.jpg)
ក្រុមគ្រូពេទ្យបញ្ជូនសាកសពអ្នកជំងឺស្លាប់ដោយសារជំងឺកូវីដ ១៩ ទៅបូជានាពេលកន្លងទៅ។ រូបថត រដ្ឋបាលខេត្តព្រះវិហារ
ភ្នំពេញៈ ចំនួនអ្នកឆ្លងវីរុសកូវីដ ១៩ ក្នុងប្រទេសកម្ពុជា បានកើនឡើងទៅដល់ជាង ១០ ម៉ឺននាក់ហើយ ខណៈក្រសួងសុខាភិបាលបានប្រកាសរកឃើញអ្នកឆ្លងថ្មីបន្ថែមទៀតជាង ៦០០ នាក់ និងមានអ្នកជាសះស្បើយជាង ៤០០ នាក់ ឯអ្នកស្លាប់ដោយសារជំងឺកូវីដ ១៩ បន្ថែមមានចំនួន ៩ នាក់។
យោងតាមសេចក្តីប្រកាសរបស់ក្រសួងសុខាភិបាលនៅព្រឹកថ្ងៃទី ១៣ ខែកញ្ញានេះ បានឱ្យដឹងថា ក្រសួងបានរកឃើញអ្នកឆ្លងវីរុសកូវីដ ១៩ បន្ថែមមានចំនួន ៦២៩ នាក់ និងមានអ្នកជាសះស្បើយចំនួន ៤២២ នាក់។ ករណីដែលរកឃើញឆ្លងបន្ថែមនេះមានករណីឆ្លងក្នុងសហគមន៍ចំនួន ៥១៦ នាក់ និងអ្នកដំណើរពីបរទេសចំនួន ១១៣ នាក់។
គិតត្រឹមព្រឹកថ្ងៃទី ១៣ ខែ កញ្ញា ឆ្នាំ ២០២១ កម្ពុជាមានអ្នកឆ្លងវីរុសកូវីដ ១៩ សរុបចំនួន ១០០ ១៣៣ នាក់ អ្នកជាសះស្បើយសរុប ៩៤ ៣២៦ នាក់ និងអ្នកស្លាប់បានកើនឡើងដល់ ២ ០៤៩ នាក់៕
