.jpg)
បុរសម្នាក់បើកម៉ូតូកង់បីដឹកប្រពន្ធលក់បន្លែ ត្រីសាច់តាមផ្លូវក្នុងខណ្ឌមានជ័យពីថ្ងៃទី ៣០ ឧសភា។ ហុង មិនា
ភ្នំពេញៈ រដ្ឋមន្ត្រីក្រសួងផែនការលោក ឆាយ ថន បានឱ្យដឹងថា កម្មករដែលបម្រើការងារក្នុងវិស័យក្រៅប្រព័ន្ធជាង ៦ លាននាក់បានបាត់បង់ការងារ ឬប្រឈមនឹងការបាត់បង់ការងារក្នុងអំឡុងពេលនៃការរីករាលដាលនៃវីរុសកូវីដ ១៩។
លោក ឆាយ ថន បានថ្លែងដូចនេះនៅក្នុងឱកាសបើកវេទិកា «ទិវាប្រជាជនពិភពលោកលើកទី ៣២» កាលពីថ្ងៃទី ២០ ខែកក្កដា ដែលធ្វើឡើងតាមរយៈប្រព័ន្ធអនឡាញ (Zoom) ដែលមានអ្នកចូលរួមពីមន្ត្រីជាន់ខ្ពស់នៃក្រសួងសំខាន់ៗមួយចំនួនដូចជា ក្រសួងកិច្ចការនារី ក្រសួងអប់រំ យុវជន និងកីឡា ក្រសួងសុខាភិបាល តំណាងអង្គការ UNFPA ប្រចាំកម្ពុជា និងតំណាងឯកអគ្គរដ្ឋទូត តំណាងដៃគូអភិវឌ្ឍន៍ ប្រចាំនៅកម្ពុជាជាច្រើននាក់ទៀត។
ការបាត់បង់ការងារ និងការប្រឈមនឹងការបាត់បង់ការងារដ៏ច្រើននេះបានកើតមានឡើងនៅក្នុងកាលៈទេសៈដែលពិភពលោកទាំងមូល រួមទាំងកម្ពុជាបាននិងកំពុងប្រឈមនឹងការរីករាលដាលនៃជំងឺកូវីដ ១៩ ដែលបានបង្កគ្រោះមហន្តរាយយ៉ាងធ្ងន់ធ្ងរ ដល់សេដ្ឋកិច្ចសកល និងសុខភាពសាធារណៈ ដោយមានមនុស្សរាប់លាននាក់បានឈឺ និងស្លាប់។
លោក ឆាយ ថន បានមានប្រសាសន៍ថា៖ «ការផ្ទុះឡើងនូវព្រឹត្តិការណ៍សហគមន៍បានបង្កើតនូវសម្ពាធយ៉ាងធ្ងន់ធ្ងរ មកលើប្រព័ន្ធសុខាភិបាលកម្ពុជា សេដ្ឋកិច្ចសង្គម ជីវភាពរស់នៅប្រចាំថ្ងៃ និងអាយុជីវិតប្រជាពលរដ្ឋ ព្រមទាំងបានអូសបន្លាយពេលវេលា និងបានពង្រីកវិសាលភាពនៃការឆ្លងជំងឺនេះ ដែលមកដល់ពេលនេះ ប្រជាជនកម្ពុជាចំនួនជិត ៧ ម៉ឺននាក់បានឆ្លងជំងឺនេះ និងជាង ១ ពាន់នាក់បានស្លាប់ដោយសារជំងឺកូវីដ ១៩ នេះ»។
លោករដ្ឋមន្ត្រីក្រសួងផែនការបានបញ្ជាក់ថា ចំពោះវិស័យសេដ្ឋកិច្ច ដែលកម្ពុជាទទួលរងផលប៉ះពាល់ធ្ងន់ធ្ងរជាងគេ គឺទេសចរណ៍ កម្មន្តសាលសម្រាប់ការនាំចេញ និងសំណង់ ដែលក្នុងឆ្នាំ ២០១៩ វិស័យទាំង ៣ នេះបានរួមចំណែកជាង ៧០ ភាគរយ នៃកំណើនសេដ្ឋកិច្ច និងផ្តល់ការងារប្រមាណជា ៣៩,៥ ភាគរយ។
លោកបន្តថា៖ «ដោយសារតែការរីករាលដាលនៃវីរុសកូវីដ អាជីវកម្មពាក់ព័ន្ធនឹងវិស័យទេសចរណ៍ជិត ៣ ពាន់ត្រូវបានផ្អាកសកម្មភាពដែលបណ្តាលឱ្យមនុស្សជាង ៤៥ ពាន់នាក់បានបាត់បង់ការងារ ហើយបច្ចុប្បន្ននេះការងារចំនួនប្រមាណ ១,៧ លាន កំពុងប្រឈមនឹងហានិភ័យ។ កម្មករដែលបម្រើការងារក្នុងវិស័យក្រៅប្រព័ន្ធ ត្រូវបានប៉ាន់ស្មានថា ប្រមាណជា ៦,១ លាននាក់ បានបាត់បង់ការងារ ឬប្រឈមនឹងការបាត់បង់ការងារ»។
ឆ្លើយតបទៅនឹងស្ថានភាពនៃការរីករាលដាលជំងឺកូវីដ-១៩នេះ រាជរដ្ឋាភិបាលបាននិងកំពុង អនុវត្តគោលនយោបាយគាំពារសង្គម សំដៅជួយសម្រាលការលំបាក និងលើកកម្ពស់ជីវភាពរស់នៅរបស់ប្រជាជនដែលមានជីវភាពក្រីក្រ និងងាយរងគ្រោះ ជាពិសេសស្ត្រី និងក្មេងស្រី។
លោក ឆាយ ថន បញ្ជាក់ថា រាជរដ្ឋាភិបាលបានជួយដល់អ្នកដែលរងផលប៉ះពាល់នេះតាមរយៈកម្មវិធីឧបត្ថម្ភសាច់ប្រាក់ក្នុងនោះមានដូចជា ជួយដល់កម្មការិនី ដែលជាស្ត្រីមានផ្ទៃពោះ និងគ្រួសារដែលមានជីវភាពក្រីក្រ ការបង្កើនមូលធនថវិកា សាច់ប្រាក់ពលកម្ម ដើម្បីជួយដល់កម្មករនិយោជិត ដែលបានព្យួរការងារអំឡុងពេលដែលរោងចក្រ សហគ្រាស គ្រឹះស្ថានក្នុងវិស័យកាត់ដេរ និងទេសចរណ៍មួយចំនួនបានផ្អាកដំណើរការ និងកម្មវិធីឧបត្ថម្ភ សាច់ប្រាក់ជូនគ្រួសារក្រីក្រ និងងាយរងគ្រោះក្នុងអំឡុងពេលជំងឺកូវីដផងដែរ។
លោក សុខ ឈុនអឿង ប្រធានសមាគមកម្មករកម្ពុជា សេដ្ឋកិច្ចក្រៅប្រព័ន្ធ ប្រាប់ភ្នំពេញប៉ុស្តិ៍ពីម្សិលមិញថា កម្មករកម្ពុជាក្រៅប្រព័ន្ធជាច្រើនបានបាត់បង់ចំណូល និងអ្នកខ្លះបានស្វះស្វែងរកការងារផ្សេងធ្វើដើម្បីបានប្រាក់ចំណូលជួយគ្រួសារ។
លោកបានបន្តថា៖ «កម្មករធ្វើការក្រៅប្រព័ន្ធពិតជាជួបការលំបាកច្រើនទាំងការបាត់បង់ការងារ បាត់បង់ចំណូល និងត្រូវប្រឈមមុខនឹងកាតព្វកិច្ចសងបំណុលធនាគារ។ ចំណែកការផ្គត់ផ្គង់ដល់ក្រុមគ្រួសារគឺមានការថយចុះខ្លាំង»។
លោក សុខ ឈុនអឿង បានបន្តថា សមាជិកស្ទើរទាំងស្រុងក្នុងចំណោមសមាជិកជាង ១ ០០០ នាក់ បានបាត់បង់ចំណូល ហើយមួយចំនួនត្រូវបង្ខំចិត្តធ្វើការប្តូរមុខរបរដែលធ្លាប់ធ្វើ បែរជាទៅធ្វើជាសន្តិសុខ ឬការងារផ្សេងដែលអាចទទួលបានចំណូលក្នុងស្ថានភាពលំបាកនេះ។
លោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ ធ្លាប់បានស្នើទៅរដ្ឋាភិបាលឱ្យមានការគិតគូរទៅដល់កម្មករក្នុងវិស័យសេដ្ឋកិច្ចក្រៅប្រព័ន្ធ ដោយមិនត្រូវផាត់ពួកគាត់ចេញពីការជួយឧបត្ថម្ភឡើយ ខណៈដែលពួកគេក៏កំពុងរងឥទ្ធិពលពីព្រឹត្តិការណ៍សហគមន៍ ២០ កុម្ភៈដូចគ្នាផងដែរ៕
