ភ្នំពេញៈ វ៉ាក់សាំងបង្ការជំងឺកូវីដ ១៩ ប្រភេទស៊ីណូហ្វាមចំនួន ១ លានដូស បានដឹកមកដល់ភ្នំពេញហើយ នាព្រឹកមិញនេះ ហើយកម្ពុជាក៏នឹងត្រៀមទទួលវ៉ាក់សាំងបង្ការជំងឺកូវីដ ១៩ ប្រភេទ Johnson & Johnson ដែលផលិតនៅប្រទេសអាមេរិក ចំនួន ១ លានដូសផងដែរ តាមរយៈយន្តការកូវ៉ាក់ ប៉ុន្តែមិនទាន់ដឹងកាលបរិច្ឆេទច្បាស់លាស់នៃការមកដល់ពេលណានៅឡើយទេ។
នៅពេលទៅទទួលវ៉ាក់សាំងស៊ីណូហ្វាមចំនួន ១ លានដូស ដែលរាជរដ្ឋាភិបាលកម្ពុជាបញ្ជាទិញពីចិន និងបានដឹកមកដល់ព្រលានយន្តហោះអន្តរជាតិភ្នំពេញនាព្រឹកថ្ងៃទី ២២ ខែកក្កដា នេះ រដ្ឋលេខាធិការក្រសួងសុខាភិបាល លោកស្រី យក់ សម្បត្តិ ថ្លែងថា ប្រទេសកម្ពុជា នឹងទទួលបានវ៉ាក់សាំងបង្ការជំងឺកូវីដ ១៩ ដែលផលិតនៅសហរដ្ឋអាមេរិកចំនួន ១ លានដូសផងដែរ តាមរយៈយន្តការកូវ៉ាក់។
លោកស្រីមានប្រសាសន៍ថា៖ «យើងនឹងមានវ៉ាក់សំាង Johnson&Johnson ប្រហែលជា ១ លានដូសនឹងមកដល់ប្រទេសកម្ពុជា ប៉ុន្តែយើងមិនទាន់បានបញ្ជាក់ច្បាស់ពីពេលវេលាដែលនឹងត្រូវដឹកមកដល់ពេលណានោះទេ»។
ជាមួយគ្នានេះ វ៉ាក់សាំងចំនួន ៥ លានដូស នឹងដឹកមកដល់កម្ពុជា ក្នុងខែសីហា និងខែកញ្ញា របស់ក្រុមហ៊ុនស៊ីណូវ៉ាក់ដែលរាជរដ្ឋាភិបាលកម្ពុជាបានបញ្ជាទិញសម្រាប់ត្រៀមចាក់ជូនកុមារ និងយុវវ័យ អាយុចាប់ពី ១២ ឆ្នាំ ដល់ ១៧ ឆ្នាំផងដែរ។
ទាក់ទងនឹងការចាប់ផ្តើមចាក់វ៉ាក់សាំងជូនកុមារ និងយុវវ័យនេះ ក្រុមការងារនៃគណៈកម្មការចំពោះកិច្ចកំពុងតែធ្វើផែនការ និងពិភាក្សាក្នុងក្រុមការងារយ៉ាងសកម្មផងដែរ៕