.jpg)
វ៉ាក់សាំងកូវីដ ១៩ ប្រភេទស៊ីណូវ៉ាក់ចំនួន ២,៥ លានដូសទៀត ដឹកមកដល់ពីថ្ងៃ ៤ កញ្ញា។ ហេង ជីវ័ន
ភ្នំពេញៈ មន្ត្រីជាន់ខ្ពស់ក្រសួងសុខាភិបាលបានឱ្យដឹងថា អ្នកជំងឺកូវីដ ១៩ ដែលមិនមានលទ្ធភាពបង្កើតអង់ទីគ័រដោយខ្លួនឯង គឺអ្នកជំងឺនោះមិនអាចជាសះស្បើយពីជំងឺនេះបានទេ ដែលហេតុនេះហើយ បានជាក្រសួងមិនចាំបាច់តម្រូវឱ្យអ្នកដែលជាពីជំងឺនេះហើយ ត្រូវចាក់វ៉ាក់សាំងភ្លាមៗនោះទេ ទោះជាអ្នកនោះបានឆ្លងវីរុសនេះ បន្ទាប់ពីបានចាក់ដូសទី ១ រួច ឬដូសទី ២ រួចហើយក៏ដោយ។
ជាមួយគ្នានេះដែរ សម្រាប់អ្នកដែលបានឆ្លងវីរុសកូវីដ ១៩ ហើយក៏ដោយ ក៏នៅតែមានលទ្ធភាពឆ្លងនូវវីរុសកូវីដ ១៩ បំប្លែងថ្មីផងដែរ។ ទាំងនេះជាការលើកឡើងរបស់លោកស្រី ឱ វណ្ណឌីន អ្នកនាំពាក្យក្រសួងសុខាភិបាល និងជាប្រធានគណៈកម្មការចំពោះកិច្ច ចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេសកាលពីថ្ងៃទី ២ ខែកញ្ញា។
លោកស្រីបានមានប្រសាសន៍ថា៖ «មានអ្នកដែលមិនទាន់បានចាក់វ៉ាក់សាំងសោះ មានអ្នកបានចាក់ដូសទី ១ ហើយ និងមានអ្នកដែលបានចាក់ដូសទី ២រួច ពួកគាត់បានឆ្លងនូវមេរោគកូវីដ ១៩ ហើយនៅពេលដែលពួកគាត់បានជាសះស្បើយហើយ ពួកគាត់មិនមានភាពចាំបាច់អីត្រូវទៅចាក់វ៉ាក់សាំងភ្លាមនោះទេ»។
លោកស្រីបញ្ជាក់ថា៖ «អ្នកដែលបានឈឺរួចហើយនោះ បានបង្កើតអង់ទីគ័រនៅក្នុងសរីរាង្គរបស់គាត់រួចហើយ ប្រសិនបើសរីរាង្គរបស់គាត់ មិនមានលទ្ធភាពក្នុងការបង្កើតអង់ទីគ័រទេ អ្នកនោះនឹងមិនជាសះស្បើយទេ។ អ្នកបច្ចេកទេសបាននិយាយពីចំណុចនេះយ៉ាងច្បាស់»។
មានការសង្កេតឃើញថា បុគ្គលខ្លះឆាប់ជាសះស្បើយ ហើយបុគ្គលខ្លះជាយឺត ដោយសារតែសរីរាង្គមានការឆ្លើយតបយឺតគួបផ្សំជាមួយនឹងការថែទាំ និងការប្រតិបត្តិទៅតាមការណែនាំរបស់ក្រុមគ្រូពេទ្យ។ លោកស្រីថ្លែងថា វ៉ាក់សាំងជារឿងមួយសម្រាប់ជួយឱ្យមានកងការពារ ប៉ុន្តែអ្វីដែលសំខាន់គឺពលរដ្ឋគ្រប់រូបត្រូវការការពារខ្លួនដើម្បីកុំឱ្យឆ្លងវីរុសកូវីដ ១៩។
ទន្ទឹមនឹងនេះដែរ លោកស្រី ឱ វណ្ណឌីន បញ្ជាក់ថា បច្ចុប្បន្ននេះគ្រប់គ្នាផ្តោតលើវីរុសកូវីដ ១៩ បំប្លែងថ្មីប្រភេទដែលតា ប៉ុន្តែកុំភ្លេចថា វីរុសកូវីដ ១៩ នេះមានការវិវឌ្ឍ (បំប្លែង) តទៅមុខទៀត។
លោកស្រីបញ្ជាក់ថា៖ «ដំបូងឡើយវីរុសប្រភេទអាល់ហ្វា មានការវាយលុកច្រើនខ្លាំង ហើយពេលនោះក៏មានប្រជាពលរដ្ឋយើងបានស្លាប់ជាបន្តបន្ទាប់ ក្រោយមកយើងក៏រកឃើញមានការឆ្លងរាលដាលនូវវីរុសប្រភេទដែលតាដែលឆ្លងតាមរយៈការចល័តរបស់មនុស្ស»។
លោកស្រី ឱ វណ្ណឌីន បានសង្កត់ធ្ងន់ថា៖ «បុគ្គលម្នាក់មិនមែនឆ្លងវីរុសកូវីដ ១៩ ហើយលែងឆ្លងទៀតនោះទេ។ ឧទាហរណ៍ បុគ្គលម្នាក់បានឆ្លងវីរុសកូវីដប្រភេទអាល់ហ្វាហើយក៏អាចឆ្លងវីរុសប្រភេទដែលតាទៀត ឬក៏អាចឆ្លងប្រភេទផ្សេងទៀតបានដែរ»។
លោកស្រីបានបន្តអំពាវនាវទៅដល់ប្រជាពលរដ្ឋទាំងអស់ កុំភ្លេចខ្លួន ដោយសំអាងចាក់វ៉ាក់សាំងហើយលែងការពារនោះទេ ប៉ុន្តែសុំកុំភ្លេចថា អ្នកដែលបានចាក់វ៉ាក់សាំងហើយក៏នៅតែមានលទ្ធភាពឆ្លងវីរុសកូវីដ ១៩ ដែរ។
វ៉ាក់សាំងកូវីដ ១៩ ប្រភេទស៊ីណូវ៉ាក់ចំនួន ២,៥ លានដូសក្នុងនោះ វ៉ាក់សាំងចំនួន ២ លានដូស ជាការបញ្ជាទិញរបស់រាជរដ្ឋាភិបាលកម្ពុជា និង ៥០ ម៉ឺនដូសទៀតជាការបរិច្ចាគរបស់ក្រុមហ៊ុន ស៊ីណូវ៉ាក់ជូនដល់រដ្ឋាភិបាលបានដឹកមកដល់កម្ពុជា កាលពីព្រឹកថ្ងៃទី ៤ ខែ កញ្ញា ឆ្នាំ ២០២១។
លោកនាយករដ្ឋមន្ត្រី ហ៊ុន សែន បានឱ្យដឹងថា វត្តមានដ៏ច្រើននៃវ៉ាក់សាំងរបស់ចិនបានរួមចំណែកដ៏សំខាន់ជួយឱ្យកម្ពុជាសម្រេចនូវផែនការចាក់វ៉ាក់សាំងជូនប្រជាពលរដ្ឋអាយុ ១២ ឆ្នាំឡើង ប្រមាណជា ១២ លាននាក់ បានសម្រេចមុនផែនការ។
លោកបន្ថែមថា៖ «វត្តមានវ៉ាក់សាំងបង្ការជំងឺកូវីដ ១៩ របស់ចិននៅកម្ពុជា បានបង្ហាញច្បាស់ពីស្មារតីនៃមិត្តភាពដែកថែបរវាងចិន និងកម្ពុជា ដែលជាស្មារតីជួយជ្រោមជ្រែងគ្នារាល់ការលំបាក។ ជាពិសេសបានបង្ហាញនូវស្មារតីចូលរួមដ៏ខ្លាំងក្លារបស់ចិនក្នុងការជួយប្រយុទ្ធប្រឆាំងនឹងជំងឺកូវីដ ១៩ នៅក្នុងប្រទេសកម្ពុជា»។
រាជរដ្ឋាភិបាលកម្ពុជា បានស្វះស្វែងយ៉ាងខ្លាំងក្នុងការរកវ៉ាក់សាំងមកចាក់ជូនពលរដ្ឋឥតគិតថ្លៃដែលពេលនេះកម្ពុជាបានទទួលវ៉ាក់សាំងបង្ការជំងឺកូវីដ ១៩ សរុបជិត ៣០ លានដូសហើយ ដើម្បីចាក់ជូនពលរដ្ឋក្នុងនោះប្រទេសចិនបានផ្គត់ផ្គង់វ៉ាក់សាំងដល់កម្ពុជាច្រើនជាងគេ។ ក្រៅពីនោះមានអង្គការសុខភាពពិភពលោកតាមរយៈយន្តការខូវ៉ាក់ប្រទេសជប៉ុន អង់គ្លេស និងសហរដ្ឋអាមេរិកតាមរយៈខូវ៉ាក់ផងដែរ។
គិតត្រឹមយប់ថ្ងៃទី ៤ ខែកញ្ញា ប្រជាពលរដ្ឋដែលមានអាយុចាប់ពី ១៨ ឆ្នាំឡើងបានចាក់វ៉ាក់សាំងរួចមានចំនួនសរុបជាង ៩,៥ លាននាក់ ឬស្មើនឹង ៩៥,៣៣% ធៀបជាមួយចំនួនប្រជាជនគោលដៅ ១០ លាននាក់ ចំណែកមនុស្សដែលមានអាយុ ១២ ឆ្នាំទៅក្រោម ១៨ ឆ្នាំបានចាក់វ៉ាក់សាំងមានចំនួនជាង ១,៦ លាននាក់ ឬស្មើនឹង ៨៤,៤២% ធៀបជាមួយនឹងប្រជាជនគោលដៅជិត ២ លាននាក់។ ជាមួយនេះ អ្នកដែលបានចាក់ដូសទី ៣ មានចំនួនជាង ៦៦ ម៉ឺននាក់ផងដែរ៕
វីដេអូ៖
