ភ្នំពេញៈ ក្រសួងសុខាភិបាលបានឱ្យដឹងថា មនុស្សចំនួន ១៣ នាក់បន្ថែមទៀត បានស្លាប់ដោយសារជំងឺកូវីដ ១៩ និងបានរកឃើញអ្នកឆ្លងថ្មីបន្ថែមទៀតជាង ៤០០ ខណៈមានអ្នកជាសះស្បើយតែជាង ៣០០ នាក់។
យោងតាមសេចក្តីប្រកាសរបស់ក្រសួងសុខាភិបាលនៅព្រឹកថ្ងៃទី ១ ខែកញ្ញានេះ បានឱ្យដឹងថា ក្រសួងបានរកឃើញអ្នកវិជ្ជមានវីរុសកូវីដ ១៩ ចំនួន ៤៥៥ នាក់ទៀត និងមានអ្នកជាសះស្បើយចំនួន ៣២៨ នាក់។ អ្នករកឃើញវិជ្ជមានបន្ថែមនេះ មានករណីឆ្លងក្នុងសហគមន៍ចំនួន ៣៧៥ នាក់ និងអ្នកដំណើរពីបរទេសចំនួន ៨០ នាក់។
គិតត្រឹមព្រឹកថ្ងៃទី ១ ខែ កញ្ញា ឆ្នាំ ២០២១ សម្រាប់ប្រទេសកម្ពុជា មានអ្នកឆ្លងវីរុសកូវីដ ១៩ សរុបចំនួន ៩៣ ៥១០ នាក់ អ្នកជាសះស្បើយ ចំនួន ៨៩ ១១៤ នាក់ និងអ្នកស្លាប់បានកើនឡើងរហូតដល់ ១ ៩១៦ នាក់៕