៅមន្ទីរពេទ្យគ្រប់ទីកន្លែង។
លោក ម៉ម ប៊ុនហេង ថ្លែងថា៖ «ការពង្រឹងមន្ទីរពេទ្យរបស់កម្ពុជាយើងនៅគ្រប់ទីកន្លែង ជាពិសេសមន្ទីរពេទ្យនៅតាមព្រំដែនតាមខេត្តទាំងអស់ គឺដើម្បីមានលទ្ធភាពគ្រាប់គ្រាន់ថែរក្សាសុខភាពប្រជាពលរដ្ឋ និងពង្រីកចាក់ថ្នាំបង្ការ។ ព្រោះការចាក់ថ្នាំបង្ការនេះ មានសារៈសំខាន់ណាស់ ដែលអាចកាត់បន្ថយការរីករាលដាល និងកាត់បន្ថយការឈឺធ្ងន់ធ្ងរនូវជំងឺនេះ»។
គួររំឭកផងដែរថា ប្រទេសកម្ពុជាមានអ្នកជំងឺកូវីដ ១៩ ប្រភេទថ្មី Delta សរុបចំនួន ២២ នាក់ហើយ ដែលរកឃើញលើពលករខ្មែរដែលធ្វើដំណើរមកពីប្រទេសថៃ តាមច្រកព្រំដែនកម្ពុជា-ថៃ។
មន្ទីរពេទ្យមិត្តភាពកម្ពុជា-ចិនព្រះកុសមៈគ្រោងដាក់ដំណើរការសាកល្បងនៅខែកញ្ញាខាងមុខនេះ និងប្រគល់ដល់ក្រសួងសុខាភិបាល ដើម្បីដាក់បម្រើសេវាពិនិត្យព្យាបាលជំងឺទូទៅ និងជំងឺឆ្លងផ្សេងៗ នៅមុនចូលឆ្នាំចិន ឆ្នាំ ២០២២ ផងដែរ នៅពេលដែលមន្ទីរពេទ្យនេះសាងសង់រួចរាល់៕
