.jpg)
ផ្ទៃមេឃដែលមានពពកខ្មៅរកកល់ភ្លៀង នាថ្ងៃទី ១ កញ្ញា នៅរាជធានីភ្នំពេញ។ ហុង មិនា
ភ្នំពេញៈ លេខាធិការដ្ឋានគណៈកម្មការទន្លេមេគង្គ (MRC) ព្រមានថា ក្នុងរយៈពេលប៉ុន្មានថ្ងៃខាងមុខនេះតំបន់វាលទំនាប ជាប់មាត់ទឹក និងតំបន់ផ្ទៃរងទឹកភ្លៀង នៃអាងទន្លេមេគង្គក្រោម នឹងជួបប្រឈមគ្រោះជំនន់ទឹកភ្លៀង និងបញ្ហាបាក់ដីឬច្រាំង។ នេះបើតាមលោក Lam Hung Son ប្រធានលេខាធិការដ្ឋាន MRC នៃមជ្ឈមណ្ឌលគ្រប់គ្រងគ្រោះទឹកជំនន់និងគ្រោះរាំងស្ងួតប្រចាំតំបន់កាលពីថ្ងៃទី ១០ កញ្ញា។
លោកថ្លែងថា ព្យុះ Conson ដែលបានឆ្លងកាត់ប្រទេសហ្វីលីពីន ដែលគេស្គាល់ថា ជាព្យុះត្រូពិច Jolina កំពុងធ្វើអន្តរកម្មជាមួយព្យុះTyphoon មួយឈ្មោះ Chanthu កំពុងធ្វើដំណើរឆ្លងកាត់ភាគខាងជើង និងភាគកណ្ដាលនៃប្រទេសវៀតណម ដែលនឹងធ្វើឱ្យមានភ្លៀងធ្លាក់ខ្លាំង បង្កឱ្យមានជំនន់ទឹកភ្លៀងកើតឡើង។ ទន្ទឹមនឹងនេះ ខេត្តភាគខាងជើង និងភាគពាយព្យនៃប្រទេសកម្ពុជា ប្រទេសឡាវ និងប្រទេសថៃ ក៏នឹងអាចរងផលប៉ះពាល់ ដោយជំនន់ទឹកភ្លៀងនេះផងដែរ។
លោក Lam Hung Son បញ្ជាក់ថា៖ «យើងបានជូនដំណឹងដល់ទីភ្នាក់ងារជាតិនៅកម្ពុជា ឡាវ ថៃ និងវៀតណាម អំពីការមកដល់នៃព្យុះ Conson និងផលប៉ះពាល់ ដែលអាចកើតមានដោយសារឥទ្ធិពលនៃព្យុះនេះ។ តំបន់ទំនាបអាចជួបនឹងជំនន់ទឹកភ្លៀង បន្ទាប់ពីមានភ្លៀងធ្លាក់ខ្លាំងក្នុងរយៈពេលខ្លី។ ការរអិលបាក់ដី ដែលបង្កឡើងដោយទឹកភ្លៀងក៏អាចកើតមានផងដែរនៅតំបន់ដែលមានជម្រាលភ្នំខ្ពស់ៗ»។
យោងតាមព្រឹត្តិបត្រព្យាករណ៍កម្ពស់ទឹកទន្លេរបស់ក្រសួងធនធានទឹក និងឧតុនិយម ចេញផ្សាយនៅថ្ងៃទី១២ ខែកញ្ញា ឆ្នាំ២០២១បង្ហាញថា កម្ពស់ទឹកនៅគ្រប់ស្ថានីយជលសាស្ត្រទាំងអស់បានហក់ឡើងជាបន្តបន្ទាប់ រហូតដល់ថ្ងៃទី ១៥ កញ្ញា។ ក្នុងនោះ កម្ពស់ទឹកទន្លេមេគង្គនៅខេត្តស្ទឹងត្រែង គិតចាប់ពីថ្ងៃទី ១៣-១៥ កញ្ញា នឹងហក់ឡើងពីកម្រិត ៧.១៣ ម៉ែត្រ ដល់ ៧.៥០ ម៉ែត្រ ខណៈកម្ពស់ទឹកដែលត្រូវប្រកាសអាសន្ន គឺ ១០.៧០ ម៉ែត្រ។ ចំណែកកម្ពស់ទឹកទន្លេមេគង្គក្នុងខេត្តក្រចេះ គិតចាប់ពីថ្ងៃទី ១៣-១៥ ខែកញ្ញា នឹងហក់ឡើងពី ១៥.៩៧ ម៉ែត្រ ដល់ ១៦.៧៩ ម៉ែត្រ ខណៈកម្ពស់ទឹកដែលត្រូវប្រកាសអាសន្ន គឺ ២២ ម៉ែត្រ។
ទោះយ៉ាងណា ផ្ទះប្រជាពលរដ្ឋប្រមាណជិត ២៣០ ខ្នង នៅតំបន់វាលទំនាប ជាប់មាត់ទឹក នៃបណ្ដាស្រុកមួយចំនួនក្នុងខេត្តបន្ទាយមានជ័យ បានរងការជន់លិចនិងខូចខាតផ្លូវលំជនបទមួយចំនួនទៀត។ នេះបើតាមអាជ្ញាធរមូលដ្ឋាន។
លោក ស្វាយ ជា អភិបាលស្រុកម៉ាឡៃ ប្រាប់ ភ្នំពេញ ប៉ុស្តិ៍ថា ភ្លៀងបានធ្លាក់ជាបន្តបន្ទាប់ក្នុងកម្រិតពីបង្គួរទៅខ្លាំង បង្កឱ្យជន់លិចផ្ទះប្រជាពលរដ្ឋ ២២៨ ខ្នង នៅតំបន់អភិវឌ្ឍន៍បឹងជង្រុកតេជោឈ្នះឈ្នះ ស្ថិតក្នុងភូមិបឹងជ្រុក ឃុំទួលពង្រ។ កម្លាំងសមត្ថកិច្ចចម្រុះបានចុះអន្តរាគមន៍ជួយ ជម្លៀសពលរដ្ឋទៅកាន់ទីទួលមានសុវត្ថិភាព និងបានប្រើគ្រឿងចក្រកាយកាត់ផ្ដាច់ផ្លូវលំក្នុងភូមិមួយខ្សែ ដើម្បីរំដោះទឹក កាត់បន្ថយការជន់លិចលំនៅឋាន។
លោកនិយាយថា៖ «ក្រុមការងារយើងបានចុះជួយអន្តរាគមន៍ប្រជាពលរដ្ឋទាំងយប់ [ថ្ងៃទី ១១-៩-២០២១] គឺយើងបានប្រើគ្រឿងចក្រកាយផ្ដាច់ផ្លូវលំក្នុងភូមិជាបណ្ដោះអាសន្នបណ្ដើរ និងជម្លៀសពលរដ្ឋ ដែលផ្ទះរបស់គាត់ទឹកលិចចូលមិនអាចស្នាក់នៅបណ្ដើរ។ នៅពេលនេះ ទឹកបានស្រកចុះពីក្នុងភូមិបន្តិចហើយ ប៉ុន្តែមេឃនៅតែបន្តធ្លាក់ភ្លៀង»។
ដូចគ្នានេះ លោករ័ត្ន ដាស៊ីណង់ អភិបាលស្រុកមង្គលបូរី ក៏បានប្រាប់ ភ្នំពេញ ប៉ុស្តិ៍ នៅថ្ងៃទី ១២ កញ្ញាថា ដោយសារទឹកភ្លៀងផង និងទឹកដែលហូរចាក់ពីស្ទឹងបរវេលផងនោះ នៅពេលនេះទឹកនៅស្ទឹងមង្គលបូរី បានចាប់ផ្ដើមជន់ឡើង និងហូរលិចកាត់ផ្លូវ និងខ្នងប្រឡាយមួយចំនួនជាបណ្តើរៗនៅក្នុងឃុំសឿ។
លោកបញ្ជាក់ថា៖ «កម្រិតបរិមាណទឹក ដែលកំពុងជន់លិចក្នុងពេលនេះ គឺយើងនៅគ្រប់គ្រងបាននៅឡើយ។ យើងសូមឱ្យបងប្អូនប្រជាពលរដ្ឋ មានការប្រុងប្រយ័ត្នចំពោះបញ្ហាគ្រោះទឹកជំនន់នេះផងដែរ។ ជាពិសេសត្រូវបង្កើនការយកចិត្តទុកដាក់ពីសុវត្ថិភាពចំពោះក្មេងៗ និងចាស់ជរា ដែលជាសមាជិកក្រុមគ្រួសាររបស់ខ្លួនឱ្យបានល្អ»។
បើតាមលោកដាស៊ីណង់ ស្ថានភាពកម្រិតទឹកស្ទឹងមង្គលបូរី កំពុងហក់ឡើងយ៉ាងគំហុកនៅក្នុងឃុំសឿ ហើយបើមេឃនៅតែបន្តធ្លាក់ភ្លៀង និងមានទឹកហូរធ្លាក់មកពីភ្នំនិងប្រព័ន្ធដៃអូរមួយចំនួនជាប់ព្រំដែនថៃទៀតនោះ វាអាចនឹងបង្កជន់លិចដល់លំនៅឋានប្រជាពលរដ្ឋនៅឃុំសឿ និងឃុំ៣ទៀត រួមមានឃុំរហាត់ទឹក ចំណោម និងឃុំបត់ត្រង់។
ជាមួយគ្នានេះលោកបានអំពាវនាវដល់ប្រជាពលរដ្ឋទាំងអស់ត្រូវសម្អាតអនាម័យ បរិស្ថានជុំវិញលំនៅឋានឱ្យបានល្អស្អាតជាប់ជាប្រចាំ ដើម្បីបង្ការជំងឺឆ្លងនានា៕
វីដេអូ៖
