.jpg)
លោក ហ៊ុន ម៉ានិត និងអភិបាលខេត្តបន្ទាយមានជ័យពិនិត្យមណ្ឌលសុខភាព។ រូបថត រដ្ឋបាលខេត្ត
ភ្នំពេញៈ លោក ហ៊ុន ម៉ានិត ប្រធានអនុគណៈកម្មការគ្រប់គ្រងច្រកទ្វារចេញ-ចូលប្រទេស និងការធ្វើចត្តាឡីស័កបានស្នើដល់រាជធានី-ខេត្តទាំងអស់ទូទាំងប្រទេស ត្រូវត្រៀមរៀបចំកន្លែងធ្វើចត្តាឡីស័ក ដើម្បីទទួលពលករឆ្លងព្រំដែន (ថៃ) ចូលមកកម្ពុជាវិញ ដោយត្រូវធ្វើចត្តាឡីស័កនៅតាមព្រំដែនចំនួន ១៤ ថ្ងៃ ហើយត្រូវបន្តធ្វើចត្តាឡីស័កចំនួន ៧ ថ្ងៃទៀតនៅតាមស្រុកដែលពួកគេកំពុងរស់នៅ ដើម្បីការពារពីវីរុសបំប្លែងថ្មីប្រភេទដែលតា (Delta)។
យោងតាមសារជាសំឡេងរបស់លោក ហ៊ុន ម៉ានិត ដែល ភ្នំពេញ ប៉ុស្តិ៍ ទទួលបាននៅថ្ងៃទី ២០ ខែកក្កដា បានឱ្យដឹងថា បន្ទាប់ពីធ្វើការពិភាក្សាគ្នាជាមួយគណៈកម្មការប្រតិបត្តិ និងគណៈកម្មការអន្តរក្រសួងបានសម្រេចឱ្យខេត្តដែលនៅខាងក្នុងប្រទេស ឬខេត្តទាំងអស់តែម្តង ត្រូវត្រៀមលក្ខណៈរៀបចំមណ្ឌលចត្តាឡីស័ក ដើម្បីទទួលពលករមកពីព្រំដែន។
លោក ម៉ានិត ថ្លែងថា៖ «យោងតាមសេចក្តីណែនាំកន្លងមកគឺយើងឱ្យប្រជាពលរដ្ឋធ្វើចត្តាឡីស័កចំនួន ១៤ ថ្ងៃនៅឯព្រំដែន បន្ទាប់មកអនុញ្ញាតឱ្យធ្វើចត្តាឡីស័ក ៧ ថ្ងៃបន្ថែមទៀតនៅឯគេហដ្ឋានរបស់គាត់ទៀត។ វីរុសបំប្លែងថ្មីប្រភេទដែលតា ពេលខ្លះក្នុងរយៈពេល ១៤ ថ្ងៃ មិនអាចតេស្តមើលឃើញទេ។ ដូច្នេះហើយ ប្រហែលជាយើងត្រូវរៀបចំមណ្ឌលចត្តាឡីស័កនៅតាមស្រុកដែលពលករនោះរស់នៅទីនោះ។ គឺអ្នកស្រុកណាត្រូវទៅធ្វើចត្តាឡីស័កនៅស្រុកនោះ»។
លោក ម៉ានិត បានថ្លែងបន្តទៀត ដោយបង្ហាញនូវភាពជឿជាក់ថា ខេត្តទាំងអស់បានត្រៀមលក្ខណៈរួចរាល់ហើយ ដោយសារមានការទទួលពលករធ្វើចត្តាឡីស័កកន្លងមកក្នុងឆ្នាំ ២០២០។
លោកថ្លែងថា៖ «យើងត្រូវមានការប្រុងប្រយ័ត្នខ្ពស់ជាមួយនឹងវីរុសបំប្លែងថ្មីប្រភេទដែលតាមកពីឥណ្ឌា។ ដូចនេះសូមប្រាប់ទៅប្រធានគណៈកម្មការប្រយុទ្ធប្រឆាំងកូវីដ ១៩ ខេត្ត និងរាជធានីថា ក្រោយពីធ្វើចត្តាឡីស័កចំនួន ១៤ ថ្ងៃនៅតាមព្រំដែនហើយគឺយើងនឹងជំរុញទៅធ្វើចត្តាឡីស័កនៅតាមខេត្ត-ស្រុករបស់ខ្លួន (ពលករដែលរស់នៅទីនោះ) ទៀត»។
លោក ហ៊ុន ម៉ានិត បានបញ្ជាក់ថា តាមការណែនាំកន្លងមកគឺ ការធ្វើចត្តាឡីស័កនៅមណ្ឌលចត្តាឡីស័កតាមព្រំដែនចំនួន ១៤ ថ្ងៃហើយបន្តធ្វើចត្តាឡីស័កចំនួន ៧ ថ្ងៃទៀតនៅផ្ទះ ប៉ុន្តែការធ្វើចត្តាឡីស័កនៅផ្ទះប្រហែលជាដូរមកធ្វើនៅមណ្ឌលចត្តាឡីស័កក្នុងស្រុក-ខេត្តវិញ ហើយការសម្រេចនេះកំពុងតែធ្វើការពិភាក្សាគ្នាដែលអាចនឹងរៀបចំធ្វើការកែសម្រួលដែលចុះហត្ថលេខាដោយរដ្ឋមន្ត្រីក្រសួងសុខាភិបាល លោក ម៉ម ប៊ុនហេង គឺប្តូរពីការធ្វើចត្តាឡីស័ក ២១ ថ្ងៃ ដោយធ្វើនៅតាមព្រំដែន ១៤ ថ្ងៃ និង ៧ ថ្ងៃនៅខេត្តរបស់ខ្លួន (ពលករ)។
លោក លីវ សុខុន អ្នកនាំពាក្យខេត្តសៀមរាបបានប្រាប់ ភ្នំពេញ ប៉ុស្តិ៍ នៅថ្ងៃទី ២០ ខែកក្កដា ថា ពេលនេះតាមបណ្តាខេត្តមានគោលការណ៍ថ្មីសម្រាប់ពលករដែលមកពីប្រទេសថៃត្រូវតម្រូវឱ្យធ្វើចត្តាឡីស័កចំនួន ២១ ថ្ងៃ ក្នុងនោះធ្វើនៅខេត្តជាប់ព្រំដែនចំនួន ១៤ ថ្ងៃ នឹងបន្តមកធ្វើនៅតាមខេត្ត ឬស្រុកសាមីចំនួន ៧ ថ្ងៃទៀត។
លោកថ្លែងថា៖ «ការកែប្រែចំនួនថ្ងៃនៃការធ្វើចត្តាឡីស័កសម្រាប់ពលករមកពីថៃនេះគឺតាមគោលការណ៍ថ្មីរបស់អនុគណៈកម្មការគ្រប់គ្រងច្រកទ្វារចេញ-ចូលប្រទេស និងការធ្វើចត្តាឡីស័ក ដែលនៅក្នុងខេត្តយើងទើបតែធ្វើការអនុវត្តពេលថ្មីៗនេះប្រមាណជា ៣ ទៅ ៤ ថ្ងៃកន្លងមក»។
លោក លីវ សុខុន បានបញ្ជាក់ថា ខេត្តសៀមរាបត្រូវបានដាក់ជាខេត្តខ្សែត្រៀមទី២ សម្រាប់ទទួលពលករខ្មែរដែលវិលត្រឡប់មកពីប្រទេសថៃ ដោយសារតែខេត្តឧត្តរមានជ័យអស់កន្លែងសម្រាប់ពលករធ្វើចត្តាឡីស័ក។ មកដល់ពេលនេះខេត្តសៀមរាបមានអ្នកជំងឺកូវីដ ១៩ ប្រភេទដែលតា ចំនួន ៨ នាក់ ប៉ុន្តែមានអ្នកជំងឺ ៥ នាក់ បានជាសះស្បើយរួចហើយ។
គិតត្រឹមថ្ងៃទី ១៦ ខែកក្កដា ប្រទេសកម្ពុជាបានរកឃើញអ្នកមានវិជ្ជមានវីរុសប្រភេទបំប្លែងថ្មីដែលតានេះសរុបចំនួន ៧៥ នាក់ក្នុងចំនួននោះមានស្រី ៤០ នាក់ ដែលជាករណីនាំចូលទាំងអស់។
យោងតាមសេចក្តីប្រកាសរបស់ក្រសួងសុខាភិបាលដែលបានចេញផ្សាយជាបន្តបន្ទាប់បានឱ្យដឹងថា ករណីចុងក្រោយចំនួន ៣៧ ករណី ត្រូវបានរកឃើញកាលពីថ្ងៃទី ៧ និងទី ១៤ ខែកក្កដា ដែលជាអ្នកដំណើរវិលត្រឡប់មកពីប្រទេសថៃ តាមច្រកព្រំដែនកម្ពុជា-ថៃ និងអ្នកដំណើរបរទេសតាមយន្តហោះផងដែរ។ ពលករខ្មែរដែលរកឃើញមានវីរុសបំប្លែងថ្មីនេះ ជាប្រជាពលរដ្ឋដែលរស់នៅខេត្តផ្សេងៗគ្នាដូចជា ខេត្តបន្ទាយមានជ័យ កំពង់ចាម កំពង់ធំ ឧត្តរមានជ័យ ប៉ៃលិន ត្បូងឃ្មុំ សៀមរាប បាត់ដំបង កំពង់ឆ្នាំង កំពង់ស្ពឺ កំពត ស្វាយរៀង ព្រះវិហារ និងខេត្តពោធិ៍សាត់។
លោក ឌី រ៉ាដូ អភិបាលរងខេត្តឧត្តរមានជ័យបានប្រាប់ ភ្នំពេញ ប៉ុស្តិ៍ នៅថ្ងៃទី ២០ ខែកក្កដា ថា គិតមកដល់ពេលនេះ ខេត្តឧត្តរមានជ័យរកឃើញមានអ្នកឆ្លងវីរុសកូវីដ ១៩ ប្រភេទដែលតាដែលជាពលករ មានចំនួន ១៧ នាក់ ហើយក្នុងនោះមានចំនួន ៧ នាក់បានព្យាបាលជាសះស្បើយផងដែរ ប៉ុន្តែពួកគាត់ត្រូវធ្វើចត្តាឡីស័កចំនួន ២១ ថ្ងៃបន្តទៀត។
លោកថ្លែងថា៖ «យើងបានដាក់ឱ្យពួកគាត់បន្តធ្វើចត្តាឡីស័កតាមការកំណត់របស់ក្រសួងសុខាភិបាល បន្ទាប់ពីបញ្ចប់ហើយយើងនឹងឱ្យពួកគាត់វិលត្រឡប់ទៅកាន់គេហដ្ឋានរបស់ពួកគាត់វិញ ហើយសម្រាប់អ្នកឆ្លងវីរុសប្រភេទថ្មីនេះគឺតម្រូវឱ្យធ្វើចត្តាឡីស័ករហូតដល់ ២១ ថ្ងៃ»។
លោក ឌី រ៉ាដូ បានឱ្យដឹងថា ជាទូទៅនៅពេលដែលមានការធ្វើតេស្តរហ័សហើយ គឺខេត្តត្រូវតែបញ្ជូនសំណាកទៅកាន់វិទ្យាស្ថានប៉ាស្ទ័រកម្ពុជា ដើម្បីធ្វើការពិនិត្យបន្ថែម ថាតើវាជាប្រភេទវីរុសបំប្លែងថ្មីឬយ៉ាងណា។ ពាក់ព័ន្ធនឹងការព្យាបាលអ្នកជំងឺវីរុសប្រភេទដែលតានេះ គឺដាក់នៅដាច់ដោយឡែកពីអ្នកជំងឺកូវីដប្រភេទអាល់ហ្វា។
លោក សឿម ប៊ុនរិទ្ធី អ្នកនាំពាក្យរដ្ឋបាលខេត្តបាត់ដំបងបានប្រាប់ ភ្នំពេញ ប៉ុស្តិ៍ ផងដែរថា សម្រាប់ខេត្តនេះមានអ្នកជំងឺកូវីដប្រភេទដែលតាចំនួន ៤ នាក់ ប៉ុន្តែពួកគាត់បានជាសះស្បើយហើយ ហើយពលករដែលឆ្លងចូលមកតាមច្រកព្រំដែននៃប្រទេសថៃ គឺត្រូវបានយកសំណាកដើម្បីធ្វើតេស្តនៅវិទ្យាស្ថានប៉ាស្ទ័រ ប៉ុន្តែមិនទាន់ដឹងថាតើនឹងមានអ្នកឆ្លងវីរុសថ្មីនេះឬអត់ទេ។
លោក សឿម ប៊ុនរិទ្ធី បានថ្លែងឱ្យដឹងទៀតថា៖ «មួយរយៈចុងក្រោយនេះ ពលករដែលមកពីប្រទេសថៃ ចូលក្នុងខេត្តបាត់ដំបង គឺមិនសូវមានច្រើនទេ ដែល ១ ថ្ងៃ មានប្រមាណជាជាង ១០ នាក់ ឬ ២០ នាក់ប៉ុណ្ណោះ»៕
