.jpg)
មន្ត្រីក្រសួងពេលកំពុងពិនិត្យរថយន្តដឹកលើសទម្ងន់ពីថ្ងៃទី ១៤ កក្កដា ឆ្នាំនេះ។ រូបថត ក្រសួងសាធារណការ
ភ្នំពេញៈ លោក ស៊ុន ចាន់ថុល រដ្ឋមន្ដ្រីក្រសួងសាធារណការ និងដឹកជញ្ជូនស្នើឱ្យអាជ្ញាធរពាក់ព័ន្ធ ជួយសហការជាមួយក្រុមការងារក្រសួង ពិសេសក្រុមការងារជញ្ជីងចល័តក្នុងការទប់ស្កាត់ការដឹកជញ្ជូនលើសទម្ងន់កម្រិតកំណត់ដោយច្បាប់ បណ្ដាលឱ្យខូចខាតផ្លូវថ្នល់ ខណៈពេល ៦ ខែឆ្នាំនេះមន្ត្រីបានផាកពិន័យរថយន្តដឹកលើសទម្ងន់បានចំនួន ១ ៤៣០ គ្រឿង និងពិន័យជាប្រាក់បានជាង ២ ពាន់លានរៀល។
ការលើកឡើងរបស់លោក ស៊ុន ចាន់ថុល ដូចនេះធ្វើឡើងក្នុងពេលលោកដឹកនាំកិច្ចប្រជុំថ្នាក់ដឹកនាំក្រសួងសាធារណការ និងដឹកជញ្ជូនតាមប្រព័ន្ធវីដេអូពីចម្ងាយកាលពីថ្ងៃទី ១៤ ខែកក្កដា ដើម្បីពិនិត្យមើលវឌ្ឍនភាពការងារ បញ្ហាប្រឈមដំណោះស្រាយ និងសំណូមពររបស់អង្គភាពក្រោមឱវាទរបស់ក្រសួង។
លោកបានថ្លែងថា៖ «ចំពោះការងារដឹកជញ្ជូនលើសទម្ងន់កម្រិតកំណត់ សំណូមពរទៅអាជ្ញាធរពាក់ព័ន្ធឱ្យជួយសហការជាមួយក្រុមការងារជញ្ជីងរបស់ក្រសួង ជាពិសេសក្រុមការងារជញ្ជីងចល័តក្នុងការចូលរួមទប់ស្កាត់ការដឹកជញ្ជូនលើសទម្ងន់កម្រិតកំណត់ដោយច្បាប់»។
លោកបន្តថា៖ «សំណូមពរឱ្យមន្ទីរសាធារណការ និងដឹកជញ្ជូនរាជធានី-ខេត្ត ជួយថែរក្សារថយន្តដែលត្រូវបានចាប់ឃាត់ទុករយៈពេល ១ ឆ្នាំឱ្យបានត្រឹមត្រូវ មិនត្រូវដោះលែងទៅវិញជាដាច់ខាត»។
លោករដ្ឋមន្ត្រីបានថ្លែងថា រដ្ឋាភិបាលនឹងអនុវត្តវិធានការនេះឱ្យដូចភ្លៀងរលឹម មិនថយក្រោយទេ និងបានស្នើឱ្យនាយកដ្ឋានព័ត៌មានវិទ្យា និងទំនាក់ទំនងសាធារណៈសហការជាមួយអ្នកសារព័ត៌មាន ដើម្បីផ្សព្វផ្សាយមាត្រា ៦០ ដែលចែងថា រថយន្តដឹកលើស ២០ ភាគរយត្រូវឃាត់ទុក ១ ឆ្នាំ ដើម្បីឱ្យក្រុមហ៊ុនដឹកជញ្ជូនបានយល់ច្បាស់អំពីមាត្រាច្បាប់ និងការដាក់ទោសទណ្ឌឱ្យបានទូលំទូលាយ ដើម្បីចូលរួមថែរក្សាផ្លូវថ្នល់ឱ្យបានរឹងមាំចៀសវាងមតិរិះគន់ថា «ធ្វើផ្លូវជាប់រហូត»។
លោកបានរំឭកនូវរូបមន្តការផាកពិន័យដឹកជញ្ជូនលើសទម្ងន់កម្រិតកំណត់ថា៖ «បើបើកឡាន ១ គ្រឿងដឹកលើស ១០ តោន យក ១០x១០ ស្មើ ១០០ យក ១០០x១០ ស្មើ ១ ០០០ យក ១ ០០០x១០ ស្មើ ១០ ០០០។ ដូច្នេះឡាន ១ គ្រឿងដឹកលើសទម្ងន់ ១០ តោនស្មើនឹងឡាន ១ ម៉ឺនគ្រឿង រត់លើផ្លូវនោះធ្វើឱ្យផ្លូវសឹករេចរឹលមុនអាយុកាល»។
លោកបានបន្តថា៖ «ប៉ុន្តែបើឡានខ្លះ ដឹកលើសទម្ងន់ ៣០ តោនយក ៣០x៣០ ស្មើនឹង ៩០០ យក ៩០០x៣០ ស្មើនឹង ២៧ ០០០ យក ២៧ ០០០x៣០ ស្មើនឹង ៨១ ០០០ គ្រឿង។ ដូច្នេះឡាន ១ គ្រឿងដឹកលើស ៣០ តោន ស្មើនឹងឡានជិត ១ លានគ្រឿងរត់នៅលើផ្លូវយើង»។
ជាមួយគ្នានេះ លោក ស៊ុន ចាន់ថុល បានណែនាំឱ្យលេខាធិការដ្ឋានដឹកនាំត្រួតពិនិត្យរថយន្តដឹកជញ្ជូនលើសទម្ងន់កម្រិតកំណត់ សហការជាមួយនាយកដ្ឋានព័ត៌មានវិទ្យា និងទំនាក់ទំនងសាធារណៈ ប្រើប្រាស់ប្រព័ន្ធបច្ចេកវិទ្យាថ្មី ដើម្បីទប់ស្កាត់ការដឹកជញ្ជូនលើសទម្ងន់កម្រិតកំណត់។
លោក ហ៊ាង សុទ្ធាយុត្តិ អ្នកនាំពាក្យក្រសួងសាធារណការ និងដឹកជញ្ជូនបានឱ្យដឹងកាលពីម្សិលមិញថា រយៈពេល ៦ ខែ និង ១២ ថ្ងៃ ឆ្នាំ ២០២១ មន្ដ្រីក្រសួងសាធារណការបានចាប់ផាកពិន័យរថយន្តដឹកលើសទម្ងន់កម្រិតកំណត់បានចំនួន ១ ៤៣០ គ្រឿង។ ក្នុងនោះបានឃាត់ទុករថយន្តរយៈពេល ១ ឆ្នាំ បានចំនួន ១៦២ គ្រឿង និងពិន័យជាប្រាក់បានជាង ២ ពាន់លានរៀល (២ ២៤២-៩០១ ០០០ រៀល)។
លោកបានឱ្យដឹងថា មន្ដ្រីជំនាញបានឃាត់រថយន្តដឹកលើសទម្ងន់កំណត់ ភាគច្រើននៅខេត្តកណ្តាល កំពង់ស្ពឺ បាត់ដំបង កំពង់ឆ្នាំង កំពង់ធំ និងខេត្តកំពង់ចាម។
លោកបានបញ្ជាក់ថា៖ «ក្រសួងនឹងដាក់ដំណើរការប្រព័ន្ធគ្រប់គ្រងការដឹកជញ្ជូនលើសទម្ងន់កម្រិតកំណត់ដោយប្រើប្រាស់បច្ចេកវិទ្យាកាមេរ៉ាឆ្លាតវៃ និងជញ្ជីងស្វ័យប្រវត្តិ (AI Camera and Weight in Motion Sensor) ដើម្បីតាមដាន និងទប់ស្កាត់រថយន្ដដឹកជញ្ជូនលើសទម្ងន់»។
លោកបានបន្តថា ក្រសួងសូមរំឭកដល់ម្ចាស់ក្រុមហ៊ុនដឹកជញ្ជូន ម្ចាស់រថយន្តធុនធ្ងន់ និងអ្នកបើកបររថយន្តធុនធ្ងន់ជាថ្មីថា ក្រសួងនឹងបន្តអនុវត្តតាមច្បាប់ស្តីពីផ្លូវថ្នល់មាត្រា ៦០ និងសេចក្ដីជូនដំណឹងលេខ ០៤៩ ស្តីពីការពង្រឹងវិធានការយ៉ាងតឹងរ៉ឹងបន្ថែមចំពោះរថយន្តដឹកជញ្ជូនធុនធ្ងន់ដែលបើកបរលើបណ្តាញផ្លូវថ្នល់យ៉ាងតឹងរ៉ឹងបំផុតដោយគ្មានការលើកលែងឡើយ៕
វីដេអូ៖
