ភ្នំពេញៈ រដ្ឋមន្ត្រីក្រសួងសុខាភិបាលលោក ម៉ម ប៊ុនហេង បានណែនាំទៅដល់អភិបាលរាជធានី-ខេត្តទូទាំងប្រទេសត្រូវអនុវត្តយុទ្ធនាការអប់រំផ្សព្វផ្សាយ និងបណ្តុះបណ្តាលពលរដ្ឋឲ្យយល់ដឹងអំពីគ្រោះថ្នាក់នៃវីរុសកូវីដ ១៩ ព្រមទាំងផ្លាស់ប្តូរឥរិយាបថ ដើម្បីរៀនរស់នៅជាបណ្តើរៗជាមួយនឹងវីរុសកូវីដ ១៩ តាមគន្លងប្រក្រតីភាពថ្មីឲ្យបានត្រឹមត្រូវ។
យោងតាមលិខិតដែលលោក ម៉ម ប៊ុនហេង ចេញនៅព្រឹកថ្ងៃទី ២៦ ខែកក្កដានេះបានឱ្យដឹងថា ស្ថានភាពរាតត្បាតនៃជំងឺកូវីដ ១៩ កំពុងឈានទៅរកការឆ្លងរីករាលដាលទ្រង់ទ្រាយធំនៅក្នុងសហគមន៍ដែលនឹងបង្កជាមហន្តរាយធំដល់ប្រព័ន្ធសុខាភិបាលធ្វើឲ្យបាត់បង់អាយុជីវិតប្រជាជន រួមទាំងផលវិបាកសង្គម និងសេដ្ឋកិច្ចធ្ងន់ធ្ងរ។
លោកបានបន្តថា ការមកដល់នៃវីរុសបំប្លែងថ្មីប្រភេទដែលតា (Delta) ដែលមានសមត្ថភាពឆ្លងរីករាលដាលលឿនជាងមុននិងធ្ងន់ធ្ងរជាងមុនដែលទាមទារឲ្យមានការប្រឹងប្រែងខ្លាំងបំផុតក្នុងដំណាក់កាលនេះ ដើម្បីកាត់ផ្តាច់ខ្សែចម្លង និងទប់ស្កាត់ការធ្លាយចូលក្នុងសហគមន៍នូវវីរុសកូវីដ ១៩ ប្រភេទថ្មីនេះ។
លោកបានលើកឡើងថា៖ «ដូច្នេះខ្ញុំសូមឯកឧត្តម លោកជំទាវ អភិបាលនៃគណៈអភិបាលរាជធានី-ខេត្តទាំងអស់ យកចិត្តទុកដាក់ខ្ពស់ បើកយុទ្ធនាការអប់រំផ្សព្វផ្សាយតាមគ្រប់រូបភាពក្នុងគ្រប់ទីតាំងនិងឲ្យបានឆាប់បំផុត»។
លោករដ្ឋមន្ត្រីបានបញ្ជាក់ថា ត្រូវជំរុញការអប់រំផ្សព្វផ្សាយឲ្យបានទូលំទូលាយក្នុងសហគមន៍នូវសារអប់រំសុខភាពរបស់ក្រសួងសុខាភិបាលដែលមានផ្តល់ជូននៅក្នុងយូធូបរបស់ក្រសួងសុខាភិបាល និងតាមហ្គូហ្គោល តាមរយៈអាជ្ញាធរ ថ្នាក់ក្រោមជាតិ និងដោយមានការចូលរួមពីសហគមន៍ជាដើម៕