ភ្នំពេញៈ គណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស (គ.វ.ក-១៩) បញ្ចេញផែនការលម្អិតពីការចាក់វ៉ាក់សាំងការពារវីរុសកូវីដ ១៩ សម្រាប់ក្រុម-មនុស្សអាយុពី ១២ ដល់ ១៧ ឆ្នាំ ដែលចាប់ផ្តើមដំបូងគឺ រាជធានីភ្នំពេញនៅថ្ងៃទី ១ ខែសីហា ដែលប្រកាសបើកដោយលោកនាយករដ្ឋមន្ត្រី ហ៊ុន សែន នៅវិមានសន្តិភាព។
ដោយឡែកសម្រាប់ខេត្ត-កណ្តាល ខេត្តព្រះសីហនុ និងខេត្តកោះកុងជាគោលដៅ ដែលត្រូវចាក់វ៉ាក់សាំងបង្ការកូវីដ ១៩ ជាបន្តបន្ទាប់ ក្រោយពីចាក់នៅរាជធានីភ្នំពេញ។ ដំណើរការចាក់សម្រាប់មន្ត្រីរាជការក្រោមឱវាទ និងប្រជាពលរដ្ឋក្នុងខេត្តទាំង ៣ នេះត្រូវរៀបចំដោយរដ្ឋបាល-ខេត្តសាមីនេះដែរ ហើយនឹងត្រូវជូនដំណឹងពីកាលបរិច្ឆេទចាក់វ៉ាក់សាំងនៅពេលក្រោយ។ រីឯនៅបណ្តាខេត្តផ្សេងៗទៀតនឹងត្រូវរៀបចំចាក់ជាបន្តបន្ទាប់ទៀត នៅពេលមានវ៉ាក់សាំង។
សម្រាប់យុទ្ធនាការចាក់នៅរាជធានីភ្នំពេញ ការចាក់វ៉ាក់សាំងសម្រាប់កូនចៅឥស្សរជន ដែលមានតួនាទីជាឧបនាយករដ្ឋមន្ត្រី ឬមានឋានៈស្មើរហូតដល់មន្ត្រីរាជការ និងមន្ត្រីជាប់កិច្ចសន្យា បម្រើការនៅថ្នាក់ជាតិ។ សម្រាប់កូនចៅអ្នកឧកញ៉ា និងកូនចៅរបស់មន្ត្រីការទូត មន្ត្រីអង្គការសហប្រជាជាតិតំណាងហិរញ្ញវត្ថុអន្តរជាតិ អង្គការអន្តរជាតិ អង្គការក្រៅរដ្ឋាភិបាល និងកូនចៅអ្នកសារព័ត៌មាន។ អ្នកទាំងនេះនឹងចាក់នៅទីតាំង ដែលត្រូវបានរៀបចំនៅតាមមន្ទីរពេទ្យធំៗចំនួន ៥ រួមមាន មន្ទីរពេទ្យកាល់ម៉ែត មន្ទីរពេទ្យព្រះអង្គឌួង មន្ទីរពេទ្យកុមារជាតិ មន្ទីរពេទ្យគន្ធបុប្ផា ភ្នំពេញ (វត្តភ្នំ) និងមជ្ឈមណ្ឌលជាតិគាំពារមាតា និងទារក។
លោកស្រី ឱ វណ្ណឌីន អ្នកនាំពាក្យ និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស បានបញ្ជាក់តាមរយៈសេចក្តីជូនដំណឹងកាលពីថ្ងៃទី ២៧ ខែកក្កដា ថា កូនចៅរបស់មន្ត្រីនៃក្រសួងព្រះបរមរាជវាំង ព្រឹទ្ធសភា ក្រុមប្រឹក្សាធម្មនុញ្ញ និងរដ្ឋសភានឹងចាក់នៅថ្ងៃទី ១ ខែសីហា។ ដំណើរការចាក់គ្រប់ស្ថាប័នគឺចាប់ពីម៉ោង ៨ ព្រឹកដល់ម៉ោង ៥ ល្ងាចដូចគ្នា។
សម្រាប់កូនចៅនៃទីស្តីការគណៈរដ្ឋមន្ត្រី តុលាការកំពូលសាលាឧទ្ធរណ៍ភ្នំពេញ និងសាលាដំបូងរាជធានីភ្នំពេញចាក់នៅថ្ងៃទី ២ ខែសីហា។ សម្រាប់កូនចៅនៃក្រសួងមហាផ្ទៃ និងក្រសួងការពារជាតិចាក់នៅថ្ងៃទី ៣ ខែសីហា។ សម្រាប់កូនចៅនៃក្រសួងទំនាក់ទំនងរដ្ឋសភា ព្រឹទ្ធសភា និងអធិការកិច្ច និងក្រសួងការបរទេស និងសហប្រតិបត្តិការអន្តរជាតិចាក់នៅថ្ងៃទី ៤ ខែសីហា។
សេចក្តីប្រកាសបន្តថា សម្រាប់កូនចៅនៃក្រសួងសេដ្ឋកិច្ច និងហិរញ្ញវត្ថុ ក្រុមប្រឹក្សាអភិវឌ្ឍន៍-កម្ពុជា និងក្រសួងរៀបចំដែនដី នគរូបនីយកម្ម និងសំណង់ចាក់នៅថ្ងៃទី ៥ សីហា។ សម្រាប់កូនចៅនៃគណៈកម្មាធិការជាតិរៀបចំការបោះឆ្នោត និងក្រសួងផែនការចាក់នៅថ្ងៃទី ៦ សីហា។ សម្រាប់កូនចៅនៃក្រសួងសុខាភិបាលចាប់ពីថ្ងៃទី ១ ដល់ទី ៤ ខែសីហា។ រីឯកូនចៅនៃធនាគារជាតិនៃកម្ពុជា និងក្រសួងអភិវឌ្ឍន៍ជនបទចាក់នៅថ្ងៃទី ៧ ខែសីហា។
ប្រភពដដែលបន្តថា សម្រាប់កូនចៅនៃអាជ្ញាធរសវនកម្មជាតិ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្រសួងសាធារណការ និងដឹកជញ្ជូន និងក្រសួងបរិស្ថានចាក់នៅថ្ងៃទី ៨ ខែសីហា ខណៈកូនចៅនៃក្រសួងអប់រំ យុវជន និងកីឡាចាក់នៅថ្ងៃទី ៩ សីហា។ ចំណែកកូនចៅនៃអង្គភាពប្រឆាំងអំពើពុករលួយ ក្រសួងកិច្ចការនារី ក្រសួងកសិកម្ម រុក្ខាប្រមាញ់ និងនេសាទ និងក្រសួងពាណិជ្ជកម្មចាក់នៅថ្ងៃទី ១០ ខែសីហា។
សម្រាប់កូនចៅនៃក្រសួងមុខងារសាធារណៈសាលាភូមិន្ទរដ្ឋបាល ក្រសួងទេសចរណ៍ និងក្រសួងព័ត៌មាននឹងត្រូវចាក់នៅថ្ងៃទី ១១ ខែសីហា។ ចំណែកនៅថ្ងៃទី ១២ ខែសីហា សម្រាប់កូនចៅនៃក្រសួងធម្មការ និងសាសនា ក្រសួងវប្បធម៌ និងវិចិត្រសិល្បៈ ក្រសួងសង្គមកិច្ច អតីតយុទ្ធជន និងយុវនិតិសម្បទា និងក្រសួងធនធានទឹក និងឧតុនិយម។
បើតាមសេចក្តីប្រកាសនេះសម្រាប់កូនចៅនៃក្រសួងរ៉ែ និងថាមពល អគ្គិសនីកម្ពុជា អាជ្ញាធរ ប្រេងកាត ក្រសួងប្រៃសណីយ៍ និងទូរគមនាគមន៍ និងអាកាសចរណ៍ស៊ីវិលចាក់នៅថ្ងៃទី ១៣ ខែសីហា ហើយសម្រាប់កូនចៅនៃអាជ្ញាធរផ្សេងៗទៀតត្រូវចាក់នៅថ្ងៃទី ១៤ ខែសីហា។
គ.វ.ក-១៩ បញ្ជាក់ផងដែរថា សម្រាប់មន្ទីរពេទ្យកាល់ម៉ែត គឺជាទីកន្លែងសម្រាប់ ចាក់វ៉ាក់សាំងបង្ការកូវីដ ១៩ ជូនកូនចៅរបស់ឥស្សរជនដែលមានតួនាទីជាឧបនាយករដ្ឋមន្ត្រី ទេសរដ្ឋមន្ត្រី រដ្ឋមន្ត្រី រដ្ឋលេខាធិការ ឬមានឋានៈស្មើ។ ចំណែកនៅមន្ទីរពេទ្យព្រះអង្គឌួង ជាកន្លែងសម្រាប់ចាក់វ៉ាក់សាំងជូនកូនចៅ ឥស្សរជនដែលជាអនុរដ្ឋលេខាធិការ អគ្គនាយក អគ្គនាយករង ឬមានឋានៈស្មើ។
រីឯមន្ទីរពេទ្យគន្ធបុប្ផាភ្នំពេញ និងមជ្ឈមណ្ឌលជាតិគាំពារមាតា និងទារក សម្រាប់ចាក់ដល់កូនចៅឥស្សរជនដែលមានតួនាទីជាប្រធាននាយកដ្ឋាន អនុប្រធាននាយកដ្ឋាន ប្រធានការិយាល័យ អនុប្រធានការិយាល័យ បុគ្គលិកក្របខ័ណ្ឌ និងមន្ត្រីជាប់កិច្ចសន្យា។ មន្ទីរពេទ្យកុមារជាតិ ជាកន្លែងសម្រាប់ចាក់ជូនកូនចៅរបស់មន្ត្រីរាជការដែលបម្រើការនៅទីស្តីការក្រសួងសុខាភិបាលទាំងអស់ចាប់ពីប្រធាននាយកដ្ឋានចុះ និងមន្ត្រីជាប់កិច្ចសន្យា។
ជាមួយគ្នានេះ សម្រាប់កូនចៅអ្នកឧកញ៉ា លោកឧកញ៉ា និងឧកញ៉ា ចាក់នៅថ្ងៃទី ១៥ និង ១៦ ខែសីហា នៅមន្ទីរពេទ្យកាល់ម៉ែត។ សម្រាប់កូនចៅរបស់មន្ត្រីការទូត មន្ត្រីអង្គការសហប្រជាជាតិ តំណាងហិរញ្ញវត្ថុអន្តរជាតិ អង្គការអន្តរជាតិ និងអង្គការក្រៅរដ្ឋាភិបាលអន្តរជាតិចាក់នៅថ្ងៃទី ១៧ ដល់ ១៨ នៅមន្ទីរពេទ្យកាល់ម៉ែត។ ចំណែកកូនចៅអ្នកសារព័ត៌មានវិញ គឺចាក់ពីថ្ងៃទី ៥ ដល់ ៦ ខែសីហា នៅមន្ទីរពេទ្យកុមារជាតិ។
លោកស្រី ឱ វណ្ណឌីន បញ្ជាក់ថា៖ «សម្រាប់កូនចៅមន្ត្រីក្រោមឱវាទរដ្ឋបាលរាជធានីភ្នំពេញ និងកូនចៅរបស់ប្រជាពលរដ្ឋទាំងអស់ដែលរស់នៅរាជធានី-ភ្នំពេញ ទៅចាក់វ៉ាក់សាំងនៅទីតាំងទាំង ៤២ ទីតាំងក្នុងខណ្ឌទាំង ១៤ ដែលរៀបចំចាត់ចែងដោយរដ្ឋបាលរាជធានីភ្នំពេញទាំងដូសទី ១ និងទី ២»។
លោកស្រីបន្ថែមថា ការចាក់វ៉ាក់សាំងដូសទី ២ ដល់មនុស្សអាយុ ១២ ដល់ក្រោម ១៨ ឆ្នាំត្រូវមានគម្លាត ២១ ថ្ងៃ ដូចនេះអ្នកដែលបានចាក់ដូសទី ១ រួចហើយ ត្រូវចាក់ដូសទី ២ នៅទីតាំងដែលបានចាក់ដូសទី ១។
សេចក្តីប្រកាសបន្ថែមថាសម្រាប់កូនចៅនៃក្រសួងការងារ និងបណ្តុះបណ្តាលវិជ្ជាជីៈ ចាក់នៅថ្ងៃទី ៧ និង ៨ សីហា ចំណែកខាងក្រសួងយុត្តិធម៌ចាក់នៅថ្ងៃទី ៩ និងទី ១០ ខែសីហា នៅមន្ទីរពេទ្យកុមារជាតិដូចគ្នា។
លោកស្រី ឱ វណ្ណឌីន ឱ្យដឹងថា អ្នកដែលមានអាយុពី ១២ ដល់ ១៥ ឆ្នាំត្រូវមានសំបុត្រកំណើត ឬសៀវភៅស្នាក់នៅ ឬសៀវភៅគ្រួសារ ឬលិខិតឆ្លងដែរ។ អ្នកដែលមានអាយុពី ១៥ ដល់ក្រោម ១៨ ឆ្នាំត្រូវយកសំបុត្រកំណើត ឬអត្តសញ្ញាណប័ណ្ណសញ្ជាតិខ្មែរ ឬសៀវភៅស្នាក់នៅ ឬសៀវភៅគ្រួសារ ឬលិខិតឆ្លងដែន។
លោកស្រីថា ការចាក់វ៉ាក់សាំងកូវីដ ១៩ ត្រូវមានលិខិតព្រមព្រៀងអនុញ្ញាតឱ្យចាក់វ៉ាក់សាំងដោយមានលាយលក្ខណ៍អក្សរពីសំណាក់ឪពុកម្តាយ អាណាព្យាបាល អ្នកគ្រប់គ្រង ចំពោះកុមារកំព្រាដែលរស់នៅតាមមណ្ឌល និងអាជ្ញាធរមូលដ្ឋានក្នុងករណីក្មេងកំព្រាដែលពុំមានអាណាព្យាបាល ឬមិនមានទីតាំងស្នាក់នៅពិតប្រាកដ៕
រាជធានីភ្នំពេញទាំងដូសទី ១ និងទី ២»។
លោកស្រីបន្ថែមថា ការចាក់វ៉ាក់សាំងដូសទី ២ ដល់មនុស្សអាយុ ១២ ដល់ក្រោម ១៨ ឆ្នាំនេះ ត្រូវមានគម្លាត ២១ ថ្ងៃ ដូចនេះអ្នកដែលបានចាក់ដូសទី ១ រួចហើយ ត្រូវចាក់ដូសទី ២ នៅទីតាំងដែលបានចាក់ដូសទី ១៕