.jpg)
ស្រ្តីចាក់វ៉ាក់សាំងបង្ការវីរុសកូវីដ ១៩ ទី ៦ លាន ទទួលបានអំណោយពីលោកនាយករដ្ឋមន្ត្រី នៅថ្ងៃនេះ។ រូបថត FN
ភ្នំពេញៈលោកស្រី ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងបង្ការវីរុសកូវីដ ១៩ បាននាំយកថវិកា និងសម្ភារជាស្បៀងអាហារមួយចំនួនរបស់លោកនាយករដ្ឋមន្រ្តី ហ៊ុន សែន ជូនអ្នកចាក់វ៉ាក់សាំងទី ៦ លាន នៅក្នុងខេត្តកំពង់ចាម នាព្រឹកថ្ងៃទី ២០ ខែកក្កដានេះ។
លោកស្រីបានលើកឡើងថា ក្នុងរយៈពេលតែ៦ថ្ងៃទេចាក់បាន ១ លាននាក់ហើយ ប្រសិនបើល្បឿននៃការចាក់វ៉ាក់សាំងដូចសព្វថ្ងៃនេះ នោះអ្នកចាក់វ៉ាក់សំាងទី៧ លាន នឹងត្រូវបានរកឃើញទៀត។
លោកស្រីបានមានប្រសាសន៍ថា៖ «ទោះជាចាក់វ៉ាក់សាំងហើយក៏ដោយការការពារក៏ត្រូវតែបន្តអនុវត្តជាចាំបាច់ដែរ ពិសេសគឺការអនុវត្តវិធានការ៣ការពារ និង ៣ កុំ។ បើការពារមិនគ្រប់ជ្រុងជ្រោយទេនោះ គឺការចម្លងនៅតែមានដដែល»។
អ្នកចាក់វ៉ាក់សាំងការពារវីរុសកូវីដ ១៩ ទី ៦ លានបានទៅលើអ្នកស្រី ផេង សឿន អាយុ ៦៧ ឆ្នាំ ជាកសិកររស់នៅភូមិតាអុង ឃុំតាអុង ស្រុកចំការលើ ខេត្តកំពង់ចាម ដែលត្រូវបានរកឃើញកាលពីថ្ងៃទី ១៩ ខែកក្កដា ម្សិលមិញនេះ។
គិតត្រឹមយប់ថ្ងៃទី ១៩ ខែកក្កដា កម្ពុជាបានចាក់វ៉ាក់សាំងបង្ការវីរុសកូវីដ ១៩ ទៅដល់ប្រជាពលរដ្ឋទូទាំងប្រទេសសរុបបានចំនួនជាង ៦ លាននាក់ហើយ ស្មើនឹងជាង ៦០ ភាគរយនៃប្រជាពលរដ្ឋចំនួន ១០ លាននាក់ ដែលរាជរដ្ឋាភិបាលគ្រោងនឹងបញ្ចប់ការចាក់វ៉ាក់សាំងឱ្យបាន ១០ លាននាក់នៅក្នុងខែតុលា ឬដើមខែវិច្ឆិកា ឆ្នាំ ២០២១ នេះ៕
