ភ្នំពេញ៖ វ៉ាក់សាំងបង្ការជំងឺកូវីដ ១៩ ប្រភេទ Johnson & Johnson ដែលជាជំនួយរបស់សហរដ្ឋអាមេរិកប្រមាណពាក់កណ្តាលនៃចំនួន ១ លានដូស ត្រូវបានដឹកមកដល់កម្ពុជា នៅព្រឹកថ្ងៃសុក្រនេះ តាមរយៈយន្តការកូវ៉ាក់នៃអង្គការសុខភាពពិភពលោក ខណៈអាមេរិករំពឹងថា ជំនួយនេះ នឹងចូលរួមជួយកម្ពុជាក្នុងការប្រយុទ្ធប្រឆាំងជំងឺកូវីដ ១៩។
លោក Benjamin Wohlauer ភារធារីស្ថានទូតអាមេរិកប្រចាំកម្ពុជា បានថ្លែងក្នុងពិធីប្រគល់ និងទទួលវ៉ាក់សាំង នៅព្រលានយន្តហោះអន្តរជាតិភ្នំពេញថា វ៉ាក់សាំងបង្ការជំងឺកូវីដ ១៩ ប្រភេទ Johnson & Johnson នេះ គឺជាអំណោយរបស់ប្រជាជនអាមេរិកតាមរយៈយន្តការកូវ៉ាក់ ដែលនឹងការពារប្រជាជនកម្ពុជាជាង ១ លាននាក់។
លោកបន្តថា ជាមួយនឹងការចូលរួមនេះ សហរដ្ឋអាមេរិកបញ្ជាក់ជាថ្មីជាមួយនឹងការចូលរួមយូរអង្វែងចំពោះសុខភាពសាធារណៈកម្ពុជា ខណៈលោកអះអាងថា ការប្តេជ្ញាចិត្តនេះ គឺកាន់តែមានភាពច្បាស់លាស់បន្ថែម នៅពេលមានជំងឺរាតត្បាតទូទាំងពិភពលោកនេះ។
លោកបានអះអាងថា៖ «វ៉ាក់សាំងដែលសហរដ្ឋអាមេរិកផ្តល់ជូននេះ គឺមិនមានការភ្ជាប់នូវលក្ខខណ្ឌណាមួយ។ យើងចែករំលែកនូវវ៉ាក់សាំងទាំងនេះ គឺដើម្បីជួយសង្រ្គោះជីវិត និងដឹកនាំកិច្ចខិតខំប្រឹងប្រែងជាសកល ដើម្បីបញ្ចប់ជំងឺកូវីដ ១៩»។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាលបានថ្លែងថា ចំនួនវ៉ាក់សាំងមកដល់ថ្ងៃនេះ គឺមានចំនួន ៤៥៥ ០០០ ដូស ដែលជាចំនួនមកដល់ដំបូងនៃចំនួនវ៉ាក់សាំងជាង ១ លានដូសរបស់សហរដ្ឋមេរិក ខណៈវ៉ាក់សាំងនៅសេសសល់ នឹងមកដល់នៅដើមខែសីហា ខាងមុខនេះ។
លោក ម៉ម ប៊ុន ហេង បាននិយាយថា ជាមួយនឹងជំនួយជាបន្តបន្ទាប់នេះ ប្រទេសកម្ពុជា ត្រូវបានរំពឹងថា នឹងទទួលបានវ៉ាក់សាំងប្រមាណ ២០ ភាគរយនៃចំនួនប្រជាជនសរុប ឬស្មើ ៧ លានដូស ដែលជាជំនួយរបស់មជ្ឈមណ្ឌលកូវ៉ាក់ ហើយនឹងមកដល់ជាបន្តបន្ទាប់នៅក្នុងឆ្នាំ ២០២១ នេះ។
ប្រទេសកម្ពុជា នាពេលកន្លងមក គឺទទួលបានវ៉ាក់សាំងជាច្រើនសម្រាប់ចាក់ជូនប្រជាពលរដ្ឋខ្មែរដោយឥតគិតថ្លៃ ហើយតាមផែនការរបស់រាជរដ្ឋាភិបាលកម្ពុជាត្រូវចាក់វ៉ាក់សាំងទៅដល់ប្រជាជនកម្ពុជាឱ្យបាន ១០ លាននាក់ត្រឹមបំណាច់ខែតុលា ឬដើមខែវិច្ឆិកាខាងមុខ។ បច្ចុប្បន្នប្រជាជនកម្ពុជាជាង ៧ លាននាក់ហើយ ត្រូវបានប្រកាសថា បានទទួលចាក់វ៉ាក់សាំងការពារជំងឺកូវីដ ១៩ នេះ៕
វីដេអូ៖