ភ្នំពេញៈ ក្រសួងបរិស្ថានកាលពីម្សិលមិញនេះបានបន្តអំពាវនាវដល់ពលរដ្ឋឱ្យចូលរួមវេចខ្ចប់សំរាមឱ្យបានត្រឹមត្រូវ និងញែកសំរាមតាមប្រភេទ ចៀសវាងការបោះសំរាមចោលផ្តេសផ្តាសដែលធ្វើឱ្យប៉ះពាល់ដល់សោភណភាព និងផាសុកភាពសង្គម ខណៈក្រសួងបានបំពាក់ឡដុតសំរាមសំណល់រឹងចំនួន ៥០ គ្រឿង ដល់រាជធានី-ខេត្តចំនួន ២១។
លោក នេត្រ ភក្ត្រា អ្នកនាំពាក្យក្រសួងបរិស្ថានបានប្រាប់ភ្នំពេញប៉ុស្ដិ៍ ពីម្សិលមិញថា ក្រសួងបរិស្ថានបន្តគាំទ្រ និងពង្រឹងសមត្ថភាពរដ្ឋបាលថ្នាក់ក្រោមជាតិ ដើម្បីបង្កើនប្រសិទ្ធភាពនៃការគ្រប់គ្រងសំណល់រឹងសំរាម។
លោកបានថ្លែងថា៖ «ដើម្បីពង្រឹងសមត្ថភាពមន្ត្រីមូលដ្ឋានក្នុងការគ្រប់គ្រងសំណល់រឹងសំរាមប្រកបដោយប្រសិទ្ធភាពបន្ថែមទៀត ក្រសួងបរិស្ថានបានបន្តគាំទ្ររដ្ឋបាលមូលដ្ឋានតាមរយៈការបំពាក់សម្ភារ និងបណ្តុះបណ្តាលជំនាញបន្ថែមដើម្បីឆ្ពោះទៅរកការគ្រប់គ្រងសំរាមសំណល់រឹងទីប្រជុំជនប្រកបដោយប្រសិទ្ធភាព និងប្រសិទ្ធផល»។
យោងតាមរបាយការណ៍របស់ក្រសួងបរិស្ថាន រហូតមកទល់ពេលនេះ ក្រសួងបានបំពាក់ឡដុតសំរាមសំណល់រឹងចំនួន ៥០ គ្រឿង ទៅដល់ ២១ រាជធានី-ខេត្ត ស្មើនឹង ៤៩ ក្រុង/ស្រុក។
លោក នេត្រ ភក្ត្រា បានបញ្ជាក់ថា ការបំពាក់ឡដុតសំរាមសំណល់រឹងនេះ ជាវិធានការបន្ទាន់ចំពោះមុខ។ រីឯការគ្រប់គ្រងសំរាមសំណល់រឹង តាមលក្ខណៈបច្ចេកទេសដែលមានធុងដាក់សំរាមត្រឹមត្រូវ មធ្យោបាយដឹកសំរាមគ្រប់គ្រាន់ និងទីលានចាក់សំរាមតាមខ្នាតបច្ចេកទេស ទើបជាវិធានការជាយុទ្ធសាស្ត្រនៃគោលនយោបាយស្តីពីការគ្រប់គ្រងសំរាមសំណល់រឹងទីប្រជុំជន។
របាយការណ៍ដដែលបានឱ្យដឹងថា មកទល់បច្ចុប្បន្ន ក្រសួងបរិស្ថានបានផ្តល់ ទី១ រថយន្តដឹកសំរាមចំនួន ១៧ គ្រឿងដល់ខេត្តចំនួន ៩ ស្មើនឹង ១៥ ក្រុង-ស្រុក។ ទី២ ម៉ូតូកង់ ៣ ដឹកសំរាមចំនួន ១១៨ គ្រឿងជូនខេត្តចំនួន ២១ ស្មើនឹង ៥៤ ក្រុង-ស្រុក។ ទី៣ គ្រឿងចក្រចូកសំរាម «សាស័រ» ចំនួន ២ គ្រឿងផ្ដល់ឱ្យខេត្តព្រះសីហនុ។ទី៤ ធុងសំរាមខ្នាតធំ (ចំណុះ ៥១១ តោន) ចំនួន ៦៨ ធុង ផ្ដល់ឱ្យខេត្តចំនួន ៨។ ទី៥ ធុងញែកសំរាម ចំនួន ៥០០ ធុងផ្ដល់ទៅសួនសាធារណៈ វិមានឈ្នះឈ្នះ បុរីប៉េងហួត និងសាលារៀន។ ទី៦ ធុងចម្រោះទឹកស្អាត ចំនួន ៩១ ធុង ផ្ដល់ឱ្យខេត្តចំនួន ៥ ស្មើនឹង ១៥ ក្រុង-ស្រុក និងសាលារៀន។
ក្រៅពីនោះក្រសួងក៏បានផ្ដល់កញ្ចប់សម្អាតសំរាមក្នុងនោះមាន ធុងចម្រោះទឹកស្អាត ៥០ និងធុងសំរាម ៣០០ ក្នុងក្របខ័ណ្ឌគម្រោងជំរុញបរិយាកាសអំណោយផលដល់ការអភិវឌ្ឍដោយនិរន្តរភាពឱ្យដល់រាជធានី-ខេត្តទាំង ២៥ និងបានបើកវគ្គបណ្តុះបណ្តាលចំនួន ៣ វគ្គដល់រដ្ឋបាលថ្នាក់ក្រោមជាតិក្នុងក្របខ័ណ្ឌកំណែទម្រង់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ។
លោក នេត្រ ភក្ត្រា បានបញ្ជាក់ថា វគ្គបណ្តុះបណ្តាលនេះ ទី ១ ផ្តល់លទ្ធភាពដល់រដ្ឋបាលថ្នាក់ក្រោមជាតិ ដើម្បីធ្វើជាម្ចាស់ក្នុងការគ្រប់គ្រងសំរាមសំណល់រឹងនៅតាមមូលដ្ឋានសាមី។ ទី ២ ពង្រឹងសមត្ថភាពរដ្ឋបាលថ្នាក់ក្រោមជាតិ ដើម្បីគ្រប់គ្រងសំរាមសំណល់រឹងនៅតាមមូលដ្ឋានសាមីឱ្យមានប្រសិទ្ធភាពខ្ពស់ និងទី ៣ លើកកម្ពស់គុណភាពបរិស្ថាន ដើម្បីចូលរួមការអភិវឌ្ឍសេដ្ឋកិច្ច និងសង្គមប្រកបដោយនិរន្តរភាព។
លោកបានបន្តថា ក្រោយមានកិច្ចអន្តរាគមន៍ពីក្រសួងបរិស្ថានឃើញថា រដ្ឋបាលថ្នាក់ក្រោមជាតិចំនួន ៤ បាននិងកំពុងអនុវត្តគោលនយោបាយស្តីពីការគ្រប់គ្រងសំរាមសំណល់រឹងនៅទីប្រជុំជនបានយ៉ាងល្អប្រសើរ រួមមាន ស្រុកបន្ទាយស្រី (ខេត្តសៀមរាប) ក្រុងព្រៃវែង និងស្រុកស្វាយអន្ទរ (ខេត្តព្រៃវែង) និងស្រុកអូររាំងឪ (ខេត្តត្បូងឃ្មុំ)។
ទន្ទឹមនឹងនេះដែរមានក្រុងព្រះសីហនុ និងស្រុកព្រៃនប់ (ខេត្តព្រះសីហនុ) ស្រុកអន្លង់វែង (ខេត្តឧត្តរមានជ័យ) ស្រុកស្នួល (ខេត្តក្រចេះ) និងស្រុកពេជ្រាដា (ខេត្តមណ្ឌលគិរី) កំពុងឈានឆ្ពោះទៅគ្រប់គ្រងសំរាមសំណល់រឹង ប្រកបដោយប្រសិទ្ធភាពនាថ្ងៃអនាគត។
លោក នេត្រ ភក្ត្រា បញ្ជាក់ថា៖ «ក្រសួងបរិស្ថានសូមអំពាវនាវដល់ប្រជាពលរដ្ឋចូលរួមវេចខ្ចប់សំរាមឱ្យបានត្រឹមត្រូវ និងញែកសំរាមតាមប្រភេទចៀសវាងការបោះសំរាមចោលផ្តេសផ្តាសដែលធ្វើឱ្យប៉ះពាល់ដល់សោភណភាព និងផាសុកភាពសង្គម»។
ទាក់ទងនឹងការគ្រប់គ្រងសំរាម និងសំណល់រឹងនេះ អភិបាលស្រុកបន្ទាយស្រី ខេត្ដសៀមរាប លោក ឃឹម ហ្វីណង់ បានប្រើរូបមន្ត «សហគមន៍ស្វ័យគ្រប់គ្រង» ដោយឱ្យពលរដ្ឋម្ចាស់ការក្នុងភូមិព្រះដាក់ដោយជោគជ័យ បន្ទាប់ពីបានអនុវត្ដត្រឹម ៥ ខែ ពីដើមឆ្នាំ ២០២១។
លោកអភិបាលស្រុកបានថ្លែងថា៖ «សហគមន៍នៅក្នុងភូមិ ត្រូវបានផ្តល់ស្វ័យភាពក្នុងការគ្រប់គ្រង និងប្រមូលថ្លៃសេវាប្រមូលសំរាមក្នុងអត្រាទាបសមរម្យ តែស្ថិតក្រោមការត្រួតពិនិត្យពីអាជ្ញាធរមូលដ្ឋានដដែល។ តំណាងសហគមន៍បានប្រមូលថ្លៃសេវាប្រមូលសំរាម សម្រាប់ពលរដ្ឋគ្រួសារធម្មតាក្នុង ១ គ្រួសារ ៤ ពាន់រៀល។ ចំណែកពលរដ្ឋជាអាជីវករ ឬអ្នកលក់ដូរខ្នាតធំថ្លៃសេវាចាប់ពី ១ ម៉ឺនរៀល ទៅ ៣ ម៉ឺនរៀល»។
បើតាមលោក ឃឹម ហ្វីណង់ «សហគមន៍ស្វ័យគ្រប់គ្រង» គឺជាទម្រង់ប្រមូលសំរាមមិនមែនដើម្បីប្រាក់ចំណេញមួយ ដែលរដ្ឋបាលស្រុកបន្ទាយស្រីបានព្យាយាមជំរុញលើកទឹកចិត្ត។ រដ្ឋបាលស្រុកជឿជាក់ថាតាមរយៈរូបមន្តនេះនឹងអាចមានប្រសិទ្ធភាព និងមានការទទួលខុសត្រូវច្បាស់លាស់ប្រកបដោយនិរន្តរភាពយូរអង្វែងជំនួសឱ្យការប្រមូល ដោយក្រុមហ៊ុនឯកជនដែលពិបាកនឹងអនុវត្ត ដោយហេតុថា ការប្រមូលសំរាមតាមជនបទនៅមានទំហំតូចពេក មិនងាយរកក្រុមហ៊ុនមកវិនិយោគបាន៕
វីដេអូ៖