.jpg)
រដ្ឋបាលខេត្តស្ទឹងត្រែង ធ្វើយុទ្ធនាការជាតិក្រោមប្រធានបទ «រួមគ្នាទទួលខុសត្រូវទប់ស្កាត់ការចម្លងវីរុសកូវីដ ១៩» កាលពីម្សិលមិញ។ រូបថត រដ្ឋបាលខេត្ត
អភិបាលខេត្តស្ទឹងត្រែងបានសម្រេចបិទខ្ទប់ភូមិសាស្ត្រក្រុងស្ទឹងត្រែង នៃខេត្តស្ទឹងត្រែង ជាបណ្តោះអាសន្នក្នុងរយៈពេល ៧ ថ្ងៃ ចាប់ពីវេលាម៉ោង ២៣:៥៩ នាទី ថ្ងៃទី ១៧ នេះ រហូតដល់ថ្ងៃទី ២៤ ខែសីហា បន្ទាប់ពីមានការរកឃើញអ្នកផ្ទុកមេរោគកូវីដ ១៩ ប្រភេទបំប្លែងថ្មីចំនួន ៧ នាក់។
លោក ម៉ុម សារឿន អភិបាលខេត្តស្ទឹងត្រែង បានចេញសេចក្តីប្រកាសបិទខ្ទប់ក្រុងស្ទឹងត្រែងនេះ ដើម្បីសំដៅទប់ស្កាត់ការឆ្លងរាលដាលក្នុងសហគមន៍ដែលបណ្តាលមកពីមេរោគកូវីដ ១៩ ប្រភេទដែលតា (Delta) ធានាការពារបានអាយុជីវិតប្រជាជន សុខភាពសាធារណៈ និងសន្តិសុខសុវត្ថិភាពសង្គម។
លោកបានឱ្យដឹងថា៖ «ភូមិសាស្ត្រដែលត្រូវបានបិទខ្ទប់ អាចត្រូវបានបែងចែកជា តំបន់ក្រហម, តំបន់លឿងទុំ និងតំបន់លឿង។ អាស្រ័យតាមកម្រិតនៃការឆ្លងរាលដាលនៃជំងឺកូវីដ ១៩ នៅក្នុងមូលដ្ឋានជាក់ស្តែង»។
លោក ម៉ុម សារឿន បានបញ្ជាក់ថា ចំពោះភូមិសាស្ត្រដែលត្រូវបានបិទខ្ទប់ ត្រូវអនុវត្តវិធានការហាមឃាត់ រឹតត្បិត ជាអាទិ៍ ទាក់ទងនឹងការធ្វើដំណើរក្នុងភូមិសាស្ត្របិទខ្ទប់ និងការធ្វើដំណើរចេញ-ចូល ឆ្លងកាត់ភូមិសាស្ត្រដែលត្រូវបានបិទខ្ទប់ ការជួបជុំ ឬការប្រមូលផ្តុំមនុស្ស សកម្មភាពការងារ មុខរបរ ឬអាជីវកម្ម និងបម្រាមគោចរអនុលោមតាមច្បាប់ លិខិត បទដ្ឋានគតិយុត្ត និងវិធានការនានានៅជាធរមាន។
លោកបានបញ្ជាក់ថា អភិបាលក្រុងស្ទឹងត្រែង និងអភិបាលស្រុកដែលមានព្រំប្រទល់ជាប់នឹងក្រុងស្ទឹងត្រែង ត្រូវបង្កើនកិច្ចសហប្រតិបត្តិការល្អ ដើម្បីធ្វើការត្រួតពិនិត្យការធ្វើដំណើរចេញ-ចូល ឆ្លងកាត់ព្រំប្រទល់ក្រុងស្រុក សំដៅគ្រប់គ្រងភូមិសាស្ត្រដែលមានការផ្ទុះឆ្លងរាលដាលនៃជំងឺកូវីដ ១៩ ជាពិសេសមេរោគបំប្លែងថ្មីប្រភេទដែលតា។
ជាមួយគ្នានេះដែរ រដ្ឋបាលខេត្តរតនគិរី ក៏បានប្រកាសរកឃើញករណីមេរោគបំប្លែងថ្មី (Delta) ចំនួន ០១ ករណីផងដែរ បន្ទាប់ពីក្រុមការងារឆ្លើយតបបន្ទាន់មន្ទីរសុខាភិបាល នៃរដ្ឋបាលខេត្តរតនគិរី បានស្រាវជ្រាវ ធ្វើតេស្ដរហ័ស (Rapid-Test) លើមនុស្សចំនួន ៦២៣ នាក់ នៅថ្ងៃទី ១៧ ខែសីហានេះ៕
