.jpg)
ក្រុមគ្រូពេទ្យរៀបចំបូជាសពអ្នកស្លាប់ដោយសារជំងឺកូវីដនៅខេត្តព្រៃវែង កាលពីម្សិលមិញ។ រូបថត រដ្ឋបាលខេត្ត
ភ្នំពេញៈ មនុស្សចំនួន ២១ នាក់បន្ថែមទៀត បានបាត់បង់ជីវិតដោយសារជំងឺកូវីដ ១៩ និងរកឃើញអ្នកឆ្លងថ្មីជាង ៨០០ នាក់ ខណៈអ្នកជាសះស្បើយមានជាង ១ ០០០ នាក់ទៀត។ នេះបើយោងតាមសេចក្តីប្រកាសរបស់ក្រសួងសុខាភិបាលនៅថ្ងៃទី ២០ ខែកក្កដានេះ។
ក្រសួងបានបញ្ជាក់ថា អ្នករកឃើញឆ្លងវីរុសកូវីដ ១៩ បន្ថែមនេះ មានចំនួន ៨២៥ នាក់ទៀត និងជាសះស្បើយមាន ១ ០២២ នាក់។ ក្នុងនោះអ្នកឆ្លងថ្មីដែលរកឃើញនេះមានករណីឆ្លងក្នុងសហគមន៍ចំនួន ៤០៤ នាក់ និងអ្នកដំណើរពីបរទេសរហូតដល់ ៤២១ នាក់។
គិតត្រឹមព្រឹកថ្ងៃទី ២០ ខែ កក្កដា ឆ្នាំ ២០២១ នេះ កម្ពុជាមានអ្នកឆ្លងវីរុសកូវីដ ១៩ សរុបទូទាំងប្រទេសរហូតដល់ ៦៨ ៧៩៦ នាក់ អ្នកជាសះស្បើយសរុបចំនួន ៦១ ០៣៩ នាក់ និងអ្នកស្លាប់បានកើនឡើងរហូតដល់ ១ ១៤៩ នាក់ហើយ៕
