ភ្នំពេញៈ គណៈកម្មការអន្តរក្រសួងដើម្បីប្រយុទ្ធនឹងជំងឺកូវីដ ១៩ សម្រេចយកសណ្ឋាគារចំនួន ២ ដាក់ឱ្យប្រើប្រាស់សេវាកក់សណ្ឋាគារធ្វើចត្តាឡីស័កសម្រាប់អ្នកដំណើរចូលមកប្រទេសកម្ពុជា តាមច្រកអាកាសយានដ្ឋានអន្តរជាតិភ្នំពេញ គឺ សណ្ឋាគារសុខាភ្នំពេញ និងរ៉េស៊ីដង់ (Sokha Phnom Penh Hotel & Residence) និងសណ្ឋាគារខថយ៉ាដ ម៉ារីយ័ត ភ្នំពេញ (Courtyard by Marriott Phnom Penh)។
យោងតាមសេចក្តីប្រកាសព័ត៌មានរបស់ក្រសួងសុខាភិបាលនៅថ្ងៃទី ២២ ខែកក្កដា ដែលភ្នំពេញប៉ុស្តិ៍ទទួលបាននៅថ្ងៃសុក្រនេះបានឱ្យដឹងថា ដើម្បីសម្រួលក្នុងការធ្វើចត្តាឡីស័ករបស់អ្នកដំណើរជាតិ និងអន្តរជាតិ ដែលបានចូលមកក្នុងប្រទេសកម្ពុជាតាមច្រកអាកាសយានដ្ឋានអន្តរជាតិ-ភ្នំពេញ គណៈកម្មការអន្តរក្រសួងដើម្បីប្រយុទ្ធនឹងជំងឺកូវីដ ១៩ សម្រេចដាក់ឱ្យអនុវត្តសេវាកក់សណ្ឋាគារចំនួន ២ រួមមានសណ្ឋាគារសុខាភ្នំពេញ និងរ៉េស៊ីដង់ និងសណ្ឋាគារខថយ៉ាដម៉ារីយ័តភ្នំពេញ។
អ្នកដំណើរត្រូវជ្រើសរើសសណ្ឋាគារ និងធ្វើការកក់ដោយផ្ទាល់តាមរយៈគេហទំព័ររបស់សណ្ឋាគារ www.sokhahotels.com.kh/phnompenh/ ឬ www.courtyardphnompenh.com ហើយត្រូវកក់បន្ទប់ស្នាក់នៅឱ្យបានមុន ២ ថ្ងៃនៃការចេញដំណើរ។ ពេលមកដល់អាកាសយានដ្ឋានអន្តរជាតិភ្នំពេញ អ្នកដំណើរដែលបានកក់បន្ទប់ស្នាក់នៅសណ្ឋាគារ សុខាភ្នំពេញ និងរ៉េស៊ីដង់ ឬសណ្ឋាគារខថយ៉ាដម៉ារីយ័តភ្នំពេញ ត្រូវបង្ហាញឯកសារចាំបាច់សម្រាប់ធ្វើដំណើរដូចករណីអ្នកដំណើរធម្មតា។
ឯកសារទាំងនោះមានដូចជា ទិដ្ឋាការដែលមានសុពលភាព និងចេញដោយស្ថានទូតកម្ពុជា ឬពីស្ថានកុងស៊ុល កម្ពុជានៃប្រទេសសាមី, វិញ្ញាបនបត្របញ្ជាក់សុខភាពចេញដោយអាជ្ញាធរសុខាភិបាលដែលទទួលស្គាល់ដោយរដ្ឋាភិបាលប្រទេសសាមី បញ្ជាក់ថាគ្មានជំងឺកូវីដ ១៩ ក្នុងរយៈពេល ៧២ ម៉ោង មុនពេលចេញដំណើរ និងលិខិតបញ្ជាក់លើការទិញសេវាធានារ៉ាប់រងសុខភាព ដែលតម្រូវឱ្យអ្នកធ្វើដំណើរបរទេសទិញសេវាធានារ៉ាប់រងសុខភាពសម្រាប់ព្យាបាលជំងឺកូវីដ ១៩។
អ្នកដំណើរត្រូវបង្ហាញឯកសារថតចម្លងបញ្ជាក់ថា បានកក់បន្ទប់ស្នាក់នៅសម្រាប់ការធ្វើចត្តាឡីស័ករយៈពេល ១៤ ថ្ងៃជូនដល់មន្ត្រីមានសមត្ថកិច្ច។ ក្នុងករណីអាជ្ញាធរមានសមត្ថកិច្ចរកឃើញថា អ្នកដំណើរនោះមានហានិភ័យខ្ពស់ អ្នកដំណើរត្រូវតែសហការតាមការរៀបចំទីតាំងធ្វើចត្តាឡីស័ករបស់អាជ្ញាធរមានសមត្ថកិច្ច។
ដោយឡែក ចំពោះសេវាកក់សណ្ឋាគារដែលមិនអាចប្រើប្រាស់បាន នោះប្រាក់កក់សណ្ឋាគារនឹងធ្វើការបង្វិលជូនភ្ញៀវវិញ។ ក្នុងករណីនេះ អ្នកដំណើរត្រូវតម្កល់ប្រាក់ចំនួន ២ ពាន់ដុល្លារអាមេរិក ដូចអ្នកដំណើរធម្មតាដែរ។ សណ្ឋាគារដែលទទួលការកក់ត្រូវរៀបចំមធ្យោបាយដឹកជញ្ជូនអ្នកដំណើរពីអាកាសយានដ្ឋាន អន្តរជាតិភ្នំពេញ ទៅកាន់ទីតាំងរបស់ខ្លួន ដោយត្រូវគោរពតាមវិធានសុខាភិបាលដែលនៅជាធរមាន។ អ្នកប្រើប្រាស់សេវាកម្មនេះ ត្រូវអនុវត្តឱ្យត្រឹមត្រូវតាមវិធានសុខាភិបាលដែលនៅជាធរមានក្នុងអំឡុងពេលធ្វើចត្តាឡីស័ក។
ក្រោយពេលអ្នកដំណើរបញ្ចប់ចត្តាឡីស័ក សណ្ឋាគារសុខាភ្នំពេញ និងរ៉េស៊ីដង់ និងសណ្ឋាគារ ខថយ៉ាដម៉ារីយ័តភ្នំពេញ ត្រូវទូទាត់ចំណាយរបស់រដ្ឋពាក់ព័ន្ធការអនុវត្តវិធានការសុខាភិបាល អំឡុងពេលធ្វើចត្តាឡីស័ក ស្របតាមខ្លឹមសារនៃលិខិតលេខ ៤៨៩៨ សហវ ចុះថ្ងៃទី ៨ ខែមិថុនា ឆ្នាំ ២០២០។
ចំពោះអ្នកដំណើរដែលមិនប្រើប្រាស់សេវាកក់សណ្ឋាគារទាំង ២ នេះទេ នឹងត្រូវអនុវត្តនីតិវិធីដែលមានស្រាប់ជាធរមាន ដោយត្រូវតម្កល់ប្រាក់ចំនួន ២ ពាន់ដុល្លារអាមេរិក សម្រាប់ធានាចំណាយក្នុងដំណើរការធ្វើចត្តាឡីស័ក និងត្រូវធ្វើតាមទីតាំងដែលកំណត់ដោយអាជ្ញាធរមានសមត្ថកិច្ច។
នៅពេលមកដល់អាកាសយានដ្ឋានអន្តរជាតិភ្នំពេញក្នុងករណីអាជ្ញាធរមានសមត្ថកិច្ចរកឃើញ ឬសង្ស័យថា អ្នកដំណើរមកពីតំបន់មានហានិភ័យមេរោគបំប្លែងខ្លួនថ្មី Delta អ្នកដំណើរមិនត្រូវបានអនុញ្ញាតឱ្យទៅស្នាក់នៅសណ្ឋាគារដែលបានកក់នោះទេ។
ក្រសួងបានបញ្ជាក់ថា៖ «គាត់ត្រូវដាក់តម្កល់លុយចំនួន ២ ពាន់ដុល្លារអាមេរិក ហើយត្រូវទៅធ្វើចត្តាឡីស័កនៅទីតាំងដែលបានរៀបចំដោយអាជ្ញាធរ និងត្រូវបំពេញនីតិវិធីដូចអ្នកដំណើរដទៃទៀតដែរ។ ចំពោះលុយកក់ សណ្ឋាគារនឹងបង្វិលជូនវិញ»។
ក្នុងករណីដែលអ្នកដំណើរមិនមានពាក់ព័ន្ធតំបន់មានហានិភ័យមេរោគបំប្លែងខ្លួនថ្មី Delta ពេលមកដល់អាកាសយានដ្ឋានអន្តរជាតិភ្នំពេញ អ្នកដំណើរត្រូវឆ្លងកាត់ការវាស់កម្ដៅ និងបង្ហាញឯកសារពាក់ព័ន្ធដល់មន្ត្រីមានសមត្ថកិច្ចដូចអ្នកដំណើរធម្មតាដែរ ប៉ុន្តែមិនចាំបាច់ដាក់ប្រាក់តម្កល់ចំនួន ២ ពាន់ដុល្លារអាមេរិកសម្រាប់ធានាចំណាយការធ្វើចត្តាឡីស័កនៅបញ្ជរធនាគារក្នុងអាកាសយានដ្ឋានអន្តរជាតិភ្នំពេញ៕