ភ្នំពេញៈ រដ្ឋបាលរាជធានីភ្នំពេញសម្រេចបិទខ្ទប់មិនឱ្យមានការចេញ-ចូលផ្នែកខ្លះនៃខណ្ឌចំនួន ២ ក្រោយរកឃើញវីរុសបំប្លែងខ្លួនថ្មីប្រភេទដែលតា (Delta) ដើម្បីទប់ស្កាត់ការរីករាលដាលនៃជំងឺនេះចូលក្នុងសហគមន៍ ខណៈវីរុសបំប្លែងថ្មីត្រូវបានរកឃើញចំនួន ២២៣ ករណីហើយនៅកម្ពុជា។
តាមសេចក្តីសម្រេចចំនួន ២ ដាច់ដោយឡែកពីគ្នាដែលចុះហត្ថលេខាដោយអភិបាលរាជធានីភ្នំពេញ លោក ឃួង ស្រេង ចុះថ្ងៃទី ២ ខែសីហា បានសម្រេចបិទខ្ទប់មិនឱ្យមានការចេញ-ចូលនូវច្រកផ្លូវលេខ ៣៧២ ៣៧២Z និងផ្លូវលេខ ៣៦២ ស្ថិតក្នុងភូមិ៥ សង្កាត់បឹងសាឡាង ខណ្ឌទួលគោក ដែលមានការឆ្លងមេរោគកូវីដបំប្លែងខ្លួនថ្មី ប្រភេទដែលតា (Delta) ក្នុងរយៈពេល ១៤ ថ្ងៃ គិតចាប់ពីម៉ោងសូន្យ នាថ្ងៃទី ៣ ខែសីហា រហូត ដល់ថ្ងៃទី ១៦ ខែសីហា ឆ្នាំ ២០២១ ដើម្បីទប់ស្កាត់ និងកាត់ផ្ដាច់ការឆ្លងរាលដាលនូវមេរោគបំប្លែងខ្លួនថ្មី នៅក្នុងសហគមន៍។
ដោយឡែកនៅខណ្ឌឫស្សីកែវវិញ រដ្ឋបាលរាជធានីភ្នំពេញ សម្រេចបិទខ្ទប់មិនឱ្យមានការចេញ-ចូលចំពោះកំណាត់ផ្លូវលេខ ៩៣ ពីចំណុចសាលាបឋមសិក្សាពញាក្រែករហូតដល់ចំណុចផ្ទះលេខ ១១៦ រួមទាំងលំនៅឋានក្នុងបុរី ខេស៊ី (KC) ស្ថិតក្នុងក្រុមទី៤ ភូមិផ្សារតូច សង្កាត់ទួលសង្កែទី ១ ខណ្ឌឫស្សីកែវ ដែលមានការសង្ស័យជាប់ពាក់ព័ន្ធមេរោគបំប្លែងខ្លួនថ្មីប្រភេទដែលតា (Delta)។
សេចក្តីសម្រេចបន្តថា «ការបិទខ្ទប់នេះសម្រាប់រយៈពេល ៧ ថ្ងៃគិតចាប់ពីម៉ោងសូន្យ នាថ្ងៃទី ៣ ខែសីហា ដល់ថ្ងៃទី ៩ ខែសីហា ឆ្នាំ ២០២១ រហូតការស្រាវជ្រាវត្រូវបានបិទបញ្ចប់»។ ចំពោះទីតាំងទាំង ២ នេះ រដ្ឋបាលរាជធានីបានបញ្ជាក់ថាក្នុងពេលអនុវត្តវិធានការបិទខ្ចប់នេះត្រូវបានហាមឃាត់រាល់ការចេញ-ចូល និងរាល់ការជួបជុំ ឬការប្រមូលផ្តុំមនុស្ស ក្នុងទីតាំងខាងលើ លើកលែងតែករណីចាំបាច់មួយចំនួនប៉ុណ្ណោះ។ ករណីលើកលែង រួមមាន ការចេញ-ចូល ដោយមូលហេតុសុខភាពបន្ទាន់ ការចេញ-ចូល ដើម្បីផ្ដល់វត្ថុសំណាកធ្វើតេស្ដរកជំងឺកូវីដ ១៩ និងការចេញចូលរបស់ក្រុមគ្រូពេទ្យ និងមន្ត្រីមានសមត្ថកិច្ច។
រដ្ឋបាលរាជធានីភ្នំពេញបានបញ្ជាក់ទៀតថា៖ «បុគ្គល ឬ នីតិបុគ្គលទាំងឡាយណាដែលមិនអនុវត្តតាមសេចក្ដីសម្រេចនេះនឹងត្រូវកសាងសំណុំរឿងបញ្ជូនទៅសា្ថប័នតុលាការ ដើម្បីផ្តន្ទាទោសដាក់ពន្ធនាគារ និងទោសពិន័យជាប្រាក់ស្របតាមមាត្រា ១០ និងមាត្រា ១១ នៃច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត និងលិខិតបទដ្ឋានគតិយុត្ត ពាក់ព័ន្ធជាធរមាន។
លោកស្រី ឱ វណ្ណឌីន រដ្ឋលេខាធិការក្រសួងសុខាភិបាលបានឱ្យដឹងថា ក្នុងរយៈពេល ៥ ខែ កម្ពុជារកឃើញវីរុសបំប្លែងថ្មី Delta ចំនួន ២២៣ ករណីហើយ ក្នុងនោះស្រីចំនួន ១០៧ នាក់។
លោកស្រីបានថ្លែងថា៖ «វីរុសបំប្លែងថ្មី Delta គិតចំនួន ២ ថ្ងៃ គឺថ្ងៃទី ៣១ ខែកក្កដា និងថ្ងៃទី ១ ខែសីហានេះ សរុប ២ ថ្ងៃរកឃើញ ១០៩ ករណីហើយបើសរុបតាំងពីថ្ងៃទី ៣១ ខែមីនាឆ្នាំ ២០២១ រហូតដល់ថ្ងៃទី ១ ខែសីហានេះ ក្នុងរយៈពេលតែ ៥ ខែទេយើងរកឃើញវីរុសបំប្លែងថ្មីរហូតដល់ ២២៣ នាក់»។ លោកស្រីបន្ថែមថា៖ «ស្ថានភាពនៃការឆ្លងរីករាលដាលនៃវីរុសកូវីដ ១៩ ពីមុន គឺពពួកមេរោគបំប្លែងថ្មី Alpha បានវាយលុកនៅកម្ពុជា ក៏ប៉ុន្ដែនៅពេលថ្មីៗនេះមានការវាយលុកពីមេរោគបំប្លែងថ្មី Delta ដែលនៅលើសកលលោក កំពុងមានការព្រួយបារម្ភមែនទែន ដោយសភាពនៃការចម្លងរបស់វាគឺលឿន ហើយនៅកម្ពុជារបស់យើង វីរុស Delta នេះ ក៏កំពុងសកម្មក្នុងការវាយលុកចូលនៅកម្ពុជារបស់យើងដែរ »។
អភិបាលខណ្ឌទួលគោក ឯក ឃុនដឿន ប្រាប់ភ្នំពេញ-ប៉ុស្តិ៍កាលពីម្សិលមិញថា ក្រុមគ្រូពេទ្យបានចុះធ្វើសំណាកពលរដ្ឋជាង ៣០០ នាក់ និងរកឃើញវិជ្ជមានកូវីដ ១៩ ចំនួន ៨ នាក់នៅសង្កាត់បឹងសាឡាង ខណៈរដ្ឋបាលខណ្ឌសម្រេចបិទខ្ទប់ទីតាំងនោះជាបណ្តោះអាសន្ន។
លោកបានបញ្ជាក់ថា៖ «យើងបានសហការជាមួយក្រុមគ្រូពេទ្យស្ម័គ្រចិត្ត TYDA ចុះយកសំណាកកាលពីយប់ថ្ងៃទី ១ ខែសីហា យើងធ្វើតេស្តរហ័សជាង ៣០០ នាក់រកឃើញវិជ្ជមាន ៨ នាក់ បូកជាមួយអ្នកពាក់ព័ន្ធ ២ នាក់ និងអ្នកជំងឺចាស់ ៤ នាក់ សរុបទាំងអស់ ចំនួន ១៤ នាក់ យើងយកគាត់ទៅព្យាបាលហើយ យើងបានបិទភូមិលេខ ៥ នៅសង្កាត់បឹងសាឡាង រង់ចាំការប្រជុំរបស់គណៈកម្មការស្រាវជ្រាវរកកូវីដ»។
លោកបានឱ្យដឹងថា ខណៈពេលនេះ ក្រុមការងារកំពុងបន្តសហការជាមួយក្រុមគ្រូពេទ្យ ដើម្បីស្រាវជ្រាវបន្តរកអ្នកពាក់ព័ន្ធផ្សេងទៀតយកមកធ្វើសំណាក៕
វីដេអូ៖