បន្ទាយមានជ័យៈ មនុស្សចំនួន ៤ នាក់ស្លាប់ភ្លាមៗនៅនឹងកន្លែងកើតហេតុ ដោយសារអ្នកបើកបររថយន្តស៊េរីទំនើប ១ គ្រឿង បានរេចង្កូតធ្លាក់ចូលទឹកប្រឡាយ ស្ថិតនៅស្រុកស្វាយចេក ខេត្តបន្ទាយមានជ័យ។
យោងរបាយការណ៍បឋមរបស់អាជ្ញាធរមូលដ្ឋានបានឱ្យដឹងថា ហេតុការណ៍នេះបានកើតឡើងកាលពីវេលាម៉ោង ១៣ និង ១០ នាទី ថ្ងៃទី ២២ ខែសីហា។ គ្រោះថ្នាក់ចរាចរណ៍នេះបង្កឡើងដោយខ្លួនឯង នៅត្រង់ចំណុចផ្លូវបំបែកជា ៤ ខាងជើងភូមិខ្វាវលិច ទៅភូមិតេជោភ្នំឆត្រ។
រថយន្តរងគ្រោះថ្នាក់ម៉ាក (Mazda Pick Up) ពណ៌ ស ពាក់ស្លាកលេខ កម្ពុជា MR. SELLA។ អ្នកបើកបរក៏បានរេបង្កូតក្រឡាប់ចូលក្នុងទឹកប្រឡាយស្លាប់មនុស្សទាំង ៤ នាក់ ក្នុងនោះ ស្រី ៣ នាក់ និងអ្នកបើកបរម្នាក់ អាយុ ៥៥ ឆ្នាំ។
របាយការណ៍បឋមដដែលបញ្ជាក់ថា៖ «ករណីគ្រោះថ្នាក់នេះដោយមូលហេតុ បើកបរល្បឿនលឿន ចំណុចផ្លូវកោង»។
អធិការនគរបាលស្រុកស្វាយចេក នៃខេត្តបន្ទាយមានជ័យ លោក ជា ស្លូញ បានប្រាប់ ភ្នំពេញ ប៉ុស្តិ៍ថា គ្រោះថ្នាក់នេះអាចកើតឡើងដោយបុគ្គលអ្នកបើកបរធ្វេសប្រហែស។
លោកថា៖«គាត់បានបើកបរពីផ្លូវជាតិ ៥៦ ទៅរកផ្លូវជាតិលេខ ៥៨ ដល់ចំណុចផ្លូវកែងកន្លែងនោះមានលូ ហើយមានទឹក ដោយសារភ្លៀងយប់មិញផងនោះ ហើយមិនដឹងជាមូលហេតុអីធ្លាក់ចូលប្រឡាយតែម្តង។ បើនិយាយជារួមគាត់ងាកនិយាយគ្នា ព្រោះយើងមើលកន្លែងហ្រ្វាំង និងកន្លែងផ្សេងទៀតអត់មានខូចទេ»។
លោកបន្តថា ដោយសារទីតាំងនោះជាកន្លែងមិនសូវមានមនុស្សរស់នៅ ក្រោយកើតហេតុប្រមាណ៣០នាទី ទើបអាជ្ញាធរទទួលបានដំណឹង និងចាត់ចែងបញ្ជូនមនុស្សទៅសង្គ្រោះ តែហួស ពេលទៅហើយ។
លោកឱ្យដឹងដែរថា អ្នកស្លាប់ទាំង ៤ នាក់ នោះរស់នៅភូមិយាងថ្មី ឃុំនិម្មិត ស្រុកអូរជ្រៅ ខេត្តបន្ទាយមានជ័យ។ អ្នកបើកបរភេទប្រុសអាយុ ៥៥ ឆ្នាំ និងអ្នករួមដំណើរស្រីទាំងអស់ដែលមានអាយុ ៥៣ ឆ្នាំ អាយុ ៤២ឆ្នាំ និងក្មេងស្រីអាយុ៦ ឆ្នាំម្នាក់ផងដែរ។
យោងតាមរបាយការណ៍ របស់អគ្គស្នងការដ្ឋាននគរបាលជាតិឱ្យដឹងថា នៅថ្ងៃទី ១៩ ខែ សីហា ឆ្នាំ ២០២១ មានករណីគ្រោះថ្នាក់ចរាចរណ៍ នៅទូទាំងប្រទេសកើតឡើងចំនួន ៧ លើក បណ្ដាលឱ្យមនុស្សស្លាប់ ៣ នាក់ និងរបួសធ្ងន់ស្រាល ៦ នាក់៕
វីដេអូ៖