ភ្នំពេញ៖ ភូមិសាស្រ្តក្នុងខេត្តចំនួន១៥ ត្រូវបានរដ្ឋមន្រ្តីក្រសួងសុខាភិបាល លោក ម៉ម ប៊ុនហេង ចេញសេចក្តីជូនដំណឹងកំណត់ឱ្យប្រជាពលរដ្ឋនៅក្នុងខេត្តទាំងនេះ ត្រូវអនុវត្តនូវកាតព្វកិច្ចពាក់ម៉ាស់ និងកាតព្វកិច្ចរក្សាគម្លាតសុវត្ថិភាព ចាប់ពីពេលនេះរហូតមានការជូនដំណឹងជាថ្មី។
លោក ម៉ម ប៊ុនហេង បានចេញសេចក្តីជូនដំណឹង នាថ្ងៃទី ១៦ ខែសីហា ស្តីពីភូមិសាស្ត្រដែលត្រូវអនុវត្តកាតព្វកិច្ចពាក់ម៉ាស់ និងកាតព្វកិច្ចរក្សាគម្លាតសុវត្ថិភាព ដោយកំណត់ខេត្តទាំង ១៥នោះជាភូមិសាស្ត្រដែលមានការឆ្លងរាលដាលនៃជំងឺកូវីដ ១៩ ក្នុងព្រឹត្តិការណ៍សហគមន៍ ២០ កុម្ភៈ ត្រូវមានការអនុវត្តកាតព្វកិច្ចនេះ។
លោក ម៉ម ប៊ុនហេង លើកឡើងថា ភូមិសាស្ត្រខេត្តទាំង ១៥ ដែលតម្រូវឱ្យអនុវត្តនូវកាតព្វកិច្ចពាក់ម៉ាស់ និងកាតព្វ កិច្ចរក្សាគម្លាតសុវត្ថិភាពនោះ រួមមាន ខេត្តពោធិ៍សាត់ បាត់ដំបង មណ្ឌលគិរី រតនគិរី ក្រចេះ ស្ទឹងត្រែង កំពត កែប កំពង់ធំ ព្រះវិហារ ប៉ៃលិន កោះកុង កំពង់ឆ្នាំង ត្បូងឃ្មុំ និងខេត្តឧត្តរមានជ័យ។
លោករដ្ឋមន្រ្តីបញ្ជាក់ថា៖ «ចំពោះបុគ្គលដែលមានកាតព្វកិច្ចពាក់ម៉ាស់ និងរក្សាគម្លាតសុវត្ថិភាពបុគ្គលត្រូវបានកំណត់ក្នុងប្រការ៣ និងប្រការ ៤ នៃប្រកាសលេខ ០៨១ ស.នក.ប្រក ចុះថ្ងៃទី ២២ ខែមីនា ស្តីពីកាតព្វកិច្ច ពាក់ម៉ាស់ និងកាតព្វកិច្ចរក្សាគម្លាតសុវត្ថិភាពក្នុងអំឡុងពេលនៃការឆ្លងរាលដាលជំងឺកូវីដ ១៩ ក្នុងសហគមន៍»។
លោកបានស្នើឱ្យអាជ្ញាធរមានសមត្ថកិច្ចគ្រប់លំដាប់ថ្នាក់ ចាត់វិធានការដើម្បីធានាអនុវត្តឱ្យបានម៉ឺងម៉ាត់នូវកាតព្វកិច្ចពាក់ម៉ាស់ និងកាតព្វកិច្ចរក្សាគម្លាតសុវត្ថិភាព ហើយក៏បានស្នើឱ្យសាធារណជនទាំងអស់ ត្រូវចូលរួមអនុវត្តឱ្យបានខ្ជាប់ខ្ជួននូវកាតព្វកិច្ចនេះ ដើម្បីទប់ស្កាត់ការឆ្លងរាលដាលនៃជំងឺកូវីដ ១៩។
ទាក់ទងនឹងការឱ្យអនុវត្តកាតព្វកិច្ចពាក់ម៉ាស់ និងកាតព្វកិច្ចរក្សាគម្លាតសុវត្ថិភាពនេះ លោក ញ៉ែម សំអឿន អភិបាលរងខេត្តរតនគិរីប្រាប់ ភ្នំពេញ ប៉ុស្តិ៍ នៅថ្ងៃទី ១៦ ខែសីហាថា ស្ថានភាពនៃការឆ្លងរាលដាលនៃវីរុសកូវីដ ១៩ នៅក្នុងខេត្តនេះមិនទាន់មានភាពធូរស្រាលនៅឡើយទេ ដោយសារតួលេខនៅមានឡើងចុះដែលថ្ងៃខ្លះក៏មិនមានការរកឃើញឆ្លងដែរ។
លោកថ្លែងថា៖ «ជាទូទៅនៅក្នុងខេត្តរបស់យើង គឺយើងតែងតែតាមដានយ៉ាងផ្ចិតផ្ចង់ ហើយជាពិសេសការពាក់ម៉ាស់និងការរក្សាគម្លាតនេះតែម្តង។ ប៉ុន្តែប្រជាពលរដ្ឋរបស់យើងស្ទើរតែ ១០០% មានការយល់ដឹងនិងអនុវត្តបានយ៉ាងល្អ»។
លោក ញ៉ែម សំអឿន បន្ថែមថា រដ្ឋបាលខេត្តតែងតែធ្វើការណែនាំទៅដល់គ្រប់មូលដ្ឋាននិងភូមិឃុំរហូតដល់គ្រប់ប្រជាពលរដ្ឋទាំងអស់។ ដូចនេះម្នាក់ៗនៅតាមដងផ្លូវនិងតាមទីសាធារណៈផ្សេងៗទៀតមានការយល់ដឹងនិងបានពាក់ម៉ាស់គ្រប់ៗគ្នា។
លោកបញ្ជាក់ថា៖ «សម្រាប់ការអនុវត្តនូវការរក្សាគម្លាតក៏ធ្វើបានល្អផងដែរ ដោយយើងមិនអនុញ្ញាតឱ្យមានការប្រមូលផ្តុំគ្នាឡើយហើយតាមហាងអាហារត្រូវធ្វើការលក់ដូរដោយការវេចខ្ចប់ និងមានការដាក់បម្រាមគោចរផងដែរ»។
រីឯអភិបាលរងខេត្តឧត្តរមានជ័យ លោក ឌី រ៉ាដូ ក៏បានប្រាប់ ភ្នំពេញ ប៉ុស្តិ៍ ផងដែរថា ភាគច្រើននៃការរកឃើញអ្នកឆ្លងវីរុសកូវីដ ១៩ មាននៅលើពលករខ្មែរដែលទើបវិលត្រឡប់មកពីប្រទេសថៃ។ ចំណែកការឆ្លងក្នុងសហគមន៍មិនសូវជាច្រើននោះទេ បើធៀបនឹងចំនួននៃការឆ្លងរបស់ពលករ។
លោកប្រាប់ថា៖ «ខេត្តយើងបានបង្កើតគណៈកម្មការមួយក្នុងការត្រួតពិនិត្យ ទៅលើការអនុវត្ត នូវកាតព្វកិច្ចពាក់ម៉ាស់ និងកាតព្វកិច្ចរក្សាគម្លាតសុវត្ថិភាពនេះ ដែលជាទូទៅបងប្អូនប្រជាពលរដ្ឋនៅក្នុងខេត្តរបស់យើងមានការគោរពតាមការណែនាំរបស់រាជរដ្ឋាភិបាល ក្រសួងសុខាភិបាល និងរដ្ឋបាលខេត្ត»។
ជាមួយគ្នានេះ ខេត្តឧត្តរមានជ័យមិនមានការអនុញ្ញាតឱ្យមានការប្រមូលផ្តុំមនុស្សច្រើននោះទេ ហើយសម្រាប់អហារដ្ឋានត្រូវធ្វើការលក់ដូរដោយការវេចខ្ចប់។
យោងតាមប្រការ៣នៃប្រកាសស្តីពីកាតព្វកិច្ច ពាក់ម៉ាស់ និងកាតព្វកិច្ចរក្សាគម្លាតសុវត្ថិភាពក្នុងអំឡុងពេលនៃការឆ្លងរាលដាលជំងឺកូវីដ ១៩ ក្នុងសហគមន៍ បានចែងថា បុគ្គលដែលមានកាតព្វកិច្ចពាក់ម៉ាស់ រួមមាន បុគ្គលដែលមានវិជ្ជមានកូវីដ ១៩ ក្នុងពេលជួបផ្ទាល់ជាមួយមន្ត្រីសុខាភិបាល ឬមន្ត្រីមានសមត្ថកិច្ចផ្សេងទៀត។ បុគ្គលដែលមានកាតព្វកិច្ចធ្វើចត្តាឡីស័ក លើកលែងតែបុគ្គលនោះធ្វើចត្តាឡីស័កនៅក្នុងបន្ទប់ដាច់ដោយឡែកតែឯង និងមិនជួបផ្ទាល់ជាមួយអ្នកដទៃ។
ប្រភពដដែលបន្តថា កាតព្វកិច្ចពាក់ម៉ាស់ គឺអ្នកបើកបរយានយន្តគ្រប់ប្រភេទដែលជាមធ្យោបាយធ្វើដំណើររួម ឬមធ្យោបាយដឹកជញ្ជូនសម្រាប់បម្រើឱ្យសាធារណជន អ្នកដំណើរតាមមធ្យោបាយធ្វើដំណើររួម ឬមធ្យោបាយដឹកជញ្ជូនសម្រាប់បម្រើឱ្យសាធារណជន។ អ្នកផ្តល់សេវាផ្ទាល់ដល់អតិថិជន និងបុគ្គលផ្សេងទៀតដែលកំពុងស្ថិតនៅតាមទីសាធារណៈដែលមានមនុស្សច្រើន ឬទីកន្លែងដែលមានការជួបជុំមនុស្សចាប់ពី ២ នាក់ឡើងទៅ។
សម្រាប់ប្រការ ៤ បុគ្គលគ្រប់រូបដែលកំពុងស្ថិតនៅទីកន្លែងធ្វើការនៃសហគ្រាស ឬគ្រឹះស្ថានឯកជន ទីតាំងអាជីវកម្ម ឬទីកន្លែងសាធារណៈនានា ដែលមានមនុស្សច្រើន ត្រូវមានកាតព្វកិច្ចរក្សាគម្លាតសុវត្ថិភាពបុគ្គល។ ការរក្សា គម្លាតសុវត្ថិភាពបុគ្គល ត្រូវមានយ៉ាងតិច ១,៥០ ម៉ែត្រ ពីបុគ្គលម្នាក់ទៅ បុគ្គលម្នាក់៕
វីដេអូ៖