.jpg)
អាជ្ញាធរខេត្តកំពង់ចាមកំពុងធ្វើការពិនិត្យ និងសិក្សាទីលានសម្រាប់ចាក់សំរាមថ្មី សម្រាប់បំពេញតម្រូវការផ្ទុកសំរាម។ ក្រសួងមហាផ្ទៃ
កំពង់ចាមៈ អាជ្ញាធរខេត្តកំពង់ចាមកំពុងធ្វើការពិនិត្យ និងសិក្សាទីលានសម្រាប់ចាក់សំរាមថ្មី សម្រាប់បំពេញតម្រូវការផ្ទុកសំរាម ដែលមានការកើនឡើងនាពេលខាងមុខ តាមរយៈការពិនិត្យ និងចុះសិក្សារបស់មន្ទីរបរិស្ថាន និងអាជ្ញាធរមូលដ្ឋាន។
អាជ្ញាធរខេត្តបានជ្រើសរើសទីលានសម្រាប់ចាក់សំរាមចំនួន ២ គោលដៅ ដែលគោលដៅទី ១ ស្ថិតនៅក្នុងស្រុកកងមាស និងគោលដៅទី ២ ស្ថិតក្នុងស្រុកកំពង់សៀម។
ក្នុងពេលចុះពិនិត្យទីលានចាក់សំរាម ១ កន្លែង ក្នុងភូមិកោះរកាក្នុងឃុំកោះរកា ស្រុកកំពង់សៀម សម្រាប់ធ្វើជាទីកន្លែងចាក់សំរាមក្នុងក្របខ័ណ្ឌខេត្តកំពង់ចាមកាលពីថ្ងៃទី ២៥ ខែសីហា លោក អ៊ុន ចាន់ដា អភិបាលខេត្តកំពង់ចាមបានលើកឡើងថា ដោយសារកំណើនសេដ្ឋកិច្ច និងកត្តារីកចម្រើនផ្នែកជីវភាពប្រចាំថ្ងៃរបស់ប្រជាពលរដ្ឋ ក្នុងការប្រើប្រាស់ប្រចាំថ្ងៃទើបមានការកើនឡើងនៃចំនួនសំរាម។
ពិសេសការរៀបចំអនាម័យបរិស្ថាន និងការចោលកាកសំណល់ប្រើប្រាស់ប្រចាំថ្ងៃដែលតម្រូវឱ្យអាជ្ញាធរមូលដ្ឋានពិនិត្យ និងសិក្សាពីលទ្ធភាពនៃការពង្រីកទីលានចាក់សំរាមចាស់ដែលខេត្តមានសម្រាប់បំពេញតម្រូវការនាពេលខាងមុខដ៏ខ្លីនេះ។
លោកមានប្រសាសន៍ថា៖ «ផ្អែកតាមកំណើននៃប្រជាពលរដ្ឋ និងការប្រើប្រាស់សំរាមក៏មានការកើនឡើងពីមួយថ្ងៃទៅមួយថ្ងៃ ដែលកត្តាទាំងនេះហើយតម្រូវឱ្យអាជ្ញាធរខេត្ត សម្រេចចិត្តរកទីតាំងថ្មីបន្ថែមទៀត ដើម្បីគ្រប់គ្រងសំរាមប្រកបទៅដោយស្តង់ដា និងជំនួសឱ្យទីលានចាក់សំរាមចាស់ ដែលបានពោរពេញទៅដោយសំរាម និងកាកសំណល់ផ្សេងៗ»។
គោលដៅទីតាំង ២ កន្លែង ដែលអាជ្ញាធរបានជ្រើសរើសនោះ អាជ្ញាធរមើលឃើញថា មានតែដីនៅចំណុចដីទួលស្ថិតក្នុងឃុំកោះរកា ស្រុកកំពង់សៀម គ្រប់គ្រងដោយរដ្ឋមានទំហំប្រមាណជាង ១០ ហិកតា ដែលទំហំនេះត្រូវជាមួយស្តង់ដារបស់ក្រសួងបរិស្ថាន។
ផ្អែកតាមការសិក្សាជាក់ស្ដែង ទីតាំងនេះមានលក្ខណៈគ្រប់គ្រាន់ សម្រាប់ធ្វើជាទីលានចាក់សំរាមស្តង់ដាក្នុងក្របខ័ណ្ឌខេត្តកំពង់ចាម។
លោក អ៊ុន ចាន់ដា បានបន្ថែមថា ទីតាំងនេះមានចម្ងាយឆ្ងាយពីលំនៅឋានរបស់ប្រជាពលរដ្ឋ ដែលមិនធ្វើឱ្យរងផលប៉ះពាល់បរិស្ថាននោះឡើយ។
បច្ចុប្បន្ន ខេត្តកំពង់ចាមមិនទាន់មានទីលានសម្រាប់ចាក់សំរាមទៅតាមស្តង់ដានោះទេ ដោយខេត្តនៅប្រើប្រាស់ទីលានចាស់របស់ក្រុមហ៊ុនស៊ីនទ្រី ស្ថិតក្នុងឃុំបូសខ្នុរ ស្រុកចំការលើ៕
