ភ្នំពេញៈ ក្រសួង​សុខាភិបាល​បាន​ឱ្យដឹងថា រហូតមកដល់​ថ្ងៃទី​ ២៤ ខែកក្កដា មានការ​សិក្សា​ខ្លះ​បាន​បង្ហាញថា វីរុស​កូវីដ​ ១៩ អាច​នៅរស់​បាន​នៅលើ​អាហារ​កកៗ បើទោះបី​ជា​វីរុស​កូវីដ​នេះ មិនអាច​បង្កើត​កូនចៅ​ក្នុង​ចំណី​អាហារ​បាន​ក៏ដោយ ដែល​ក្នុងន័យនេះ​ក្រសួង​សុខាភិបាល​បាន​អំពាវនាវ​ឱ្យមាន​ការការពារ​សុខភាព​បណ្តាលមកពី​ចំណី​អាហារ និង​ចំណីអាហារ​កក​ក្នុង​បរិបទ​នៃ​ការរាតត្បាត​ជំងឺ​កូវីដ​នេះ​។

លោកស្រី​ ឱ វណ្ណឌីន អ្នកនាំពាក្យ​ក្រសួង​សុខាភិបាល និង​ជា​ប្រធាន​គណៈកម្មការ​ចំពោះ​កិច្ចចាក់​វ៉ាក់សាំង​កូវីដ​ ១៩ ​ក្នុង​ក្របខ័ណ្ឌ​ទូទាំង​ប្រទេស បាន​ណែនាំ​ទៅដល់​សាធារណជន​ទាំងអស់​សូមឱ្យ​រៀបចំ និង​ទុកដាក់​ចំណីអាហារ​ក្នុង​បរិបទ​ជំងឺ​កូវីដ​ ១៩ ដើម្បីឱ្យ​បុគ្គល​មាន​សុខភាព​ល្អ ចៀស​ផុតពី​បញ្ហា​សុខភាព បណ្តាល​មកពី​ការឆ្លង​ជំងឺ​ផ្សេងៗ ជាពិសេស​ជំងឺ​កូវីដ​ការពុល​អាហារ និង​ការពុល​ស្រា​។

លោកស្រី​បាន​លើកឡើង​ថា បញ្ហា​សុខភាព​បណ្តាល​មកពី​ចំណីអាហារ បង្កឡើង​តាមរយៈ​ការប៉ះពាល់ ការទទួល​ទាន​ចំណីអាហារ ឬ​ទឹកកខ្វក់ ដែលមាន​មេរោគ​បាក់តេរី វីរុស ប៉ារ៉ាស៊ីត ឬ​សារធាតុគីមី ក្នុង​នោះ​ក៏​អាចមាន​វីរុស​កូវីដ​ ១៩ ផងដែរ​។

លោកស្រី ឱ វណ្ណឌីន បានឱ្យដឹង​កាលពី​ថ្ងៃទី​ ២៤ ខែកក្កដា​ថា​៖ «​មាន​ការសិក្សា​ខ្លះ​បាន​បង្ហាញថា មាន​វីរុស​កូវីដ ​១៩ អាច​នៅរស់​នៅលើ​អាហារ​កកៗ​ដែរ បើទោះបីជា​វីរុស​កូវីដ​ ១៩ មិនអាច​បង្កើត​កូនចៅ​ក្នុង​ចំណីអាហារ​បាន​ក៏ដោយ​។ ក្នុងន័យនេះ ក្រសួង​សុខាភិបាល​សូម​ជម្រាបជូន​ថា បុគ្គល​អាច​មិន​ឆ្លង​វីរុស​កូវីដ​ ១៩ ពី​ចំណីអាហារ ឬ​ពី​អាហារ​វេចខ្ចប់ ប្រសិនបើ​បាន​អនុវត្ត​វិធានការ​អនាម័យ​ចំណីអាហារ​ឱ្យបាន​ជាប់​ជានិច្ច​»​។

អង្គការ​សុខភាព​ពិភពលោក​បាន​កំណត់ថា ជំងឺ​កូវីដ​ ១៩ គឺជា​ជំងឺឆ្លង​តាមផ្លូវ​ដង្ហើម បង្កឡើង​ដោយ​វីរុស​កូវីដ​ ១៩ ដែល​ចម្លង​ពី​មនុស្ស​ម្នាក់​ទៅ​មនុស្ស​ម្នាក់ទៀត តាម​ការដក​ដង្ហើមចូល​នូវ​តំណក់​ទឹកតូចៗ​ដែល​ចេញពី​អ្នកមាន​វីរុស​កូវីដ​ ១៩ ពេល​ក្អក ឬ​កណ្តាស់ ឬត​មក​ប៉ះមាត់ ច្រមុះ ភ្នែក ក្នុង​ចម្ងាយ​តិចជាង ១ ​ម៉ែត្រ​។

ការចម្លង​ផ្សេងទៀត​អាច​ក្នុង​ស្ថានភាព​ខ្លះ​ដោយ​ប៉ះពាល់​ជាមួយ​នឹង​ផ្ទៃ ឬ​វត្ថុ​ដែល​អ្នកមាន​វីរុស​កូវីដ​ ១៩ ប៉ះពាល់​រួច​យកដៃ​របស់ខ្លួន​មក​ប៉ះ​ភ្នែក ច្រមុះ ឬ​មាត់ ដែលជា​ហេតុនាំ​ឱ្យ​វីរុស​កូវីដ​ ១៩ ចូលទៅក្នុង​ខ្លួន​បាន ហើយ​វីរុស​កូវីដ​ ១៩ នេះ​ត្រូវការ​ជម្រក​នៅលើ​មនុស្ស ឬ​សត្វ ដើម្បី​បង្កើត​កូនចៅ​។

លោកស្រី ឱ វណ្ណឌីន លើកឡើង​ទៀតថា ការស្រាវជ្រាវ​ថ្មីៗ​ធ្វើឡើង​នៅក្នុង​មន្ទីរពិសោធន៍ ដែលមាន​សំណើម និង​សីតុណ្ហភាព​ដែល​អាច​គ្រប់គ្រង​បាន បាន​វាយតម្លៃ​ពី​ការរស់រាន​នៃ​វីរុស​កូវីដ​ ១៩ នៅលើ​ផ្ទៃ​ផ្សេងៗ​គ្នា ហើយ​បាន​រាយការណ៍​ថា វីរុស​កូវីដ​ ១៩ អាច​រស់រាន​រហូតដល់ ៧២ ​ម៉ោង នៅលើ​ប្លាស្ទិក​នៅលើ​ដែក​អ៊ីណុក​ស្ពាន់​រហូតដល់​ ៤ ​ម៉ោង និង​នៅលើ​ក្រដាស​កាតុង​ធ្វើ​កេស​ចំនួន​ប្រហែលជា ២៤ ​ម៉ោង​។

ជា​ការចាំបាច់​សម្រាប់​ឧស្សាហកម្ម​ម្ហូបអាហារ​ក្នុង​ការពង្រឹង​វិធានការ​អនាម័យ​ផ្ទាល់ខ្លួន និង​ផ្តល់​ការបណ្តុះបណ្តាល រំឭក​ឡើងវិញ​ពី​លើ​គោលការណ៍​អនាម័យ​ចំណីអាហារ​ដើម្បី​លុបបំបាត់ ឬ​កាត់បន្ថយ​ហានិភ័យ​នៃ​ផ្ទៃ​ចំណីអាហារ និង​សម្ភារ វេចខ្ចប់​អាហារ​ដែល​អាច​ឆ្លង​មេរោគ​ផ្សេងៗ ជាពិសេស​វីរុស​កូវីដ​ ១៩ ពី​បុគ្គលិក​ដែល​ធ្វើ​ម្ហូបអាហារ​។

លោកស្រី ឱ វណ្ណឌីន បន្ថែមថា​៖ «​អតិថិជន​ដែលជា​អ្នក​ប្រើប្រាស់​ត្រូវ​លាង​សម្អាត​បន្លែ ផ្លែឈើ ជាមួយ​ទឹកស្អាត​ឱ្យបាន​ស្អាត​ត្រឹមត្រូវ មុនពេល​ទទួលទាន​។ ទាំង​អតិថិជន និង​បុគ្គលិក ឬ​អ្នកលក់ដូរ គួរ​សង្កេត​ឱ្យបាន​ម៉ឺងម៉ាត់​នូវ​អនាម័យ​ផ្ទាល់ខ្លួន​ឱ្យ​បាន​ល្អ​គ្រប់ពេល ជាពិសេស​នៅ​ជុំវិញ​កន្លែង​ដែលមាន​ម្ហូបអាហារ​កក សាច់​កក អាហារ​ស្រស់ បន្លែ​ផ្លែឈើ ជាដើម ត្រូវ​ប្រញាប់ និង​ឧស្សាហ៍​លាង​សម្អាត​ដៃ​ជានិច្ច ក្រោយ​ប៉ះពាល់ ឬ​ចាប់​កាន់​អាហារ​ឆៅ អាហារ​ស្រស់​ទាំងអស់​នោះ​»​។

អង្គការ​សុខភាព​ពិភពលោក​ណែនាំ​ថា បុគ្គល​ដែលមាន​អាការ​មិន​ស្រួលខ្លួន គួរតែ​នៅផ្ទះ​កុំទៅ​ធ្វើការ​។ បុគ្គលិក​ដែល​ធ្វើការ​ក្នុង​វិស័យ​ស្បៀងអាហារ ត្រូវ​ដឹង​អំពី​រោគសញ្ញា​សង្ស័យ​ជំងឺ​កូវីដ​ ១៩ រួមមាន គ្រុនក្តៅ​យ៉ាងតិច​ ៣៧,៥ ​អង្សាសេ ក្អក អស់​កម្លាំង បាត់បង់​រសជាតិ ឬ​បាត់បង់​ក្លិន សូម​រាយការណ៍​ប្រាប់​ស្ថាប័ន​របស់ខ្លួន​ ឬ​ទាក់ទង​ទូរស័ព្ទ​ ១១៥​។ បញ្ហា​សំខាន់​បំផុត គឺ​ដើម្បីឱ្យ​បុគ្គលិក​មាន​សមត្ថភាព​ក្នុង​ការសម្គាល់​រក​រោគសញ្ញា និង​រាយការណ៍​ឱ្យបាន​ឆាប់​ដើម្បី​អាច​ស្វែងរក​ការថែទាំ និង​ការធ្វើ​តេស្ត​រហ័ស​ ឬ​តេស្ត​វេជ្ជសាស្ត្រ​សមស្រប និង​កាត់បន្ថយ​ហានិភ័យ​នៃ​ការឆ្លង​ដល់​មិត្ត​រួម​ការងារ​បាន​ទាន់ពេលវេលា​។

លោក ម៉ម ប៊ុនហេង រដ្ឋមន្ត្រី​ក្រសួង​សុខាភិបាល​បាន​អំពាវនាវ​ដល់​សាធារណជន និង​ពលរដ្ឋ​ទាំងអស់​ចូលរួម​ដើរតួនាទី​យ៉ាងសំខាន់​នៅក្នុង​ការលើកកម្ពស់​សុវត្ថិភាព​ចំណីអាហារ ដើម្បី​ការពារ​ខ្លួនឯង ក្រុមគ្រួសារ​ខ្លួន និង​សង្គមជាតិ ដោយ​អនុវត្ត​នូវ​កូនសោរ​គន្លឹះ​ ៥ ​យ៉ាង សម្រាប់​ធ្វើឱ្យ​ចំណីអាហារ​មាន​សុវត្ថិភាព​ល្អ​ក្នុង​បរិបទ​ប្រយុទ្ធ​ជំងឺ​កូវីដ​។

លោក​បាន​ធ្វើការ​ណែនាំ​នូវ​គន្លឹះ​សំខាន់​ ៥ ​យ៉ាង​ក្នុង​ការថែរក្សា​សុខភាព រួមមាន ការរក្សា​អនាម័យ​ដោយ​ត្រូវ​លាង​សម្អាត​ដៃ​ឱ្យបាន​ញឹកញាប់ ជាមួយ​សាប៊ូ និង​ទឹកស្អាត​ ឬ​ទឹក​អាល់កុល​លាងដៃ ឬ​ជែល លាងដៃ​មុន និង​ក្រោយ​ចាប់​កាន់​ចំណីអាហារ ម្ហូបអាហារ​កក សាច់​កក អាហារ​ស្រស់​បន្លែ​ផ្លែឈើ​។

លោក ម៉ម ប៊ុនហេង ​ឱ្យដឹងថា​៖ «​ទុកដាក់​អាហារ​ឆៅ និង​ឆ្អិន​ឱ្យនៅ​ដាច់ដោយ​ឡែក​ពីគ្នា​។ ចម្អិន​អាហារ​ឱ្យបាន​ឆ្អិន​ល្អ ជាពិសេស​សាច់ សត្វ​ស្លាប ស៊ុត អាហារ​សមុទ្រ និង​អាហារ​ដែល​យក​ចេញ​ពី​ការបង្កក ចៀសវាង​ការចម្លង​វីរុស ឬ​មេរោគ​ជាយថាហេតុ​។ មិនត្រូវ​រក្សាទុក​អាហារ​ជាច្រើន​ថ្ងៃ​ទេ ទោះជា​ស្ថិតក្នុង​កម្រិត​សីតុណ្ហភាព​សុវត្ថិភាព​ក៏ដោយ និង​ប្រើប្រាស់​ទឹក និង​វត្ថុធាតុ​ដើម​ដែលមាន​សុវត្ថិភាព​»​។

លោក​រដ្ឋមន្ត្រី​បញ្ជាក់ថា បើ​រក្សាទុក​អាហារ​ក្នុង​ប្រព័ន្ធ​ត្រជាក់ គឺ​ត្រូវឱ្យ​នៅក្រោម​សីតុណ្ហភាព ៥ ​អង្សាសេ ហើយ​បើ​រក្សាទុក​អាហារ​ក្នុង​ប្រព័ន្ធ​កម្ដៅ គឺ​ត្រូវឱ្យ​លើសពី​សីតុណ្ហភាព ៦០ ​អង្សាសេ​។

ក្រសួង​សុខាភិបាល​បាន​ក្រើនរំឭក​ដល់​សាធារណជន​ទាំងអស់ ជាពិសេស​យុវវ័យ​គ្រប់រូប​ឱ្យ​បន្ត​ប្រុងប្រយ័ត្ន​ខ្ពស់ ការពារ​ខ្លួន​ជានិច្ច កុំ​ភ្លេចខ្លួន​ឱ្យសោះ ដោយ​ត្រូវ​ចេះ​ផ្លាស់ប្តូរ​ទម្លាប់​រស់នៅ​​របស់ខ្លួន ឱ្យ​ស្របតាម​ការរៀន​រស់នៅ​ជាមួយ​វត្តមាន​វីរុស​កូវីដ​ ១៩ តាមបែប​គន្លង​ថ្មី ក្នុង​បរិបទ​ប្រយុទ្ធ​នឹង​ជំងឺឆ្លង​នេះ​៕

វីដេអូ៖