មន្រ្តីជាន់ខ្ពស់នៃក្រសួងផែនការបានឱ្យដឹងថា ប្រជាជនកម្ពុជាដែលមានអាយុចាប់ពី ១០០ ឆ្នាំឡើងនៅទូទាំងប្រទេសមានរហូតជាង ៣ ០០០ នាក់ ដែលក្នុងនោះ រាជធានីភ្នំពេញមានមនុស្សវ័យចំណាស់ច្រើនជាងគេ ហើយខេត្តបន្ទាប់ គឺខេត្តសៀមរាប។
លោកស្រី ហង្ស លីណា ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកវិទ្យាស្ថានជាតិស្ថិតិនៃក្រសួងផែនការ និងជាអគ្គនាយកជំរឿនទូទៅប្រជាជននៅប្រទេសកម្ពុជា ឆ្នាំ ២០១៩ បានឱ្យដឹងនៅព្រឹកថ្ងៃទី ២០ ខែសីហានេះថា ផ្អែកតាមលទ្ធផលនៃការធ្វើជំរឿនទូទៅប្រជាជននៅប្រទេសកម្ពុជា ឆ្នាំ ២០១៩ បានបង្ហាញថា ប្រទេសកម្ពុជា យើងមានប្រជាជនដែលមានអាយុ ១០០ ឆ្នាំឡើងចំនួន ៣ ១៤៣ នាក់។
លោកស្រីមានប្រសាសន៍ថា៖ «ជាទិន្នន័យមួយដែលយើងនឹកស្មានមិនដល់ថា កម្ពុជាយើងមានប្រជាជនដែលមានអាយុវែងដូចនេះ»។
យោងតាមរបាយការណ៍របស់ក្រសួងផែនការបានបង្ហាញឱ្យដឹងថា ប្រជាជនកម្ពុជាដែលមានអាយុចាប់ពី ១០០ ឆ្នាំឡើងនេះ មាននៅរាជធានីភ្នំពេញច្រើនជាងគេរហូតដល់ ៤៦២ នាក់ បន្ទាប់មកខេត្តសៀមរាប ដែលមានចំនួន ២៦៧ នាក់ ខេត្តត្បូងឃ្មុំ ចំនួន ២៥០ នាក់ ខេត្តកំពង់ចាម ចំនួន ២៤២ នាក់ និងខេត្តកណ្តាលចំនួន ២២០ នាក់។
ក្រសួងបានបន្តថា ខេត្តដែលមានមនុស្សវ័យពី ១០០ ឆ្នាំនេះ តិចជាងគេ គឺខេត្តកែប ដែលមានតែចំនួន ៣ នាក់ប៉ុណ្ណោះ៕
វីដេអូ៖