.jpg)
គ្រូពេទ្យចុះទៅយកសំណាកទាំងយប់ នៅក្នុងខណ្ឌពោធិ៍សែនជ័យ កាលពីយប់ថ្ងៃទី៣ខែសីហា។ រូបថត TYDA
ភ្នំពេញៈ អាជ្ញាធររាជធានីភ្នំពេញ នឹងធ្វើការដាក់ពិន័យ ដោយមានការផាកជាប្រាក់ និងការដាក់ពន្ធនាគារ ចំពោះបុគ្គល ឬនីតិបុគ្គល ដែលប្រព្រឹត្តអំពើល្មើសនឹងវិធានការសុខាភិបាល ចំពោះការលាក់លៀមមិនព្រមរាយការណ៍ជូនមន្ត្រីសុខាភិបាល ក្រុមគ្រូពេទ្យ ឬអាជ្ញាធរមូលដ្ឋាន ចំពោះការលួចព្យាបាលជំងឺកូវីដ ១៩ នៅគេហដ្ឋានដោយខ្លួនឯង។
ការប្រកាសចាត់វិធានការ តាមច្បាប់នេះ ត្រូវបានលោក ឃួង ស្រេង អភិបាលសាលារាជធានីភ្នំពេញ ចេញសេចក្តីណែនាំមួយស្តីពីការពង្រឹងប្រសិទ្ធភាពនៃការគ្រប់គ្រង ថែទាំ និងព្យាបាលអ្នកជំងឺកូវីដ១៩នៅតាមផ្ទះក្នុងភូមិសាស្ត្ររាជធានីភ្នំពេញ នាល្ងាចថ្ងៃទី ១២ ខែសីហានេះ។
គិតត្រឹមថ្ងៃទី ១១ ខែសីហា នៅរាជធានីភ្នំពេញមានអ្នកជំងឺកូវីដ ១៩ ត្រូវបានអនុញ្ញាតឲ្យព្យាបាល នៅតាមផ្ទះសរុបចំនួន ៤ ២៤១ នាក់ ក្នុងនោះ អ្នកជំងឺដែលបានជាសះស្បើយមានចំនួន ១ ២៥៧ នាក់ និងអ្នកជំងឺកំពុង សម្រាកព្យាបាលមានចំនួន ២ ៩៨៤ នាក់។
រដ្ឋបាលរាជធានីភ្នំពេញបានលើកឡើងថា ក្នុងរយៈពេលអនុវត្តកន្លងមកនេះ រដ្ឋបាលរាជធានីភ្នំពេញ បានកត់សម្គាល់ឃើញថា មានប្រជាពលរដ្ឋមួយចំនួន ដែលបានប្រើប្រាស់តេស្ករហ័សរកអង់ទីហ្សែនកូវីដ ១៩ ដោយខ្លួនឯង នៅតាមផ្ទះ ហើយបានព្យាយាមប្រើប្រាស់ថ្នាំពេទ្យ ឬអនុវត្តការព្យាបាលបែបបុរាណដោយខ្លួនឯង។
ប្រភពដដែលបានបន្តថា អ្នកជំងឺមួយចំនួន បានវិវត្តទៅរកស្ថានភាពធ្ងន់ធ្ងររួចទើបបានរាយការណ៍មកមន្ត្រីសុខាភិបាល ឬអាជ្ញាធរមូលដ្ឋាន ពោលគឺជាការអនុវត្តមិនត្រឹមត្រូវ តាមនីតិវិធីប្រតិបត្តិស្តង់ដារ សម្រាប់គ្រប់គ្រង ថែទាំ និងព្យាបាលអ្នកជំងឺកូវីដ ១៩ នៅតាមផ្ទះ ដែលអាចបង្កគ្រោះថ្នាក់ដល់អាយុជីវិតរបស់អ្នកជំងឺ និងអាចបង្កជាហានិភ័យនៃការចម្លងជំងឺកូវីដ ១៩ ដល់សមាជិក គ្រួសារ អ្នករស់នៅក្បែរខាង និងសហគមន៍ទាំងមូល ថែមទៀតផង។
លោក ឃួង ស្រេង បានធ្វើការណែនាំថា ក្នុងករណីការប្រើប្រាស់តេស្តរហ័សរកអង់ទីហ្សែនកូវីដ ១៩ ដោយបុគ្គលឯកជន ទទួលលទ្ធផលតេស្តវិជ្ជមាន ត្រូវដាក់ខ្លួនឱ្យនៅដោយឡែកពីសមាជិកគ្រួសារ និងមានកាតព្វកិច្ចតាម ផ្លូវច្បាប់ ក្នុងការជូនដំណឹងជាបន្ទាន់ ទៅមន្ត្រីសុខាភិបាល ឬ អាជ្ញាធរមូលដ្ឋាន។
លោកថា ការជូនដំណឹងនេះគឺដើម្បីឱ្យអាជ្ញាធរមូលដ្ឋាន និងក្រុមគ្រូពេទ្យ ចុះវាយតម្លៃស្ថានភាពអ្នកជំងឺ និងពិនិត្យទីតាំងផ្ទះ ថាតើត្រូវអនុញ្ញាត ឲ្យអ្នកជំងឺព្យាបាលនៅផ្ទះ ឬត្រូវបញ្ជូនទៅព្យាបាលនៅមន្ទីរពេទ្យរដ្ឋ។
លោក ឃួង ស្រេង បានបញ្ជាក់ថា៖ «ក្នុងករណីរដ្ឋបាលរាជធានីភ្នំពេញ ឬអាជ្ញាធរ មានសមត្ថកិច្ចគ្រប់លំដាប់ថ្នាក់ទទួលបានព័ត៌មាន ឬរកឃើញថា មានបុគ្គលណាមួយ ដែលបានប្រើប្រាស់តេស្ករហ័ស រកអង់ទីហ្សែនកូវីដ ១៩ ទទួលបានលទ្ធផលតេស្តវិជ្ជមានជំងឺកូវីដ១៩ ហើយមិនព្រមរាយការណ៍ជូនមន្ត្រីសុខាភិបាលក្រុមគ្រូពេទ្យ ឬអាជ្ញាធរមូលដ្ឋាន បុគ្គលនោះនឹងត្រូវប្រឈមនឹងការអនុវត្តនូវពិន័យជាប្រាក់ ក៏ដូចជាប្រឈមនឹងទោសដាក់ពន្ធនាគារនៃច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ ១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត»។
ជាមួយគ្នានេះដែរ រដ្ឋបាលរាជធានីភ្នំពេញ លើកទឹកចិត្ត និងស្នើសុំប្រជាពលរដ្ឋ ដែលមានលំនៅឋានរស់នៅក្បែរខាងទីតាំងផ្ទះរបស់បុគ្គល ដែលសង្ស័យថា មានអ្នកជំងឺកូវីដ ១៩ កំពុងលួចលាក់សម្រាកព្យាបាលដោយខ្លួនឯង ត្រូវរាយការណ៍ ជាបន្ទាន់មករដ្ឋបាលរាជធានីភ្នំពេញ ឬអាជ្ញាធរមូលដ្ឋាន ដែលនៅជិតបំផុត ដោយធានារក្សាការសម្ងាត់ជូន។
លោក ឃួង ស្រេង បានសង្កត់ធ្ងន់ថា រដ្ឋបាលខណ្ឌទាំង ១៤ និងមន្ទីរសុខាភិបាលនៃរដ្ឋបាលរាជធានីភ្នំពេញ ត្រូវចុះត្រួតពិនិត្យ នៅតាមមូលដ្ឋានរៀងៗខ្លួន ដើម្បីធានានូវការអនុវត្តឱ្យបានត្រឹមត្រូវ ដោយត្រូវចាត់វិធានការច្បាប់ និងវិធានការរដ្ឋបាលឱ្យខាងតែបាន និងដោយគ្មានការលើកលែងឡើយ ក្រោយពេលដែលបុគ្គលនោះបានទទួលការព្យាបាលជំងឺកូវីដ ១៩ ជាសះស្បើយ៕
វីដេអូ៖
