ភ្នំពេញៈ ក្រសួងសុខាភិបាលប្រកាសរកឃើញអ្នកឆ្លងវីរុសកូវីដ ១៩ បំប្លែងថ្មីប្រភេទដែលតា (Delta) បន្ថែមទៀត ចំនួន ១៦៤ ករណី ក្នុងរយៈពេល ២ ថ្ងៃ ពីថ្ងៃទី ២៩-៣០ សីហា ដែលធ្វើឱ្យកម្ពុជាមកដល់ពេលនេះមានអ្នកឆ្លងវីរុសប្រភេទនេះជិត ២ ០០០ នាក់ហើយ ក្នុងរាជធានី-ខេត្ត ចំនួន ២៣ លើកលែងតែខេត្តចំនួន ២ ប៉ុណ្ណោះ គឺខេត្តកែប និងខេត្តក្រចេះ។
សេចក្តីប្រកាសព័ត៌មានរបស់ក្រសួងសុខាភិបាលនៅព្រឹកថ្ងៃទី ៣១ ខែសីហា នេះ បានឱ្យដឹងថា លទ្ធផល នៃការវិភាគរបស់វិទ្យាស្ថានប៉ាស្ទ័រកម្ពុជា និងវិទ្យាស្ថានស្រាវជ្រាវសុខភាពសាធារណៈ ចាប់តាំងពីចុងខែមីនា រហូតមកដល់ថ្ងៃទី ៣០ ខែសីហានេះ កម្ពុជាមានអ្នកឆ្លងវីរុសប្រភេទដែលតាសរុបចំនួន ១ ៩១៦ នាក់។ ក្នុងនោះរាជធានីភ្នំពេញមានអ្នកឆ្លងច្រើនជាងគេរហូតដល់ ៦១៨ នាក់។
លោក ម៉ម ប៊ុនហេង រដ្ឋមន្រ្តីក្រសួងសុខាភិបាលបានឱ្យដឹងថា ការចម្លងវីរុសកូវីដ ១៩ នាពេលបច្ចុប្បន្ន មានសម្ទុះកើនឡើងលើយុវវ័យ ដែលក្រុមនេះបានដើរចេញក្រៅផ្ទះច្រើន ឬមានការជួបជុំមិត្តភក្តិ។
លោកបានអំពាវនាវទៅដល់យុវវ័យគ្រប់រូប ត្រូវចូលរួមអនុវត្តនូវគោលការណ៍ណែនាំរបស់ក្រសួងសុខាភិបាលឱ្យបានត្រឹមត្រូវ និងហ្មត់ចត់ ដើម្បីការពារខ្លួននិងក្រុមគ្រួសារ៕