.jpg)
ទិដ្ឋភាពរាំងស្ងួតនៅស្រុកក្រឡាញ់ ខេត្តសៀមរាប ពីថ្ងៃទី ១៨ សីហា។ រូបថត សហការី
ភ្នំពេញៈ មន្ត្រីជំនាញផ្នែកកសិកម្មកំពុងបន្តលើកទឹកចិត្តដល់កសិករក្នុងតំបន់វាលទំនាបដែលងាយរងគ្រោះដោយភាពរាំងស្ងួត និងទឹកជំនន់ឱ្យងាកមកដាំដុះពូជស្រូវផ្កាមាលតី ដើម្បីធានាដល់សន្តិសុខស្បៀង ព្រោះដើមរបស់វាមានលក្ខណៈធំខ្ពស់រឹងមាំ ហើយធន់ទ្រាំនឹងការប្រែប្រួលអាកាសធាតុ។
លោក ឡោ ប៊ុណ្ណា នាយកវិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជាបានប្រាប់ ភ្នំពេញ ប៉ុស្តិ៍ថា ពូជស្រូវផ្កាមាលតី ជាប្រភេទពូជស្ថិតក្នុងក្រុមស្រូវប្រណីតដែលមានគុណភាពល្អប្រសើរធន់នឹងអាកាសធាតុរាំងស្ងួត ទឹកជំនន់ និងមិនងាយដួលរលំបាក់ដើមនោះទេ ប៉ុន្តែវាជាប្រភេទពូជប្រកាន់រដូវ ដែលអនុញ្ញាតឱ្យកសិករដាំដុះវាតែក្នុងរដូវវស្សាប៉ុណ្ណោះ។
លោកបានពន្យល់ថា៖ «ពូជស្រូវផ្កាមាលតី ដែលជាពូជប្រកាន់រដូវនេះ ជាទូទៅយើងអាចដាំវាចាប់ពីពាក់កណ្ដាលខែឧសភា ឬក្នុងដើមខែមិថុនា និងយ៉ាងយូរបំផុតមិនឱ្យហួសក្នុងរង្វង់សប្ដាហ៍ទី ១ នៃខែកញ្ញា ព្រោះវាចាប់ផ្ដើមចេញផ្កានៅក្នុងរង្វង់ខែតុលា ដែលអនុញ្ញាតឱ្យកសិករអាចប្រមូលផលបានចាប់ពីពាក់កណ្ដាលខែវិច្ឆិកា រហូតដល់ដើមសប្ដាហ៍ទី ២ នៃខែធ្នូ»។
បើតាមលោក ប៊ុណ្ណា កសិករក្នុងតំបន់ងាយរងគ្រោះដោយទឹកជំនន់ និងភាពរាំងស្ងួតនៅមានសង្ឃឹមច្រើនក្នុងការបង្កបង្កើនផល ព្រោះនៅមានពេល ១ សប្ដាហ៍ទៀត ដើម្បីដាំដុះពូជស្រូវផ្កាមាលតីនេះ។ ម្យ៉ាងទៀតចាប់ពីពេលនេះដល់ចុងខែតុលា ខាងមុខ មិនមានកូនរដូវប្រាំងទៀតនោះទេ។
ទោះយ៉ាងណា លោក ប៊ុណ្ណា បានព្រមានថា៖ «ក្នុងករណីបងប្អូនប្រជាកសិករយើងយកពូជស្រូវផ្កាមាលតីមកដាំនៅក្នុងរង្វង់ខែវិច្ឆិកា ធ្នូ វិញនោះ ដូច្នេះពួកគាត់ត្រូវរង់ចាំដល់ខែតុលា ឬខែវិច្ឆិកា ឆ្នាំក្រោយ ទើបអាចប្រមូលផលបាន»។
ពូជស្រូវផ្កាមាលតីជាប្រភេទស្រូវបង្កាត់ឡើងរវាងពូជស្រូវក្រអូបរំដួល (មេ) និងពូជស្រូវកណ្ដាលខា ៣ (បា)។
នៅក្នុងឆ្នាំ ២០១៨ ពូជស្រូវប្រភេទនេះត្រូវបានផ្ដល់ឱ្យកសិករចំនួន ២៣១ នាក់ ក្នុងខេត្តគោលដៅចំនួន ៦ រួមមាន ខេត្តឧត្តរមានជ័យ បាត់ដំបង ពោធិ៍សាត់ កំពង់ធំ ស្វាយរៀង និងព្រៃវែង យកទៅដាំដុះ។ ផ្អែកលើលទ្ធផលនៃការធ្វើស្រែបង្ហាញចំនួន ២២០ ទីតាំងពូជស្រូវផ្កាមាលតីនេះមានការលូតលាស់ល្អ និងទទួលបានទិន្នផលខ្ពស់ជាងពូជស្រូវកសិករ ជាមធ្យម ១៤ ភាគរយ និង ២៧ ភាគរយក្នុងលក្ខខណ្ឌកូនរដូវប្រាំងអូសបន្លាយរយៈពេលយូរ។ រហូតមកទល់បច្ចុប្បន្ននេះបណ្ដាខេត្តគោលដៅទាំងនោះបានផលិតពូជស្រូវផ្កាមាលតីបានសរុបចំនួន ៤០ តោនហើយ។
នេះបើតាមរបាយការណ៍វិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជា។
ថ្វីបើយ៉ាងដូច្នេះក្ដី ពូជស្រូវផ្កាមាលតីនេះនៅមិនទាន់ជាទីពេញនិយមសម្រាប់ប្រជាកសិករទូទៅនៅឡើយទេ ដោយសារតែវាជាប្រភេទស្រូវប្រកាន់រដូវដែលខុសពីស្រូវសែនក្រអូប ០១។ នេះបើតាមលោក គង់ គា ប្រធាននាយកដ្ឋានដំណាំស្រូវ។
លោកបានប្រាប់ភ្នំពេញប៉ុស្តិ៍ថា ប៉ុន្មានឆ្នាំកន្លងមកនេះ ក្រសួងកសិកម្មបានណែនាំដល់គ្រប់មន្ទីរអង្គភាព និងស្ថាប័នពាក់ព័ន្ធនានារួមទាំងសហព័ន្ធស្រូវអង្ករផងឱ្យជួយលើកទឹកចិត្តដល់កសិករក្នុងការដាំដុះ និងប្រមូលទិញស្រូវពីកសិករ ដើម្បីជំរុញដល់ការនាំចេញទៅទីផ្សារក្រៅប្រទេស។ ជាពិសេសផលិតផលស្រូវពូជសុទ្ធដែលត្រូវបានវិទ្យាស្ថានស្រាវជ្រាវ និងអភិវឌ្ឍន៍កសិកម្ម កម្ពុជា ផ្សព្វផ្សាយ និងផ្ដល់ជូនឱ្យកសិករដាំដុះ។
លោក គង់ គា បានបញ្ជាក់ថា៖ «មែនទែនទៅ មកទល់ពេលនេះ ពូជស្រូវផ្កាមាលតី គេមិនទាន់ស្គាល់ច្រើនទេ។ យើងត្រូវការជំរុញផ្សព្វផ្សាយច្រើនបន្ថែមទៀតទៅកាន់ប្រជាកសិករ រោងម៉ាស៊ីនកិនស្រូវ និងសហព័ន្ធស្រូវអង្ករឱ្យដាំដុះ និងប្រមូលទិញវាសម្រាប់ផ្គត់ផ្គង់ទីផ្សារក្នុងស្រុក ព្រោះវាផ្ដល់ទិន្នផលខ្ពស់គឺចន្លោះពី ៤,៥ តោនទៅ ៥,៥ តោនក្នុង ១ ហិកតា។ ម្យ៉ាងទៀតវាធន់ទ្រាំនឹងអាកាសធាតុ រាំងស្ងួត និងទឹកជំនន់»។
បើតាមលោក គង់ គា បច្ចុប្បន្នស្រូវសែនក្រអូប ០១ ដែលជាស្រូវមិនប្រកាន់រដូវកំពុងពេញនិយមដែលប្រជាកសិករភាគច្រើនបានដាំដុះទាំងប្រាំង និងវស្សា ហើយកន្លែងខ្លះដាំដុះបានរហូតដល់ ៣ ដងឯណោះក្នុង ១ ឆ្នាំ ព្រោះពូជស្រូវនេះ ដាំដុះត្រឹមតែ ១១៥ ថ្ងៃប៉ុណ្ណោះអាចប្រមូលផលបានហើយ។
លោកបានបន្ថែមថា៖ «នៅពេលនេះក្រសួងកំពុងជំរុញការដាំដុះពូជស្រូវសែនក្រអូបពិសេសស្រូវសែនក្រអូប ០១ ដើម្បីពង្រឹងការនាំចេញទៅទីផ្សារអន្តរជាតិ»។
ជុំវិញករណីនេះ លោក សុង សារ៉ន ប្រធានសហព័ន្ធស្រូវអង្ករកម្ពុជាបានប្រាប់ ភ្នំពេញ ប៉ុស្តិ៍ថា សហព័ន្ធកំពុងប្រមូលទិញស្រូវក្រអូបគ្រប់ប្រភេទពីកសិករនៅទូទាំងប្រទេសលើកលែងតែនៅតាមតំបន់ជាប់ព្រំដែន។ ព្រោះកសិករនៅតាមតំបន់ជាប់ព្រំដែនគាត់ដឹកយកទៅលក់នៅប្រទេសជិតខាងដោយខ្លួនឯង ឬឈ្មួញពីប្រទេសជិតខាងគេចុះមកទិញផ្ទាល់។
លោកបញ្ជាក់ថា៖ «សហព័ន្ធយើងលើកទឹកចិត្តឱ្យកសិករផលិតស្រូវក្រអូបឱ្យបានច្រើន ព្រោះវាមានតម្លៃខ្ពស់ជាងស្រូវធម្មតា ហើយវាក៏មានតម្រូវការទីផ្សារខ្ពស់ផងដែរ។ ពេលនេះ សហព័ន្ធកំពុងប្រមូលទិញស្រូវក្រអូបគ្រប់ប្រភេទ រួមទាំងស្រូវសែនក្រអូប ០១ ផង សម្រាប់នាំចេញទៅទីផ្សារអន្តរជាតិនៅឆ្នាំនេះ»។
ថ្វីបើមិនបានបញ្ជាក់អំពីតួលេខនៃផលស្រូវដែលសហព័ន្ធស្រូវអង្ករកម្ពុជាបានប្រមូលទិញពីកសិករនៅក្នុងឆ្នាំនេះក្ដី ក៏លោក សារ៉ន បានឱ្យដឹងថា សហព័ន្ធគ្រោងនាំចេញផលិតផលស្រូវអង្ករក្រអូបមួយចំនួនរួមទាំងស្រូវសែនក្រអូប ០១ ផងដែរទៅកាន់ទីផ្សារក្រៅប្រទេសក្នុងខែតុលាខាងមុខនេះ៕
