គិតត្រឹមថ្ងៃទី ១៣ ខែសីហា ម្សិលមិញ ប្រជាពលរដ្ឋដែលមានអាយុចាប់ពី ១០០ ឆ្នាំ ដល់ ១១៣ ឆ្នាំ សរុប ៥៣ នាក់ ដែលរស់នៅក្នុងរាជធានីភ្នំពេញ និងនៅតាមបណ្តាខេត្តចំនួន ១៦ ខេត្តផ្សេងទៀត បានស្ម័គ្រចិត្តចាក់វ៉ាក់សាំងបង្ការជំងឺកូវីដ ១៩។ នេះបើតាមការឱ្យដឹងរបស់លោកស្រី ឱ វណ្ណឌីន អ្នកនាំពាក្យក្រសួងសុខាភិបាល និងជាប្រធានគណៈកម្មការចំពោះកិច្ចក្នុងក្របខ័ណ្ឌទូទាំងប្រទេស កាលពីថ្ងៃទី ១៣ ខែសីហា។
លោកស្រីបានបញ្ជាក់ថា មនុស្សវ័យចំណាស់ទាំងនេះ បានចាក់វ៉ាក់សាំងរួចហើយ នៅក្នុងរាជធានីភ្នំពេញមានចំនួន ៨ នាក់ ខេត្តកណ្តាលចំនួន ៣ នាក់ ខេត្តក្រចេះ ៣ នាក់ ខេត្តកំពង់ចាម ៩ នាក់ ខេត្តកំពង់ឆ្នាំង ១ នាក់ ខេត្តកំពង់ធំ ៨ នាក់ ខេត្តកំពត ០១ នាក់ ខេត្តតាកែវ ០១ នាក់ ខេត្តត្បូងឃ្មុំ ៥ នាក់ ខេត្តពោធិ៍សាត់ ០១ នាក់ ខេត្តព្រៃវែង ០២ នាក់ ខេត្តព្រះវិហារ ៣ នាក់ ខេត្តរតនគិរី ០៣ នាក់ ខេត្តសៀមរាប ០១ នាក់ ខេត្តស្ទឹងត្រែង ០២ នាក់ ខេត្តស្វាយរៀង ០១ នាក់ និងខេត្តកោះកុង ០១ នាក់។
លោកស្រីបានមានប្រសាសន៍ថា៖ «តាមយើងទទួលព័ត៌មានបាន លោកតាលោកយាយដែលមានវ័យជាង ១០០ ឆ្នាំ ដែលបានចាក់វ៉ាក់សាំងនេះ ប្រហែលជានៅមានបន្តទៀត ដោយក្រុមការងារកំពុងតែធ្វើការត្រួតពិនិត្យឱ្យបានច្បាស់លាស់ផងដែរ»។
លោកស្រី ឱ វណ្ណឌីន បានបន្តថា ការងារចាក់វ៉ាក់សាំងកូវីដ ១៩ នៅក្នុងប្រទេសកម្ពុជា មានវឌ្ឍនភាពល្អ ហើយលោកស្រីរំពឹងថា ការចាក់វ៉ាក់សាំងទៅដល់ក្រុមមនុស្សដែលមានអាយុពី ១៨ ឆ្នាំឡើងទៅនេះ នឹងអាចសម្រេចបាននៅចុងខែតុលា ឬដើមខែវិច្ឆិកាខាងមុខនេះ។
យោងតាមរបាយការណ៍ក្រសួងសុខាភិបាលបានឱ្យដឹងថា គិតត្រឹមថ្ងៃទី ១៣ ខែសីហា ការចាក់វ៉ាក់សាំងបានកើនឡើងដល់ជាង ៨ លាននាក់ ឬស្មើនឹង ៨២,៦៨% ធៀបជាមួយចំនួនប្រជាជនគោលដៅ ១០ លាននាក់ និងលើកុមារ-យុវវ័យអាយុពី ១២ ឆ្នាំ ទៅក្រោម ១៨ ឆ្នាំ មានចំនួន ២៤,៥២% ធៀបជាមួយនឹងប្រជាជនគោលដៅ ១ ៩៦៦ ៩៣១ នាក់៕