ភ្នំពេញៈ ក្រសួងសុខាភិបាលបានបន្តប្រកាសពីការវិវឌ្ឍនៃដំណើរការចាក់វ៉ាក់សាំងបង្ការការរាតត្បាតនៃជំងឺកូវីដ ១៩ ដែលរហូតមកដល់ថ្ងៃទី ១៤ ខែសីហា រាជរដ្ឋាភិបាលបានចាក់វ៉ាក់សាំងដល់ប្រជាពលរដ្ឋនៅទូទាំងប្រទេសដែលមានអាយុចាប់ពី ១៨ ឆ្នាំឡើងទៅ សរុបចំនួនជាង ៨ លាននាក់ ឬ ប្រមាណជាង ៨៣,៣៦% ប្រៀបធៀបនឹងគោលដៅប្រជាពលរដ្ឋ ១០ លាននាក់។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស (គ.វ.ក ១៩) បានថ្លែងកាលពីថ្ងៃទី ១៣ ខែសីហា ថា៖ «ការងារចាក់វ៉ាក់សាំងកូវីដ ១៩ នៅក្នុងព្រះរាជាណាចក្រកម្ពុជាមានវឌ្ឍនភាពល្អប្រសើរមែនទែន ដែលចំនួនតួលេខនៃការចាក់វ៉ាក់សាំងមានការរំកិលខ្លួនលឿន ដែលយើងរំពឹងទុកថា ការចាក់វ៉ាក់សាំងសម្រាប់ក្រុមមនុស្សចាប់ពីអាយុ ១៨ ឆ្នាំឡើងនេះនឹងអាចសម្រេចនៅក្នុងខែតុលា ខាងមុខ ឬយូរបំផុតត្រឹមដើមខែវិច្ឆិកា ប៉ុន្តែបើមើលតាមសម្ទុះដែលយើងធ្វើការចាក់គឺអាចនឹងរួចបញ្ចប់នៅក្នុងខែតុលា»។
ទន្ទឹមគ្នានេះដែរ លោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានៅថ្ងៃទី ១៥ ខែសីហា បានសរសេរក្នុងបណ្តាញសង្គមហ្វេសប៊ុករបស់លោកថា មានការចាក់វ៉ាក់សាំងជារៀងរាល់ថ្ងៃតាមមន្ទីរពេទ្យរដ្ឋសម្រាប់បងប្អូនដែលមិនទាន់បានចាក់។
លោកបញ្ជាក់ថា៖ «សូមឱ្យក្រសួងសុខាភិបាល គណៈកម្មការចំពោះកិច្ចសម្រាប់ចាក់វ៉ាក់សាំង សាលារាជធានីភ្នំពេញ និងបណ្តាញផ្សព្វផ្សាយព័ត៌មានជួយផ្សព្វផ្សាយឱ្យបានច្រើន ដើម្បីឱ្យប្រជាពលរដ្ឋបានជ្រាប និងនាំគ្នាទៅចាក់វ៉ាក់សាំងបានគ្រប់ៗគ្នា»។
លោក ស្រី វណ្ណឌីន ថ្លែងថា លោកនាយករដ្ឋមន្ត្រីក៏បានគិតគូរខ្លាំងណាស់ទៅដល់ពលករដែលបានត្រឡប់ពីប្រទេសថៃចូលមកកម្ពុជាវិញ ត្រូវធ្វើចត្តាឡីស័កឱ្យបានត្រឹមត្រូវ នៅពេលដែលចប់ការធ្វើចត្តាឡីស័ក មិនមានវិជ្ជមានជំងឺកូវីដ ១៩ ទេ សុំទៅទទួលយកការចាក់វ៉ាក់សាំងកូវីដ ១៩ នៅតាមសហគមន៍របស់បងប្អូន ដោយមិនមានការបង់លុយទេ។
លោកស្រីថ្លែងថា៖ «សម្រាប់ពលករ ខ្មែរដែលអាចទទួលការចាក់វ៉ាក់សាំងបង្ការជំងឺកូវីដ ១៩ បានលុះត្រាតែពួកគាត់បានធ្វើចត្តាឡីស័កគ្រប់ចំនួនថ្ងៃត្រឹមត្រូវ និងបានធ្វើតេស្តមិនមានវិជ្ជមានកូវីដ ១៩។ ក្រុមការងារចាក់វ៉ាក់សាំងមិនអាចផ្តល់វ៉ាក់សាំងដល់ពួកគាត់ភ្លាមៗពេលចូលមកដល់ទឹកដីកម្ពុជាបានទេ លុះត្រាតែមានការបញ្ចប់នៃការធ្វើចត្តាឡីស័ក និងមិនមានបញ្ហាសុខភាពរបស់ពួកគាត់»។
ទន្ទឹមនឹងនេះដែរ អង្គការសុខភាពពិភពលោកប្រចាំប្រទេសកម្ពុជាបានកោតសរសើរយ៉ាងខ្លាំងចំពោះរាជរដ្ឋាភិបាលកម្ពុជាដែលសម្រេចបាននូវជោគជ័យដ៏ធំធេងមួយក្នុងការចាក់វ៉ាក់សាំងដល់ពលរដ្ឋបានជាង ៨ លាននាក់ ប៉ុន្តែអង្គការមួយនេះក៏បានធ្វើការក្រើនរំឭកដល់ពលរដ្ឋកម្ពុជាផងដែរថា ការចាក់វ៉ាក់សាំងបង្ការជំងឺកូវីដ ១៩ គឺជាយុទ្ធសាស្ត្រដ៏ខ្លាំងមួយ ប៉ុន្តែវាមិនមែនជាដំណោះស្រាយវេទមន្ត ដើម្បីបញ្ចប់ជំងឺរាតត្បាតកូវីដ ១៩ នោះទេ។
អង្គការនេះបានគូសបញ្ជាក់ថា៖ «សុទិដ្ឋិនិយមចំពោះវ៉ាក់សាំង អាចបង្កគ្រោះថ្នាក់។ កាលដែលបានចាក់វ៉ាក់សាំងរួចហើយ មិនមានន័យថាអ្នកគួរតែឈប់អនុវត្តវិធានការបង្ការផ្សេងទៀតដូចជាការពាក់ម៉ាស់នៅទីសាធារណៈ ការរក្សាគម្លាតសុវត្ថិភាព និងចៀសវាងការជួបជុំ ឬប្រមូលផ្ដុំមនុស្សជាដើមនោះទេ»។
លោកស្រី Li Ailan តំណាងអង្គការសុខភាពពិភពលោកប្រចាំកម្ពុជាបានថ្លែងកាលពីថ្ងៃទី ១២ ខែសីហា ថា៖ «ភាពក្លាហាន ការយល់ចិត្ត និងសេចក្តីស្រឡាញ់ដែលរដ្ឋាភិបាល និងប្រជាជនកម្ពុជាមានចំពោះប្រទេសជាតិ និងមនុស្សជាទីស្រឡាញ់របស់ខ្លួន តែងតែជំរុញចិត្តខ្ញុំ។ ជាមួយនឹងសកម្មភាពបុគ្គល និងសមូហភាព យើងនឹងយកឈ្នះនៅក្នុងការប្រយុទ្ធនឹងជំងឺកូវីដ ១៩ បាន»។
លោកស្រីបានបន្តថា ជំងឺរាតត្បាតកូវីដ ១៩ នៅឆ្ងាយពីទីបញ្ចប់។ ខណៈដែលមានសញ្ញានៃការថយចុះនូវការចម្លង និងការស្លាប់នៅតាមខេត្តខ្លះ ហានិភ័យនៃការកើនឡើងនៃករណីកូវីដ ១៩ ដោយសារវីរុសបំប្លែងថ្មីប្រភេទដែលតា គឺខ្ពស់ណាស់។
ជាមួយគ្នានេះដែរ សម្រាប់ក្រុមមនុស្សដែលមានអាយុចាប់ពី ១២ ឆ្នាំទៅដល់ក្រោម ១៨ ឆ្នាំ ដែលបានបិទបញ្ចប់ការចាក់ដូសទី ១ កាលពីថ្ងៃទី ១៤ ខែសីហា ដោយសរុបមានអ្នកចាក់បានចំនួនជាង ៥២ ម៉ឺននាក់ ឬស្មើនឹង ២៦,៥៦% ធៀបនឹងគោលដៅចាក់ជិត ២ លាននាក់នៅទូទាំងប្រទេស។
លោក ងី មានហេង ប្រធានមន្ទីរសុខាភិបាលរាជធានីភ្នំពេញបានឱ្យដឹងថា មកដល់ថ្ងៃទី ១៤ ខែសីហានេះ ក្រុមមនុស្សដែលមានអាយុពី ១២ ឆ្នាំដល់ក្រោម ១៨ ឆ្នាំ ចំនួនជាង ១៧៦ ២០០ នាក់ បានទទួលការចាក់វ៉ាក់សាំងរួចហើយនៅក្នុងរាជធានីភ្នំពេញ។
លោកថ្លែងថា៖ «យើងអាចធ្វើការពន្យារសម្រាប់មណ្ឌលចាក់វ៉ាក់សាំងណាដែលនៅតែមានអ្នកមកចាក់។ ដំណើរការនៃការចាក់វ៉ាក់សាំងគឺចប់នៅថ្ងៃទី ១៤ នេះ តែបើនៅមានអ្នកមកចាក់គឺយើងនឹងបន្តនៅថ្ងៃស្អែកទៀត ហើយបើនៅថ្ងៃស្អែកមិនទាន់ចប់ យើងបន្តពន្យារនៅថ្ងៃខានស្អែកទៀតរហូតទាល់តែមានអ្នកបានចាក់គ្រប់គ្នា»។
លោក ងី មានហេង បានបន្តធ្វើការអំពាវនាវទៅដល់មាតាបិតា ឬ អាណាព្យាបាលនាំយកកូនមកចាក់វ៉ាក់សាំង ប្រសិនបើមិនទាន់ទទួលបានការចាក់ដូសទី ១ នៅឡើយ។
លោកស្រី ឱ វណ្ណឌីន ក៏បានឱ្យដឹងផងដែរថា ក្រុមការងារនៃគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេសបានធ្វើការបែងចែកវ៉ាក់សាំងទៅតាមបណ្តាខេត្តផ្សេងៗទៀតនៅទូទាំងប្រទេស សម្រាប់រៀបចំចាក់ដល់ក្រុមអាយុពី ១២ ដល់ក្រោម ១៨ ឆ្នាំ បន្ទាប់ពីទទួលបានវ៉ាក់សាំង ស៊ីណូវ៉ាក់ចំនួន ៣ លានដូសដែលជាការបញ្ជាទិញរបស់រាជរដ្ឋាភិបាលកម្ពុជាពីសាធារណរដ្ឋប្រជាមានិតចិន។
លោកស្រីថ្លែងថា៖ «កន្លងមកនេះ យើងធ្វើបានមួយចំនួនហើយដោយសារយើងរង់ចាំវ៉ាក់សាំងមកដល់ ហើយពេលនេះវ៉ាក់សាំងបានមកដល់ហើយ ហើយយើងមិនបានទុកវ៉ាក់សាំងនេះ ១ កន្លែងទេ គឺយើងចាត់ចែងចែកទៅតាមបណ្តាខេត្តផ្សេងៗតែម្តង»។
គួរបញ្ជាក់ផងដែរថា យុទ្ធនាការចាក់វ៉ាក់សាំងកូវីដ ១៩ ទៅដល់ក្រុមមនុស្សដែលមានអាយុពី ១២ ដល់ក្រោម ១៨ ឆ្នាំបានចាប់ផ្តើមដំបូងកាលពីថ្ងៃទី ១ ខែសីហា ដោយធ្វើឡើងនៅរាជធានីភ្នំពេញ ខេត្តព្រះសីហនុ កណ្ដាល កោះកុង និងសៀមរាប៕