ភ្នំពេញៈ វ៉ាក់សាំងប្រឆាំងកូវីដ ១៩ Johnson & Johnson ជាជំនួយរបស់សហរដ្ឋអាមេរិក តាមរយៈយន្តការកូវ៉ាក់ (COVAX) ជំហានទី ២ ចំនួន ៦០៩ ៦០០ ដូសទៀត បានដឹកមកដល់កម្ពុជាកាលពីយប់រំលងអធ្រាត្រឈានចូលថ្ងៃទី ២ ខែសីហា នាំឱ្យវ៉ាក់សាំងដែលអាមេរិកធ្លាប់សន្យាផ្ដល់ឱ្យកម្ពុជាជាង ១ លានដូសបានមកដល់គ្រប់ចំនួន។
លោកស្រី យក់ សម្បត្តិ រដ្ឋលេខាធិការ ក្រសួងសុខាភិបាលបានធ្វើជាអធិបតីទទួលយកវ៉ាក់សាំង Johnson & Johnson ដែលជាជំនួយរបស់អាមេរិក មកដល់ជើងទី ២ កាលពីយប់ឈានចូលថ្ងៃទី ២ ខែសីហានៅអាកាសយានដ្ឋានអន្តរជាតិភ្នំពេញ។
តាមរយៈហ្វេសប៊ុកលោកនាយករដ្ឋមន្ត្រី ហ៊ុន សែន បានលើកឡើងថា វ៉ាក់សាំងកូវីដ ១៩ Johnson & Johnson ដែលជាជំនួយរបស់រដ្ឋាភិបាល និងប្រជាពលរដ្ឋអាមេរិកចំនួន ៦០៩ ៦០០ ដូសបន្ថែមទៀត តាមរយៈមជ្ឈមណ្ឌលកូវ៉ាក់បានដឹកមកដល់កម្ពុជាហើយនៅម៉ោង ០០:៤០ នាទីរំលងអធ្រាត្រឈានចូលថ្ងៃទី ២ ខែសីហា ឆ្នាំ ២០២១ ដែលចំនួននេះជាជំហានទី ២ នៃជំនួយវ៉ាក់សាំងសរុបជាង ១ លានដូសដល់កម្ពុជា។
លោកបញ្ជាក់ថា៖ «តាមរយៈមជ្ឈមណ្ឌលកូវ៉ាក់ សហរដ្ឋអាមេរិកបានប្រកាសផ្តល់វ៉ាក់សាំងចំនួន ១ ០៦០ ១០០ ដល់រាជរដ្ឋាភិបាល និងប្រជាពលរដ្ឋកម្ពុជា ដោយជំនួយលើកទី ១ ទទួលបានរួចហើយចំនួន ៤៥០ ៥០០ ដូស និងលើកទី ២ នេះចំនួន ៦០៩ ៦០០ ដូស»។
លោកនាយករដ្ឋមន្ដ្រីបញ្ជាក់ថា៖ «អំណោយនេះ គឺជាផ្នែកមួយនៃការគាំទ្រជាបន្តបន្ទាប់របស់សហរដ្ឋអាមេរិក ចំពោះប្រជាពលរដ្ឋកម្ពុជា និងនៅក្នុងតំបន់ក្នុងពេលកំពុងតែប្រឹងងើបចេញពីជំងឺរាតត្បាតយ៉ាងធ្ងន់ធ្ងរនេះ»។
យោងតាមសេចក្តីប្រកាសព័ត៌មានរបស់ស្ថានទូតសហរដ្ឋអាមេរិកប្រចាំនៅកម្ពុជា កាលពីថ្ងៃទី ៣០ ខែកក្កដា ពេលដែលវ៉ាក់សាំងប្រឆាំងកូវីដ Johnson & Johnson មកដល់ជំហានដំបូងបានបញ្ជាក់ថា សហរដ្ឋអាមេរិកបញ្ជាក់ជាថ្មីនូវការប្តេជ្ញាចិត្តជាយូរអង្វែងរបស់ខ្លួនចំពោះសុខភាពសាធារណៈនៃប្រជាជនកម្ពុជាដែលស្តែងឱ្យឃើញច្បាស់បំផុត នៅក្នុងអំឡុងពេលនៃវិបត្តិកូវីដ ១៩ នេះ។
សេចក្ដីប្រកាសបញ្ជាក់ថា៖ «វ៉ាក់សាំងទាំងនេះ ដែលនឹងការពារប្រជាជនកម្ពុជាចំនួនជាង ១ លាននាក់នោះ គឺជាផ្នែកមួយនៃការសន្យារបស់លោកប្រធានាធិបតី Biden ក្នុងការធ្វើការចែកចាយវ៉ាក់សាំងចំនួន ៨០ លានដូសនៅក្នុងសកលលោក»។
លោកឯកអគ្គរដ្ឋទូត សហរដ្ឋអាមេរិកប្រចាំកម្ពុជា W. Patrick Murphy បានថ្លែងថាវិធីការពារដ៏ល្អបំផុតប្រឆាំងនឹងជំងឺកូវីដ ១៩ គឺការចាក់វ៉ាក់សាំង ដែលមានប្រសិទ្ធភាព និងប្រកបដោយគុណភាពខ្ពស់។
លោកបញ្ជាក់ថា៖ «យើងមានមោទនភាពក្នុងការជួយប្រជាជនកម្ពុជាឱ្យមានសុខភាពល្អ និងមានសេដ្ឋកិច្ចល្អទៅអនាគតតាមរយៈជំនួយវ៉ាក់សាំងទាំងនេះ ដែលបន្ថែមពីលើជំនួយជាបច្ចេកទេស សម្ភារសុខភាពសាធារណៈ និងជំនួយសេដ្ឋកិច្ចដែលសហរដ្ឋអាមេរិកបានផ្តល់ជូនដល់ព្រះរាជាណាចក្រកម្ពុជាក្នុងពេលនៃការរីករាលដាលជំងឺនេះ»។
លោក ហ៊ុន សែន បានថ្លែងកាលពីពេលប្រកាសបើកយុទ្ធនាការចាក់វ៉ាក់សាំងកូវីដ ១៩ ជូនកុមារ និងយុវវ័យអាយុចាប់ពី ១២ ឆ្នាំទៅក្រោម ១៨ ឆ្នាំ នៅព្រឹកថ្ងៃទី ១ សីហានៅវិមានសន្តិភាពដោយសម្រេចបញ្ជូនវ៉ាក់សាំងបង្ការជំងឺ កូវីដ ១៩ ប្រភេទ Johnson& Johnson ជាជំនួយរបស់សហរដ្ឋអាមេរិក ដែលទើបទទួលបានថ្មីៗនេះផ្ដល់ដល់បណ្តាខេត្ត ដែលមានសហគមន៍ជនជាតិដើមភាគតិច សម្រាប់ចាក់ជូនពលរដ្ឋជនជាតិដើមភាគតិច ជាអាទិភាព និងពលករត្រឡប់មកពីប្រទេសថៃដែលមិនទាន់ទទួលបានវ៉ាក់សាំង។
លោកបានបញ្ជាក់យ៉ាងដូច្នេះថា៖ «បញ្ជូនយកទៅចាក់នៅតំបន់ជនជាតិដើមភាគតិចដោយសារអ្វី? កន្លងទៅដោយសារតែ Johnson & Johnson មកយឺត។ ខ្ញុំចង់ឱ្យជនជាតិដើមភាគតិច នៅតំបន់ជនជាតិដើមភាគតិច នៅស្ទឹងត្រែង រតនគិរី នៅព្រះវិហារ និងតំបន់ជនជាតិភាគតិចដទៃទៀតបានទទួល Johnson & Johnson នេះ»។
បើតាមការបញ្ជាក់របស់លោកនាយករដ្ឋមន្ដ្រី នៅក្នុងខែសីហានេះ កម្ពុជានឹងទទួលបានវ៉ាក់សាំងបង្ការជំងឺកូវីដ ១៩ ចំនួន ៧,៦ លានដូសបន្ថែមទៀតដែលនាំឱ្យគិតមកត្រឹមខែសីហានេះ កម្ពុជានឹងទទួលបានវ៉ាក់សាំងសរុបប្រមាណ ២៦,៥ លានដូស។
បើតាមលោកនាយករដ្ឋមន្ដ្រី កម្ពុជានឹងមានវ៉ាក់សាំងការពារជំងឺកូវីដ ១៩ សរុបចំនួនជាង ៣៥ លានដូសដោយក្នុងនោះមានទាំងការបញ្ជាទិញ និងជំនួយពីប្រទេសជាមិត្ត និងជំនួយពីកូវ៉ាក់របស់អង្គការសុខភាពពិភពលោក។
តាមផែនការកម្ពុជានឹងចាក់វ៉ាក់សាំងជូនប្រជាពលរដ្ឋអាយុចាប់ពី ១៨ ឆ្នាំឡើងប្រមាណ ១០ លាននាក់ និងចាក់ជូនកុមារ និងយុវវ័យអាយុចាប់ពី ១២ ទៅ ១៧ ឆ្នាំប្រមាណ ២ លាននាក់នៅទូទាំងប្រទេស។
ក្រសួងសុខាភិបាលបានឱ្យដឹងពីម្សិលមិញថា កំណើនអត្រាចាក់វ៉ាក់សាំងកូវីដ ១៩ នៅកម្ពុជា គិតត្រឹមថ្ងៃទី ១ ខែសីហានេះ បានចំនួន ៧៣,៤៨ %ធៀបជាមួយចំនួនប្រជាជនគោលដៅ ១០ លាននាក់ ហើយចំនួនកុមារ-យុវវ័យអាយុពី ១២ ឆ្នាំដល់ ១៨ ឆ្នាំចាក់បានចំនួន ១,៨៧% ធៀបជាមួយនឹងចំនួនគោលដៅប្រមាណ ២ លាននាក់៕