ព្រះវិហារៈ រដ្ឋបាលខេត្តព្រះវិហារបានសម្រេចកំណត់ស្រុកជាំក្សាន្តជាតំបន់ក្រហម បន្ទាប់ពីស្រុកនេះត្រូវបានរកឃើញមានអ្នកឆ្លងជំងឺកូវីដ ១៩ បំប្លែងថ្មី ដោយបានបិទខ្ទប់បណ្តោះអាសន្នរយៈពេល ២ សប្តាហ៍ ចាប់ពីថ្ងៃទី ២១ ខែសីហា ដល់ថ្ងៃទី ០៣ ខែកញ្ញា។
លោក ប្រាក់ សុវណ្ណ អភិបាលខេត្តព្រះវិហារបានធ្វើការសម្រេចមិនឱ្យបុគ្គលគ្រប់រូបធ្វើដំណើរចេញពីលំនៅឋាន ឬទីសំណាក់បច្ចុប្បន្នរបស់ខ្លួនដោយមិនមានការអនុញ្ញាតនោះទេ។
លោកបានបញ្ជាក់ថា៖ «ផ្សារ និងទីកន្លែងលក់ម្ហូបអាហារ និងគ្រឿងឧបភោគបរិភោគ ដោយរួមទាំងទីកន្លែងលក់គ្រឿងស្រវឹងគ្រប់ប្រភេទ ព្រមទាំងសកម្មភាពការងារ មុខរបរ និងអាជីវកម្មទាំងអស់នៅក្នុងតំបន់ក្រហមត្រូវផ្អាកជាបណ្តោះអាសន្ន លើកលែងតែសកម្មភាពការងារ និងមុខរបរចាំបាច់ប៉ុណ្ណោះ»។
ចំណែកអភិបាលខេត្តរតនគិរី លោក ថង សារុន ក៏បានសម្រេចបិទខ្ទប់ជាបណ្តោះអាសន្នទីតាំងចំនួន ០៤ កន្លែងផងដែរ នៅក្នុងស្រុកអណ្តូងមាស ចាប់ពីថ្ងៃទី ១៨ ខែសីហា រហូតមានការសម្រេចជាថ្មី។
លោក ថង សារុន បានបន្ថែមថា៖ «ការបិទខ្ទប់ជាបណ្តោះអាសន្នទីតាំងទាំងនេះ គឺក្នុងគោលបំណង ដើម្បីទប់ស្កាត់ការរាលដាលនៃជំងឺកូវីដ ១៩ ក្រោយពីបានរកឃើញមានវិជ្ជមានជំងឺកូវីដ ១៩ តាមរយៈការធ្វើតេស្តរហ័ស»។
លោកបានបញ្ជាឱ្យរដ្ឋបាលស្រុកអណ្តូងមាស ត្រូវធ្វើការហ៊ុមព័ទ្ធទីតាំងទាំង ៤ កន្លែងនេះ ផ្អាកការចេញចូល និងត្រូវស្រាវជ្រាវរកអ្នកពាក់ព័ន្ធផ្ទាល់ ឬប្រយោលដើម្បីធ្វើចត្តាឡីស័ក និងយកសំណាក៕