ភ្នំពេញៈលោកនាយករដ្ឋមន្ត្រី ហ៊ុន សែន សម្រេចបញ្ជូនវ៉ាក់សាំងបង្ការជំងឺកូវីដ ១៩ ប្រភេទ Johnson & Johnson ជាជំនួយរបស់សហរដ្ឋអាមេរិកដែលទើបទទួលបានថ្មីៗនេះ ទៅតាមបណ្តាខេត្តដែលមានសហគមន៍ជនជាតិដើមភាគតិចសម្រាប់ចាក់ជូនពលរដ្ឋជនជាតិដើមភាគតិចជាអាទិភាព។
លោកថ្លែងបែបនេះ ជាការឆ្លើយតបនឹងសំណួររបស់អ្នកកាសែត នៅក្នុងសន្និសីទកាសែតនៃការប្រកាសយុទ្ធនាការចាក់វ៉ាក់សាំងកូវីដ ១៩ ជូនក្មេង និងយុវវ័យអាយុចាប់ពី១២ឆ្នាំ ទៅក្រោម ១៨ ឆ្នាំ នៅព្រឹកថ្ងៃទី ១ សីហា នៅវិមានសន្តិភាព ដោយលោកថា ការផ្តល់ជូនវ៉ាក់សាំងប្រភេទ Johnson & Johnson នេះ ដោយមើលឃើញពីភាពងាយស្រួលដល់ប្រជាពលរដ្ឋ និងក្រុមគ្រូពេទ្យ ដែលនឹងត្រូវចំណាយពេលតែ ១ ដង សម្រាប់ផ្តល់ជូនការចាក់វ៉ាក់សាំងនេះ។
លោកបានបញ្ជាក់យ៉ាងដូច្នេះថា៖«នោះគឺបញ្ជូនយកទៅចាក់នៅតំបន់ជនជាតិដើមភាគតិចដោយសារអ្វី?កន្លងទៅ ដោយសារតែ Johnson & Johnson មកយឺត។ ខ្ញុំចង់ឲ្យជនជាតិដើមភាគតិច នៅតំបន់ជនជាតិដើមភាគតិច នៅស្ទឹងត្រឺង រតនគិរី នៅព្រះវិហារ និងតំបន់ជនជាតិភាគតិចដទៃទៀត បានទទួល Johnson & Johnson នេះ»។
លោកបានបន្ថែមថា៖«Johnson & Johnson ចាក់តែ ១ ដូសទេ អ៊ីចឹងកុំឲ្យពេទ្យយើងទៅយូរ ដោយសម្រួលឲ្យខាងពេទ្យយើងម្ខាង សម្រួលឲ្យប្រជាពលរដ្ឋជនជាតិដើមភាគតិចបានម្ខាង។ ប៉ុន្តែប្រហែលជាយើងមិនអាចរកមនុស្ស ១ លាននាក់ មកចាក់ Johnson & Johnson អស់ទេ»។
យ៉ាងណាក្ដី លោកអះអាងថា ក្នុងករណីដែល Johnson & Johnsonនេះ នៅសល់ពីការចាក់ជូនជនជាតិដើមភាគតិច ប្រភេទវ៉ាក់សាំងនេះ ក៏នឹងរក្សាទុកសម្រាប់ផ្តល់ជូនប្រជាពលករខ្មែរ ដែលទើបត្រឡប់មកពីក្រៅប្រទេសវិញ ជាពិសេសនោះ គឺពលករមកពីប្រទេសថៃ។
កាលពីថ្ងៃទី ៣០ កក្កដា វ៉ាក់សាំងបង្ការជំងឺកូវីដ ១៩ ប្រភេទ Johnson & Johnson ចំនួន ៤៥៥ ០០០ ដូស បានមកដល់កម្ពុជា ខណៈវ៉ាក់សាំងដែលសេសសល់ទៀត គឺនឹងត្រូវមកដល់ នៅថ្ងៃទី ២ សីហា ដែលលោកនាយករដ្ឋមន្ត្រី ហ៊ុន សែន បានអះអាងថា ក្នុងករណីដែលមានការខកខានមកដល់នៃវ៉ាក់សាំង Johnson & Johnson របស់សហរដ្ឋអាមេរិកនេះ រដ្ឋាភិបាល នឹងប្រើប្រាស់វ៉ាក់សាំងប្រភេទផ្សេងសម្រាប់ចាក់ជូនពលរដ្ឋជនជាតិដើមភាគតិច ដោយមិនអាចពន្យារពេលបាននោះទេ៕