ភ្នំពេញៈ ចំនួនអ្នកស្លាប់ដោយសារជំងឺកូវីដ ១៩ ដែលរកឃើញថ្មីបានធ្លាក់មកនៅ ៦ នាក់ ប៉ុន្តែមានការរកឃើញអ្នកឆ្លងថ្មីបន្ថែមមានជិត ៦០០ នាក់ ខណៈមានអ្នកជាសះស្បើយត្រឹមតែជិត ៤០០ នាក់។ នេះបើតាមសេចក្តីប្រកាសរបស់ក្រសួងសុខាភិបាលនាព្រឹកថ្ងៃទី ៨ ខែ កញ្ញា ឆ្នាំ ២០២១ នេះ។
ក្រសួងបានឱ្យដឹងថា អ្នកដែលបានរកឃើញឆ្លងវីរុសកូវីដ ១៩ បន្ថែមទៀតនេះ មានចំនួន ៥៩៦ នាក់ និងអ្នកជាសះស្បើយមានចំនួន ៣៩៧ នាក់។ អ្នកដែលរកឃើញឆ្លងថ្មីនេះ មានករណីឆ្លងក្នុងសហគមន៍ចំនួន ៤១៩ នាក់ និងអ្នកដំណើរមកពីបរទេសចំនួន ១៧៧ នាក់។
គិតត្រឹមព្រឹក ថ្ងៃទី ៨ ខែ កញ្ញា ឆ្នាំ ២០២១ កម្ពុជាមានអ្នកឆ្លងវីរុសកូវីដ ១៩ សរុបចំនួន ៩៦ ៩៣៥ នាក់ អ្នកជាសះស្បើយសរុបចំនួន ៩២ ០១៥ នាក់ និងអ្នកស្លាប់បានកើនឡើងដល់ ១ ៩៨៧ នាក់៕