ភ្នំពេញៈ រដ្ឋមន្ត្រីក្រសួងសុខាភិបាលណែនាំគ្រប់រាជធានី-ខេត្តទាំង ២៥ ត្រូវបើកយុទ្ធនាការអប់រំ ផ្សព្វផ្សាយ និងបណ្តុះបណ្តាលប្រជាពលរដ្ឋឱ្យយល់ដឹង អំពីគ្រោះថ្នាក់នៃវីរុសកូវីដ ១៩ ដែលនៅតែមានបន្តជាប់ជាប្រចាំ ព្រមទាំងផ្លាស់ប្តូរឥរិយាបថ ដើម្បីរៀនរស់នៅជាបណ្តើរៗជាមួយវីរុសកូវីដ ១៩ តាមគន្លងប្រក្រតីភាពថ្មីឱ្យបានត្រឹមត្រូវ។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាល និងជាប្រធានគណៈកម្មការអន្តរក្រសួង ដើម្បីប្រយុទ្ធនឹងជំងឺកូវីដ ១៩ បានចេញសេចក្តីណែនាំស្នើឱ្យអភិបាលរាជធានី-ខេត្តទាំងអស់ត្រូវយកចិត្តទុកដាក់ខ្ពស់បើកយុទ្ធនាការអប់រំផ្សព្វផ្សាយតាមគ្រប់រូបភាពក្នុងគ្រប់ទីតាំង និងឱ្យបានឆាប់បំផុត។
លោកលើកឡើងថា ស្ថានភាពរាតត្បាតនៃជំងឺកូវីដ ១៩ កំពុងឈានទៅរកការឆ្លងរីករាលដាលទ្រង់ទ្រាយធំនៅក្នុងសហគមន៍ ដែលនឹងបង្កជាមហន្តរាយធំដល់ប្រព័ន្ធសុខាភិបាល ធ្វើឱ្យបាត់បង់អាយុជីវិតប្រជាជន រួមទាំងផលវិបាកសង្គម និងសេដ្ឋកិច្ចធ្ងន់ធ្ងរ។
លោករដ្ឋមន្ត្រីថ្លែងថា៖ «ជាពិសេស ការមកដល់នៃវីរុសបំប្លែងថ្មីប្រភេទដែលតា (Delta) ដែលមានសមត្ថភាពឆ្លងរីករាលដាលលឿនជាងមុន និងបង្កជាជំងឺកូវីដ ១៩ ធ្ងន់ធ្ងរជាងមុន ដែលទាមទារឱ្យមានការប្រឹងប្រែងខ្លាំងបំផុតក្នុងដំណាក់កាលនេះ ដើម្បីកាត់ផ្តាច់ខ្សែចម្លងជំងឺកូវីដ-១៩ និងទប់ស្កាត់ការធ្លាយចូលក្នុងសហគមន៍នូវវីរុសកូវីដ ១៩ ប្រភេទដែលតា (Delta)»។
លោកបញ្ជាក់ថា ការបើកយុទ្ធនាការទូទាំងប្រទេស ដើម្បីអប់រំផ្សព្វផ្សាយ និងបណ្តុះបណ្តាលប្រជាពលរដ្ឋឱ្យយល់ដឹងអំពីគ្រោះថ្នាក់នៃវីរុសកូវីដ ១៩ ដែលនៅបន្តមានជាប់ជាប្រចាំ ព្រមទាំងផ្លាស់ប្តូរឥរិយាបថ ដើម្បីរៀនរស់នៅជាបណ្តើរៗជាមួយនឹងវត្តមាននៃវីរុសកូវីដ-១៩ តាមគន្លងប្រក្រតីភាពថ្មីឱ្យបានត្រឹមត្រូវ គឺជាសកម្មភាពយុទ្ធសាស្ត្រដ៏សំខាន់បំផុត។
លោក ម៉ម ប៊ុនហេង ថ្លែងថា៖ «អភិបាលរាជធានីខេត្តទាំងអស់ត្រូវចាត់ចែងរៀបចំបិទតាំងផ្សព្វផ្សាយឱ្យបានឆាប់រហ័សទៅដល់គ្រប់ភូមិគោលដៅ និងបន្តសហការជាមួយដៃគូពាក់ព័ន្ធ សង្គមស៊ីវិលក្នុងរាជធានី-ខេត្ត ទាំងអស់ ដើម្បីបោះពុម្ព ចែកចាយ សម្ភារអប់រំសុខភាពឱ្យបានទូលំទូលាយទូទាំងរាជធានី-ខេត្ត»។
ជាមួយគ្នានេះ លោក ម៉ម ប៊ុនហេង ក៏បានជំរុញឱ្យមានការអប់រំផ្សព្វផ្សាយឱ្យបានទូលំទូលាយក្នុងសហគមន៍នូវសារអប់រំសុខភាពរបស់ក្រសួងសុខាភិបាលតាមប្រព័ន្ធយូធូបរបស់ក្រសួង និងតាមហ្គូហ្គោល តាមរយៈអាជ្ញាធរ ថ្នាក់ក្រោមជាតិ និងដោយមានការចូលរួមពីសហគមន៍ផងដែរ។
លោកថា៖ «ត្រូវធ្វើការផ្សព្វផ្សាយតាមរយៈការផ្សាយតាមឧគ្ឃោសនសព្ទ ការបិទតាំងរូបភាពផ្ទាំងធំ ចែកចាយខិត្តប័ណ្ណ ការផ្សព្វផ្សាយ តាមទូរទស្សន៍ វិទ្យុ និងបណ្តាញសង្គមដល់ប្រជាជន ជាពិសេសដល់សហគមន៍ងាយរងគ្រោះ និងសហគមន៍ក្រីក្រជាដើម។ ការផ្សព្វផ្សាយត្រូវធ្វើឡើងជាប្រចាំក្នុងអំឡុងពេលនេះដើម្បីរំឭកសាធារណជនអំពីហានិភ័យនៃជំងឺនេះដែលអាចនឹងផ្ទុះឡើងទ្រង់ទ្រាយធំគ្រប់ពេលវេលា»។
ទន្ទឹមនឹងនេះ លោករដ្ឋមន្ត្រីក៏បានបញ្ជាឱ្យចាត់វិធានការបិទជាបណ្តោះអាសន្ន នូវទីតាំងអាជីវកម្មណា ដែលមិនគោរពតាមគោលការណ៍ណែនាំរបស់ក្រសួងសុខាភិបាល។ ត្រូវណែនាំនិងចាត់វិធានការតាមដានការអនុវត្តវិធានការសុខាភិបាលនៅសហគមន៍ ការអនុវត្តគម្លាតសុវត្ថិភាពនៅតាមទីសាធារណៈ ហាមឃាត់ ឬកាត់បន្ថយឱ្យបានជាអតិបរមានូវការជួបជុំគ្នា។
លោក គួច ចំរើន អភិបាលខេត្តព្រះសីហនុ នាថ្ងៃទី ២២ កក្កដា បានចាត់ឱ្យមន្ត្រីសាខា អនុសាខានៃកាកបាទក្រហមកម្ពុជាសាខាខេត្តព្រះសីហនុ និងអ្នកស្ម័គ្រចិត្តចុះធ្វើយុទ្ធនាការផ្សព្វផ្សាយពីការកាត់បន្ថយហានិភ័យនៃការឆ្លងជំងឺកូវីដ ១៩ ដើម្បីពង្រឹងការទប់ស្កាត់ការចម្លងមកក្នុងសហគមន៍។ លើកកម្ពស់ការផ្លាស់ប្តូរទម្លាប់អនាម័យពីអវិជ្ជមានទៅវិជ្ជមានក្នុងស្រុកព្រៃនប់ ខេត្តព្រះសីហនុ។
មន្ត្រីចុះធ្វើការផ្សព្វផ្សាយបានប្រើប្រាស់ការចាក់ផ្សាយតាមឧគ្ឃោសនសព្ទ ដើម្បីផ្សព្វផ្សាយដល់ប្រជាពលរដ្ឋក្នុងគោលបំណងចូលរួមបន្តផ្សព្វផ្សាយជូនដល់ប្រជាពលរដ្ឋឱ្យបានទូលំទូលាយស្តីពីវិធានការការពារ និងរក្សាអនាម័យ។ ជាពិសេសអនុវត្តនូវអនុសាសន៍របស់លោកនាយករដ្ឋមន្ត្រី ហ៊ុន សែន ក៏ដូចជាសារអប់រំរបស់ក្រសួងសុខាភិបាល សំដៅចូលរួមប្រយុទ្ធប្រឆាំងទប់ស្កាត់ការរីករាលដាលជំងឺឆ្លងកូវីដ ១៩ ទាំងអស់គ្នា៕