ភ្នំពេញៈ លោកនាយករដ្ឋមន្ត្រី ហ៊ុន សែនស្នើឱ្យចក្រភពអង់គ្លេសផ្តល់វ៉ាក់សាំង AstraZeneca បន្ថែមទៀតមកកម្ពុជា ហើយរំពឹងថា ប្រទេសមួយនេះនឹងជួយសម្របសម្រួលដល់កម្ពុជាក្នុងការបញ្ជាទិញវ៉ាក់សាំងប្រភេទនេះ សម្រាប់ធ្វើជាដូសជំរុញចាក់ជូនប្រជាពលរដ្ឋក្នុងយុទ្ធនាការចាក់ដូសទី ៣។
ការថ្លែងបែបនេះបានធ្វើឡើងនៅថ្ងៃទី ៥ សីហា ក្នុងពិធីប្រគល់ និងទទួលវ៉ាក់សាំងបង្ការជំងឺកូវីដអាស្ត្រាហ្សេនីកាចំនួន ៤១៥ ០០០ ដូសដែលជាជំនួយរបស់រាជរដ្ឋាភិបាល និងប្រជាជននៃចក្រភពអង់គ្លេសនៅព្រលានយន្តហោះអន្តរជាតិភ្នំពេញ។
លោកនាយករដ្ឋមន្ត្រី បានថ្លែងយ៉ាងដូច្នេះថា៖ «ខ្ញុំសុំស្នើចក្រភពអង់គ្លេសផ្តល់ជាជំនួយមនុស្សធម៌ផ្តល់ជាវ៉ាក់សាំងបន្តទៀតក៏ដូចជាជួយសម្របសម្រួលដល់កម្ពុជានៅក្នុងការបញ្ជាទិញវ៉ាក់សាំង AstraZeneca បន្ថែមទៀតសម្រាប់បំពេញសេចក្តីត្រូវការចាំបាច់នានានាពេលអនាគត»។
ជាមួយនឹងការស្នើនេះលោក ហ៊ុន សែន ក៏បានប្រកាសដាក់ចេញនូវយុទ្ធនាការចាក់វ៉ាក់សាំងបង្ការជំងឺកូវីដ ១៩ ដូសទី ៣ ឬដូសជំរុញ ស្របជាមួយយុទ្ធនាការចាក់វ៉ាក់សាំងកូវីដ ១៩ ដល់កុមារ និងយុវវ័យដែលមានអាយុចាប់ពី ១២ ឆ្នាំដល់ក្រោម ១៨ ឆ្នាំផងដែរ។
លោកបញ្ជាក់ថា៖ «ស្របពេលជាមួយនេះផងដែរ រាជរដ្ឋាភិបាលកម្ពុជាក៏បានសម្រេចដាក់ចេញនូវយុទ្ធនាការចាក់វ៉ាក់សាំងបង្ការជំងឺកូវីដ ១៩ ដូសទី ៣ ឬដូសជំរុញជូនមន្ត្រីសេវាសាធារណៈជួរមុខ ដែលកំពុងបម្រើការនៅតាមបណ្តាខេត្តនានា ដែលស្ថិតនៅតាមព្រំដែនជាមួយប្រទេសថៃ ដែលមេរោគបំប្លែងថ្មី ប្រភេទដែលតាកំពុងវាយលុក និងរាលដាល»។
ក្នុងនោះលោក ហ៊ុន សែន បញ្ជាក់ថា វ៉ាក់សាំងដែលទទួលបានពីចក្រភពអង់គ្លេសនឹងក្លាយទៅជាវ៉ាក់សាំងសម្រាប់ចាក់ជូនប្រជាពលរដ្ឋក្នុងយុទ្ធនាការចាក់ដូសទី ៣ ខណៈរដ្ឋាភិបាលកំពុងបន្តចរចាបញ្ជាទិញវ៉ាក់សាំងប្រភេទនេះពីប្រទេសផលិតបន្ថែមទៀត។
យោងតាមសេចក្តីប្រកាសរបស់ចក្រភពអង់គ្លេសបានឱ្យដឹងថា ចក្រភពអង់គ្លេសនឹងបរិច្ចាគវ៉ាក់សាំងចំនួន ១០០ លានដូសដល់ប្រទេសនានា នៅត្រឹមខែមិថុនា ឆ្នាំ ២០២២ ដែល ៨០ លានដូសនៃចំនួននេះនឹងត្រូវបានបរិច្ចាគតាមរយៈយន្តការ COVAX ហើយចំនួនដែលនៅសេសសល់នឹងផ្តល់ជូនទៅប្រទេសផ្សេងៗដោយផ្ទាល់។
លោក Marc Thayre ឯកអគ្គរាជទូតស្តីទីអង់គ្លេសប្រចាំនៅកម្ពុជាបានថ្លែងក្នុងឱកាសនោះថា ការផ្តល់ជំនួយវ៉ាក់សាំងដោយចក្រភពអង់គ្លេសនឹងគាំទ្រដល់ប្រទេសកម្ពុជាក្នុងយុទ្ធនាការចាក់វ៉ាក់សាំងរបស់ខ្លួននឹងអនុញ្ញាតឱ្យអាជីវកម្មបើកដំណើរការឡើងវិញ កុមារនឹងទទួលបានការអប់រំ និងជីវភាពរស់នៅរបស់ប្រជាជនកម្ពុជាមានភាពប្រសើរឡើងវិញ។
លោកបន្ថែមថា ចាប់តាំងពីការចាប់ផ្តើមនៃជំងឺរាតត្បាតនេះ ចក្រភពអង់គ្លេសបានដឹកនាំ និងខិតខំប្រឹងប្រែង ដើម្បីការពារ មនុស្សជាតិ ប្រឆាំងនឹងជំងឺដ៏សាហាវនេះ។ លោកថា ជាង ១ ឆ្នាំមុន រដ្ឋាភិបាលចក្រភពអង់គ្លេសបានផ្ដល់មូលនិធិដល់ការស្រាវជ្រាវ ការអភិវឌ្ឍ និងការផលិតវ៉ាក់សាំងរបស់សាកលវិទ្យាល័យ Oxford-AstraZeneca ដោយផ្អែកលើមូលដ្ឋានវ៉ាក់សាំង ដែលផលិតបាននឹងត្រូវចែកចាយនៅទូទាំងពិភពលោក។
លោកបញ្ជាក់ថា៖ «រដ្ឋាភិបាលចក្រភពអង់គ្លេសមានសេចក្តីសោមនស្សរីករាយអាចមានភាពជាដៃគូជាមួយរាជរដ្ឋាភិបាលកម្ពុជាក្នុងកិច្ចខិតខំប្រឹងប្រែងនេះ។ នៅក្នុងអំឡុងពេលជំងឺរាតត្បាតនេះគ្មាននរណាម្នាក់មានសុវត្ថិភាពទេ រហូតដល់មនុស្សគ្រប់គ្នាមានសុវត្ថិភាព»។
ជាមួយនឹងការមកដល់នូវវ៉ាក់សាំង AstraZeneca នេះ ក្រសួងសុខាភិបាល ក៏បានសម្រេចផ្តល់សិទ្ធិអនុញ្ញាតឱ្យមន្ទីរពេទ្យ Royal Phnom Penh នាំចូល និងគ្រប់គ្រងវ៉ាក់សាំង PfizerBiontech និង វ៉ាក់សាំង Moderna ពីសហរដ្ឋអាមេរិកមកកម្ពុជាផ្តាច់មុខផងដែរ។ ការអនុញ្ញាតនេះ គឺដើម្បីមន្ទីរពេទ្យនេះ ធ្វើការចែកចាយវ៉ាក់សាំងដល់អ្នកដែលអាចមានលទ្ធភាព និងត្រូវការប្រភេទនៃវ៉ាក់សាំងទាំងនេះដោយការបង់ប្រាក់។
លោក យ៉ុន សុខុម នាយកគ្រប់គ្រងផ្នែកទីផ្សារនៃមន្ទីរពេទ្យ Royal Phnom Penh បានប្រាប់ភ្នំពេញប៉ុស្តិ៍នៅថ្ងៃទី ៥ សីហាថា មន្ទីរពេទ្យពិតជាទទួលបានសិទ្ធិអនុញ្ញត ដើម្បីនាំចូលវ៉ាក់សាំងទាំង ២ ប្រភេទនេះពិតមែន ហើយក្រុមការងារនៃមន្ទីរពេទ្យកំពុងដំណើរការចរចាជាមួយក្រុមហ៊ុនទាំង ២ ដើម្បីនាំចូលប្រភេទវ៉ាក់សាំងទាំង ២ នេះមកកម្ពុជា។
លោក បានបញ្ជាក់ថា៖ «យើងត្រូវសិក្សាមើលសិន ថាតើគេនឹងលក់ឱ្យយើងក្នុងតម្លៃប៉ុន្មាន និងសិក្សាទៅលើនីតិវិធីជាច្រើនទៀត។ យើងឃើញថា វ៉ាក់សាំងប្រភេទនេះ គឺមានលក់ក្នុងតម្លៃមួយថោកនៅសហរដ្ឋអាមេរិក ប៉ុន្តែគេអាចលក់ឱ្យយើងក្នុងតម្លៃថ្លៃ ដែលធ្វើឱ្យយើងនាំចូលមកលក់នៅកម្ពុជាកាន់តែថ្លៃទៀត ហើយពលរដ្ឋយើងអាចនឹងមានលទ្ធភាពទិញចាក់អត់?»។
យ៉ាងណាលោក យ៉ុន សុខុម អះអាងថា ក្នុងនាមមន្ទីរពេទ្យឯកជនមួយ ដែលមានការសហការជាមួយរដ្ឋាភិបាល គឺមន្ទីរពេទ្យគ្រាន់តែចង់ចូលរួមចំណែកក្នុងការនាំយកប្រភេទវ៉ាក់សាំង ដែលមានគុណភាពបន្ថែមទៀត មកចែកចាយដល់ប្រជាពលរដ្ឋកម្ពុជាប៉ុណ្ណោះ៕
វីដេអូ៖