កំពង់ចាមៈ អភិបាលខេត្តកំពង់ចាម លោក អ៊ុន ចាន់ដា បានសម្រេចដាក់បន្តសុពលភាព នៃការពង្រឹងការអនុវត្តនូវវិធានការរដ្ឋបាល ដើម្បីទប់ស្កាត់ការឆ្លងរាលដាលនៃជំងឺកូវីដ១៩ ក្នុងភូមិសាស្រ្តខេត្តនេះ រយៈពេល ២សប្តាហ៍បន្ថែមទៀត ចាប់ពីថ្ងៃទី២៣ ខែកក្កដា ដល់ថ្ងៃទី០៥ ខែសីហា ឆ្នាំ ២០២១។
លោកបានលើកឡើងថា យោងស្ថានភាពនៃការឆ្លងរីករាលដាលនៃជំងឺកូវីដ១៩ ក្នុងព្រឹត្តិការណ៍សហគមន៍ ២០កុម្ភៈ នៅមិនទាន់មានសភាពធូរស្រាលនៅឡើយ ពិសេសការរកឃើញនូវករណីវិជ្ជមានកូវីដ១៩ ជាបន្តបន្ទាប់នៅក្នុងខេត្ត កំពង់ចាម រដ្ឋបាលខេត្តបានសម្រេចបន្តសុពលភាព នៃការអនុវត្តវិធានការរដ្ឋបាលនេះ រយៈពេល ២ សប្តាហ៍ទៀត។
លោក អ៊ុន ចាន់ដា បានលើកឡើងថា៖ «ការបន្តអនុវត្តនូវវិធានការរដ្ឋបាលនេះ ដើម្បីទប់ស្កាត់ការឆ្លងរាលដាលនៃជំងឺនេះ និងការពង្រឹងការអនុវត្តវិធានការបិទខ្ទប់ភូមិ ឬខ្នងផ្ទះ ក្នុងករណីរកឃើញប្រជាពលរដ្ឋវិជ្ជមាន កូវីដ១៩។ គណៈបញ្ជាការឯកភាពរដ្ឋបាលក្រុង-ស្រុក ឃុំ-សង្កាត់ មន្ទីរ-អង្គភាពជុំវិញខេត្ត និងប្រជាពលរដ្ឋត្រូវបន្តអនុវត្តន៍យ៉ាងម៉ឺងម៉ាត់»។
ក្នុងការអនុវត្តវិធានរដ្ឋបាលនេះ អភិបាលខេត្តបានស្នើឱ្យផ្អាកជាបណ្តោះអាសន្ននូវសកម្មភាពអាជីវកម្មពេលរាត្រី រួមមានភោជនីយដ្ឋាន អាហារដ្ឋាន តូបលក់ចល័ត ផ្សាររាត្រី ផ្សារទំនើប ម៉ាត ហាងលក់ទំនិញគ្រប់ប្រភេទ ការជួបជុំនៅតាមទីសាធារណៈនានាដែលមានសភាព អ៊ូអរ និងការជួបជុំមនុស្សច្រើន ចាប់ពីម៉ោង ២០:០០ នាទីយប់ ដល់ម៉ោង ០៣:០០ នាទីព្រឹកជាកំហិត។
លោក អ៊ុន ចាន់ដា បានបន្ថែមទៀតថា ការលក់ដូរគ្រឿងស្រវឹងគ្រប់ប្រភេទ និងការជួបជុំទទួលទានគ្រឿងស្រវឹង គ្រប់ប្រភេទ ការប្រមូលផ្តុំមនុស្សច្រើន ក្នុងគោលបំណងប្រារព្ធពិធីជប់លៀងកម្សាន្តសប្បាយនានា នៅតាមគេហដ្ឋាន កន្លែងធ្វើការ និងក្រុមហ៊ុនឯកជន រួមនឹងការជួបជុំបែបសាសនា ឬការថ្វាយបង្គំ ក៏ត្រូវផ្អាកផងដែរ។
ជាមួយគ្នានេះដែរ ការអនុវត្តកាតព្វកិច្ចពាក់ម៉ាស់ និងកាតព្វកិច្ចរក្សាគម្លាតសុវត្ថិភាព ក្នុងអំឡុងពេលនៃការឆ្លងរាលដាលនៃជំងឺកូវីដ១៩ ក្នុងព្រឹត្តិការណ៍សហគមន៍ ២០កុម្ភៈ ក្នុងភូមិសាស្ត្រ ខេត្តកំពង់ចាម ក៏ត្រូវធ្វើជាកំហិតផងដែរ៕