សៀមរាបៈ ក្នុងគោលបំណងធានាដល់ប្រសិទ្ធភាពនៃការគ្រប់គ្រងការឆ្លងរាលដាលនៃជំងឺកូវីដ ១៩ និងសំដៅការពារសុខភាពសាធារណៈ អាយុជីវិតរបស់ប្រជាពលរដ្ឋ និងសណ្តាប់ធ្នាប់សាធារណៈ រដ្ឋបាលខេត្តសៀមរាបបានបន្តធ្វើការពង្រឹងការអនុវត្តវិធានការប្រយុទ្ធ និងទប់ស្កាត់ការឆ្លងរាលដាលនៃជំងឺនេះក្នុងភូមិសាស្ត្រខេត្តសៀមរាបដែលកំពុងប្រឈមនឹងការឆ្លងរាលដាលនៃជំងឺកូវីដ ១៩ ដែលបណ្តាលមកពីមេរោគបំប្លែងខ្លួនថ្មីប្រភេទដែលតា (Delta) និងព្រឹត្តិការណ៍សហគមន៍ ២០ កុម្ភៈ។
លោក ទៀ សីហា អភិបាលខេត្តសៀមរាបបានធ្វើការណែនាំទៅដល់រដ្ឋបាលក្រុង-ស្រុក មន្ទីរ-អង្គភាពត្រូវបន្តរឹតបន្តឹងការអនុវត្តវិធានការសុខាភិបាល វិធានការរដ្ឋបាល និងវិធានការច្បាប់ឱ្យបានម៉ឺងម៉ាត់ និងតឹងរ៉ឹង។
លោកថា៖ «ត្រូវបង្កើនការយកចិត្តទុកដាក់ក្នុងការចាត់វិធានការចាំបាច់នានាក្នុងភូមិសាស្ត្រដែលស្ថិតនៅក្រោមសមត្ថកិច្ចរបស់ខ្លួន ដើម្បីធានាឱ្យបាននូវការគោរព និងអនុវត្តនូវវិធានការសុខាភិបាលនានាក្នុងការប្រយុទ្ធ និងទប់ស្កាត់ការឆ្លងរាលដាលនៃជំងឺកូវីដ ១៩ ជាពិសេសកាតព្វកិច្ចពាក់ម៉ាស់ និងកាតព្វកិច្ចរក្សាគម្លាតសុវត្ថិភាព តាមទីតាំងសាធារណៈនានា»។
លោក ទៀ សីហា ក៏បានសម្រេចបន្តផ្អាកជាបណ្តោះអាសន្នចំពោះសកម្មភាព មុខរបរ និងអាជីវកម្ម ដែលមានហានិភ័យខ្ពស់នៃការឆ្លងរាលដាលនៃជំងឺកូវីដ ១៩ ដូចជា ក្លិបកម្សាន្តគ្រប់ប្រភេទ សាលារៀន រួមទាំងសាលាបណ្តុះបណ្តាលវិជ្ជាជីវៈទាំងរដ្ឋ និងឯកជន លើកលែងតែសាលារៀនដែលធ្វើការបណ្តុះបណ្តាលតាមប្រព័ន្ធអនឡាញ និងទីតាំងសំខាន់ៗមួយចំនួនទៀត រួមនឹងការជួបជុំ និងការប្រមូលផ្តុំមនុស្សជាលក្ខណៈឯកជន ដែលមានមនុស្សចូលរួមលើសពី ១០ នាក់ផងដែរ។
ទន្ទឹមនឹងនេះដែរ អភិបាលខេត្តរូបនេះក៏ផ្អាកការលក់គ្រឿងស្រវឹង គ្រប់ប្រភេទ និងការជួបជុំប្រមូលផ្តុំគ្នាពិសារគ្រឿងស្រវឹងគ្រប់ប្រភេទជាបណ្តោះអាសន្នផងដែរក្នុងភូមិសាស្ត្រខេត្តសៀមរាបនេះ។
លោក ទៀ សីហា បានបញ្ជាក់ថា៖ «ក្នុងករណីបុគ្គលណា ម្ចាស់ ឬអ្នកគ្រប់គ្រងក្រុមហ៊ុន សហគ្រាស ដេប៉ូចែកចាយ សណ្ឋាគារ ផ្ទះសំណាក់ ភោជនីយដ្ឋាន អាហារដ្ឋាន ផ្សាររដ្ឋ-ឯកជន ផ្សារទំនើប ហាងលក់ភេសជ្ជៈ និងកន្លែងលក់ទំនិញគ្រប់ប្រភេទ មិនអនុវត្តតាមការណែនាំនេះអាជ្ញាធរមានសមត្ថកិច្ចនឹងចាត់វិធានការស្របតាមនីតិវិធីច្បាប់ និងលិខិតបទដ្ឋានគតិយុត្តជាធរមាន»៕