ភ្នំពេញៈ យន្តហោះ Airbus A320 របស់ក្រុមហ៊ុនអាកាសចរណ៍ខេមបូឌាអ៊ែរវ៉េ បានចេញដំណើរពីអាកាសយានដ្ឋានអន្តរជាតិភ្នំពេញ ទៅទីក្រុងហូជីមិញ នៅម៉ោង ៧: ៣០ នាទីព្រឹក ថ្ងៃទី ១៩ កក្កដា ដោយដឹកសម្ភារបរិក្ខារពេទ្យជិត ១០ តោន ដែលមានចំនួន ១ ១២៥ កេស ដែលរដ្ឋាភិបាលកម្ពុជាផ្តល់ជូនរដ្ឋាភិបាលវៀតណាម។
សម្ភារបរិក្ខារពេទ្យជិត ១០ តោន ស្មើនឹងចំនួន ១ ១២៥ កេស ដែលរាជរដ្ឋាភិបាលកម្ពុជាផ្តល់ជូនរដ្ឋាភិបាលវៀតណាមត្រូវបានក្រុមហ៊ុនអាកាសចរណ៍ខេមបូឌាអ៊ែរវ៉េដឹកជញ្ជូនសម្ភារទាំងនេះទៅដល់ប្រទេសវៀតណាមហើយ កាលពីព្រឹកថ្ងៃទី ១៩ ខែកក្កដា។
ក្រុមហ៊ុនអាកាសចរណ៍ខេមបូឌាអ៊ែរវ៉េ ឱ្យដឹងថា ក្រុមហ៊ុននេះបានប្រើប្រាស់យន្តហោះ Airbus A320 ចេញដំណើរពីអាកាសយានដ្ឋានអន្តរជាតិភ្នំពេញ ឆ្ពោះទៅទីក្រុងហូជីមិញ ដោយដឹកសម្ភារបរិក្ខារពេទ្យជិត ១០ តោន ស្មើនឹង ១ ១២៥ កេសដែលរដ្ឋាភិបាលកម្ពុជាបានប្រគល់ជូនរដ្ឋាភិបាលវៀតណាម។
ការផ្តល់សម្ភារបរិក្ខារពេទ្យដល់រដ្ឋាភិបាលវៀតណាម ព្រមទាំងការដឹកជញ្ជូនទៅដល់ ដោយក្រុមហ៊ុនអាកាសចរណ៍ខេមបូឌា អ៊ែរវ៉េ ដឹកនាំដោយលោកស្រី យក់ សម្បត្តិ រដ្ឋលេខាធិការក្រសួងសុខាភិបាល ដែលជាតំណាងឱ្យភាគីកម្ពុជា។
បើតាមសេចក្តីប្រកាសរបស់ក្រុមហ៊ុនអាកាសចរណ៍ខេមបូឌាអ៊ែរវ៉េ បន្ទាប់ពីហោះហើរបាន ៤០ នាទី យន្តហោះបានទៅដល់អាកាសយានដ្ឋានអន្តរជាតិតាន់សុនញ៉ាតក្នុងទីក្រុងហូជីមិញ ប្រទេសវៀតណាម។ នាឱកាសនោះដែរ តំណាងពាក់ព័ន្ធរបស់រដ្ឋាភិបាលវៀតណាមបានស្វាគមន៍យ៉ាងកក់ក្តៅដល់លោកស្រី យក់ សម្បត្តិ និងគណៈប្រតិភូកម្ពុជានៅអាកាសយានដ្ឋាន និងបានរៀបចំពិធីប្រគល់ និងទទួលសម្ភារបរិក្ខារពេទ្យនេះនៅថ្ងៃដដែលនោះដែរ។
ក្រុមហ៊ុនអាកាសចរណ៍នេះបញ្ជាក់ថា៖ «ជើងហោះហើរនេះបានវិលត្រឡប់មកអាកាសយានដ្ឋានអន្តរជាតិភ្នំពេញវិញ នៅម៉ោង ១០ និង ៤០ នាទីព្រឹកថ្ងៃដដែល។ នេះជានិមិត្តរូបបង្ហាញថាក្រុមហ៊ុនអាកាសចរណ៍ខេមបូឌាអ៊ែរវ៉េបានបញ្ចប់ភារកិច្ចដឹកជញ្ជូនសម្ភារបរិក្ខារពេទ្យបានដោយជោគជ័យ»។
សម្ភារបរិក្ខារពេទ្យ ដែលដឹកជញ្ជូនដោយក្រុមហ៊ុនអាកាសចរណ៍ខេមបូឌាអ៊ែរវ៉េ ទៅកាន់ប្រទេសវៀតណាមរួមមានម៉ាស់ធម្មតា ១ លានម៉ាស់។ ម៉ាស់ N95 ចំនួន ១០០ ០០០ ម៉ាស់ ព្រមទាំងម៉ាស៊ីនផលិតអុកស៊ីហ្ស៊ែនចំនួន ១០០ គ្រឿងផងដែរ។
ប្រមុខរាជរដ្ឋាភិបាលកម្ពុជា លោកនាយករដ្ឋមន្ត្រី ហ៊ុន សែន សង្កត់ធ្ងន់ថា ជំនួយដ៏ច្រើនសន្ធឹកនេះគឺជាការបង្ហាញស្មារតីនៃកិច្ចសហប្រតិបត្តិការ និងសាមគ្គីភាពក្នុងនាមប្រទេសជាមិត្តដើម្បីចូលរួមក្នុងការប្រយុទ្ធប្រឆាំងនឹងជំងឺកូវីដ ១៩។
ក្នុងនាមជាក្រុមហ៊ុនអាកាសចរណ៍ក្នុងស្រុករបស់កម្ពុជា ក្រុមហ៊ុនអាកាសចរណ៍ខេមបូឌាអ៊ែរវ៉េត្រូវបានរដ្ឋាភិបាលប្រគល់ភារកិច្ចឱ្យបំពេញភារកិច្ចសំខាន់របស់ប្រទេសនេះម្តងទៀត។
ក្រុមហ៊ុនអាកាសចរណ៍បន្ថែមថាជាមួយនឹងបទពិសោធដ៏សម្បូរបែបក្នុងប្រតិបត្តិការជើងហោះហើរ ពិសេសសម្រាប់មន្ត្រីជាន់ខ្ពស់រដ្ឋាភិបាល និងការដឹកទំនិញសម្រាប់សម្ភារបរិក្ខារពេទ្យ ក្រុមហ៊ុនអាកាសចរណ៍ខេមបូឌាអ៊ែរវ៉េធ្លាប់បានបញ្ចប់ការហោះហើរដឹកជញ្ជូនមន្ត្រីជាន់ខ្ពស់របស់រដ្ឋាភិបាល និងសម្ភារបរិក្ខារពេទ្យពីកម្ពុជាទៅកាន់ប្រទេសចិន កូរ៉េខាងត្បូង វៀតណាម ឡាវ ភូមា ថៃ ទីម័រខាងកើត ឥណ្ឌូណេស៊ី និងប្រទេសដទៃទៀតផងដែរ។
ក្រុមហ៊ុននេះបានបង្កើតទំនាក់ទំនងល្អជាមួយរដ្ឋាភិបាលកម្ពុជាក្នុងកិច្ចសហប្រតិបត្តិការរយៈពេលវែង ដែលបានចាក់គ្រឹះសម្រាប់ការអភិវឌ្ឍផ្លូវអាកាសរបស់ក្រុមហ៊ុនអាកាសចរណ៍ខេមបូឌាអ៊ែរវ៉េនាពេលអនាគត។
ក្រុមហ៊ុនអាកាសចរណ៍លើកឡើងថា៖ «ក្នុងនាមជាស្លាបរបស់ប្រទេសកម្ពុជា ក្រុមហ៊ុនអាកាសចរណ៍ខេមបូឌាអ៊ែរវ៉េនឹងបន្តបម្រើប្រជាជនកម្ពុជា រដ្ឋាភិបាល និងបន្តចូលរួមចំណែកដល់ការផ្លាស់ប្តូរសេដ្ឋកិច្ច និងវប្បធម៌រវាងប្រទេសកម្ពុជា និងសហគមន៍អន្តរជាតិក៏ដូចជាការការពារ និងគ្រប់គ្រងការរាតត្បាត»។
ជាមួយគ្នានេះ ដោយឃើញពីទឹកចិត្តសប្បុរសធម៌របស់ក្រុមហ៊ុនអាកាសចរណ៍ខេមបូឌាអ៊ែរវ៉េ លោកនាយករដ្ឋមន្ត្រី ហ៊ុន សែន បានសម្តែងនូវអំណរគុណ និងកោតសរសើរដោយស្មោះចំពោះក្រុមហ៊ុនអាកាសចរណ៍ខេមបូឌាអ៊ែរវ៉េ ដែលបានឧបត្ថម្ភការហោះហើរជាមនុស្សធម៌ ដើម្បីដឹកជញ្ជូនម៉ាស់ចំនួន ១ លាន ១ សែនម៉ាស់ និងម៉ាស៊ីនផលិតអុកស៊ីហ្ស៊ែនចំនួន ១០០ គ្រឿង សម្រាប់ប្រយុទ្ធប្រឆាំងជំងឺកូវីដ-១៩ ដែលជាអំណោយរបស់រាជរដ្ឋាភិបាលកម្ពុជា យកទៅជូនរដ្ឋាភិបាលនៃសាធារណរដ្ឋសង្គមនិយមវៀតណាមនៅថ្ងៃទី ១៩ ខែកក្កដា ឆ្នាំ ២០២១។
គួរបញ្ជាក់ផងដែរថា ក្រៅពីការផ្តល់នូវសម្ភារបរិក្ខារពេទ្យទាំងនេះ រាជរដ្ឋាភិបាលកម្ពុជាក៏បានផ្តល់នូវថវិកាចំនួន ២០ ម៉ឺនដុល្លារផងដែរ។ ជាមួយគ្នានេះ ប្រធានកាកបាទក្រហមកម្ពុជា លោកស្រី ប៊ុន រ៉ានី ហ៊ុន សែន ក៏បានផ្តល់ថវិកាចំនួន ១០ ម៉ឺនដុល្លារ។
លោកស្រី ម៉ែន សំអន ប្រធានសមាគមមិត្តភាពកម្ពុជា-វៀតណាម ក៏បានឧបត្ថម្ភថវិកាចំនួន ៥ ម៉ឺនដុល្លារជូនដល់សមាគមមិត្តភាពវៀតណាម-កម្ពុជាផងដែរ តាមរយៈស្ថានទូតវៀតណាមប្រចាំនៅកម្ពុជា ដើម្បីចូលរួមដល់យុទ្ធនាការ ទប់ស្កាត់ការរីករាលដាលជំងឺកូវីដ ១៩ នៅប្រទេសវៀតណាម។
នាពេលកន្លងមករាជរដ្ឋាភិបាលកម្ពុជា ធ្លាប់បានផ្តល់ជំនួយជាម៉ាស់ទៅកាន់ប្រទេសមួយចំនួន ដូចជា ប្រទេសឡាវ មីយ៉ាន់ម៉ា ទីម័រ និងប្រទេសនេប៉ាល់ផងដែរ ដើម្បីប្រយុទ្ធប្រឆាំងនឹងជំងឺកូវីដ ១៩៕