.jpg)
លោកស្រី ឱ វណ្ណឌីន អ្នកនាំពាក្យក្រសួងសុខាភិបាល នៅពេលចុះទៅខេត្តកំពង់ចាមនៅថ្ងៃទី ២០ ខែកក្កដា។ រូបថត FN
ភ្នំពេញៈ មន្ត្រីជាន់ខ្ពស់ក្រសួងសុខាភិបាលកំពុងតែធ្វើការសិក្សាទៅលើករណីដែលមានការបាត់បង់ជីវិតមួយចំនួនធំ ជាមនុស្សដែលមានវ័យចំណាស់ ហើយជាពិសេសកើតមាននៅតាមជនបទ ដែលបានឈឺរហូតស្លាប់ទើបបានមើលឃើញថា មានជំងឺកូវីដ ១៩។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងបង្ការជំងឺកូវីដ ១៩ បានថ្លែងនាព្រឹកថ្ងៃទី ២០ ខែកក្កដាក្នុងពេលចុះផ្តល់នូវថវិកា ១០ លានរៀល និងសម្ភារជាស្បៀងអាហារមួយចំនួនទៅដល់អ្នកចាក់វ៉ាក់សាំងកូវីដ ១៩ ទី ៦ លាន នៅក្នុងខេត្តកំពង់ចាមថា ប្រសិនបើប្រជាពលរដ្ឋមិនបន្តការពារ ឬធ្វើការការពារហើយ ប៉ុន្តែមិនគ្រប់គ្រាន់ មិនគ្រប់ជ្រុងជ្រោយ ឬមិនបានត្រឹមត្រូវ តាមវិធានការសុខាភិបាល ឬវិធានការ ៣ ការពារ និង ៣ កុំទេនោះ ការចម្លងនៅតែមាន ហើយអត្រាឆ្លង និងស្លាប់ដោយសារជំងឺកូវីដ ១៩ នៅតែមានបន្តកើនឡើង។
លោកស្រីមានប្រសាសន៍ថា៖ «យើងនឹងធ្វើការសិក្សាឱ្យបានច្បាស់លាស់លើចំណុចទាំងនេះ ហើយខ្ញុំកំពុងដឹកនាំនូវការសិក្សានេះ។ ប៉ុន្តែខ្ញុំសុំមិនទាន់ជម្រាបជូនលម្អិតទេ ដោយសារយើងកំពុងតែធ្វើការចាត់ចែងរៀបចំ ប៉ុន្តែនៅពេលខាងមុខនេះ យើងនឹងពិនិត្យមើលទៅលើបញ្ហានេះ»។
លោកស្រី ឱ វណ្ណឌីន បញ្ជាក់ថា៖ «តាមការសាកសួរផ្ទាល់មាត់អ្នកដែលបានបាត់បង់ជីវិតមួយចំនួនជាមនុស្សមានវ័យចំណាស់ដែលរស់នៅទីជនបទ ហើយនៅពេលដែលគាត់ឈឺ (កូវីដ) គាត់មិនដឹង។ ដំបូងគឺមានអាការដូចផ្តាសាយ ហៀរសំបោរ និងក្អក ប៉ុន្តែគាត់គិតថា ជាជំងឺផ្តាសាយធម្មតា ដោយសារគាត់គិតថា គាត់មិនបានដើរទៅណា គាត់នៅតែផ្ទះមានមូលហេតុអីដែលគាត់ឆ្លង»។
អ្នកនាំពាក្យរូបនេះបន្ថែមថា នៅពេលដែលអ្នកនោះឈឺ ហើយមិនបានទៅធ្វើតេស្ត ឬស្វែងរកសេវាព្យាបាលឱ្យទាន់ពេលវេលា រហូតគាត់មានបញ្ហាផ្លូវដង្ហើមចាប់ផ្តើមហត់ទើបបានជាពួកគាត់ទៅមន្ទីរពេទ្យ។ នៅពេលមនុស្សពេញវ័យបានឆ្លងវីរុសកូវីដ ១៩ គាត់បានចម្លងទៅមនុស្សចាស់នៅផ្ទះដែលមិនដែលបានទៅណា តែបែរជាត្រូវបានឆ្លងកូវីដ ១៩ ពីកូនចៅរបស់ខ្លួនឯង។
លោកស្រីបន្តថា៖ «មនុស្សវ័យចាស់ ជាក្រុមដែលមានហានិភ័យក្នុងការទទួលយកនូវជំងឺនានា ដោយសារតែគាត់មានវ័យចាស់ សរីរាង្គក៏ចាស់ដែរដូចនេះការបង្កើតនូវអង្គបក្ខដិបក្ខក៏ចាស់ទៅតាមវ័យដែរ ដែលជាហេតុធ្វើឱ្យវីរុសកូវីដ ១៩ ងាយស្រួលក្នុងការវាយលុកក្នុងសរីរាង្គរបស់គាត់ណាស់។ អ្នកដែលស្លាប់ដោយសារជំងឺកូវីដ ១៩ គឺភាគច្រើនគឺជាមនុស្សដែលមានវ័យចាស់»។
កាលពីថ្ងៃទី ៨ ខែកក្កដា លោកស្រី ឱ វណ្ណឌីន ធ្លាប់បានបញ្ជាក់ដែរថា អ្នកដែលស្លាប់ដោយសារជំងឺកូវីដ- ១៩ភាគច្រើនជាអ្នកមានវ័យចំណាស់ និងមានជំងឺប្រចាំកាយដែលមានអាយុចន្លោះពីជាង ៥០ ឆ្នាំ ទៅជាង ៦០ ឆ្នាំ។
ដោយឡែកទាក់ទងនឹងការចាក់វ៉ាក់សាំងបង្ការជំងឺកូវីដ ១៩ គិតត្រឹមយប់ថ្ងៃទី ១៩ ខែកក្កដា កម្ពុជាបានចាក់វ៉ាក់សាំង ទៅដល់ប្រជាពលរដ្ឋទូទាំងប្រទេសសរុបបានចំនួនជាង ៦ លាននាក់ហើយស្មើនឹងជាង ៦០% នៃប្រជាពលរដ្ឋចំនួន ១០ លាននាក់ ដែលរាជរដ្ឋាភិបាលគ្រោងនឹងបញ្ចប់ការចាក់វ៉ាក់សាំងឱ្យបាន ១០ លាននាក់នៅក្នុងខែតុលា ឬដើមខែវិច្ឆិកា ឆ្នាំ ២០២១ នេះ។
លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជានៅថ្ងៃទី ២០ ខែកក្កដា បានសាទរចំពោះអ្នកទទួលវ៉ាក់សាំងប្រឆាំងជំងឺកូវីដ ១៩ ទី ៦ លាន នៅកម្ពុជា ដោយលោកបានលើកឡើងថា ខណៈដែលប្រទេសជាច្រើនបាននិងកំពុងជួបប្រទះនូវបញ្ហាកង្វះខាតវ៉ាក់សាំងប្រឆាំងជំងឺកូវីដ ១៩ កម្ពុជាឯណេះ បើទោះមិនមែនជាប្រទេសអ្នកមានស្តុកស្តម្ភ បាននិងកំពុងជំរុញយន្តការចាក់វ៉ាក់សាំងទូទាំងប្រទេស។
លោកបានសរសេរលើបណ្តាញសង្គមហ្វេសប៊ុករបស់លោកថា៖ «បើទោះជាមានឧបសគ្គយ៉ាងណា យន្តការនេះ គិតមកត្រឹមពេលនេះ សម្រេចបានលទ្ធផលគួរជាទីមោទនៈ។ តើនេះជារឿងចៃដន្យទេ? មិនមែនទេ! រាជរដ្ឋាភិបាលកម្ពុជាដែលដឹកនាំដោយគណបក្សប្រជាជន គ្រប់ពេលវេលា នៅជាប់នឹងប្រជាជន ស្គាល់សុខទុក្ខប្រជាជន និងធ្វើអ្វីគ្រប់យ៉ាងដើម្បីប្រជាជន»។
លោកបន្ថែមថា អ្វីដែលទាំងអស់គ្នាគួរអបអរសាទរដល់កម្ពុជា ក្រោមការដឹកនាំរបស់រាជរដ្ឋាភិបាលនោះគឺការប្រមើលមើលស្ថានការណ៍បានយ៉ាងត្រឹមត្រូវ ដែលឈានទៅដល់ការកំណត់យកយន្តការនៃការចាក់វ៉ាក់សាំងនេះ ជាអាទិភាពតាំងពីដំបូង ក្រោយពីពិនិត្យយ៉ាងហ្មត់ចត់ទៅលើប្រសិទ្ធភាពវ៉ាក់សាំង ដែលនឹងត្រូវចាក់ជូនប្រជាពលរដ្ឋ។
លោក ហ៊ុន ម៉ានី បានបញ្ជាក់ថា៖ «រាជរដ្ឋាភិបាលបានប្រើប្រាស់នូវគ្រប់យន្តការអន្តរជាតិទាំងអស់ ដើម្បីស្នើសុំ និងទិញយកវ៉ាក់សាំងជាបន្តបន្ទាប់ដើម្បីធានាថា ជនកម្ពុជាគ្រប់រូបនឹងពិតជាទទួលបានការការពារដោយស្មើភាពគ្នា។ ក្រោមកិច្ចសហការល្អ មកដល់ពេលនេះ កម្ពុជាអាចធានាបាននូវវ៉ាក់សាំងគ្រប់ចំនួនដើម្បីចាក់ជូនប្រជាពលរដ្ឋខ្លួន»៕
វីដេអូ៖
