.jpg)
លោកស្រី ឱ វណ្ណឌីន អ្នកនាំពាក្យក្រសួងសុខាភិបាល ប្រកាសបិទបញ្ចប់យុទ្ធនាការចាក់វ៉ាក់សាំងបង្ការជំងឺកូវីដ ១៩ នៅខេត្តពោធិ៍សាត់ កាលពីថ្ងៃទី ១២ កញ្ញ។ រូបថត ក្រសួងសុខាភិបាល
ភ្នំពេញៈ មន្ត្រីជាន់ខ្ពស់នៃក្រសួងសុខាភិបាលបានឱ្យដឹងថា យុទ្ធនាការនៃការចាក់វ៉ាក់សាំងកូវីដ ១៩ សម្រាប់មនុស្សអាយុពី ១៨ ឆ្នាំឡើងតាមគោលដៅកំណត់មនុស្ស ១០ លាននាក់នឹងអាចសម្រេចបានមុនផែនការដែលបានដាក់ចេញ ហើយនឹងប្រកាសបិទការចាក់វ៉ាក់សាំងជុំទី១ ក្នុងភូមិសាស្ត្រ ១០ ខេត្តទៀត។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស (គ. វ. ក-១៩) បានឱ្យដឹងកាលពីថ្ងៃទី ១២ ខែកញ្ញាថា គ. វ. ក-១៩ កំពុងតែជំរុញការចាក់វ៉ាក់សាំងនៅតាមបណ្តាខេត្តនានាដែលកំពុងតែបន្តចាក់វ៉ាក់សាំងនេះ ដោយសារខេត្តមួយចំនួនបានចាប់ផ្តើមចាក់ក្រោយខេត្តដែលបានប្រកាសបិទបញ្ចប់ជាបន្តបន្ទាប់នេះ។
លោកស្រីថ្លែងថា៖ «យើងបានធ្វើការផ្តល់វ៉ាក់សាំងនេះជាយុទ្ធសាស្ត្រផ្ការបស់សម្តេចតេជោនាយករដ្ឋមន្ត្រី ដែលការចែកវ៉ាក់សាំងនេះមិនស្មើគ្នាទេ ដោយសាររាជធានីខេត្តខ្លះបានចាប់ផ្តើមមុន ខ្លះបានជាបន្តបន្ទាប់។ អ៊ីចឹងហើយ បានជាយើងកំពុងតែធ្វើការជំរុញធ្វើយ៉ាងណាឱ្យអាជ្ញាធរកៀរគរ និងពន្យល់ឱ្យប្រជាពលរដ្ឋស្ម័គ្រចិត្តចាក់វ៉ាក់សាំងនេះឱ្យបានលឿន»។
លោកស្រី វណ្ណឌីន ថា៖ «ការពន្លឿននៃការចាក់វ៉ាក់សាំងនេះ គឺដើម្បីឈានទៅដល់ការបិទបញ្ចប់នូវយុទ្ធនាការចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេសនេះនៅពេលខាងមុខនេះ។ ការចាក់វ៉ាក់សាំងដែលនឹងឈានទៅដល់គោលដៅ ១០ លាននាក់របស់យើងនេះ ខ្ញុំរំពឹងថានឹងចប់នៅក្នុងដំណាច់ខែកញ្ញានេះ»។
លោកស្រីថ្លែងថា គិតត្រឹមថ្ងៃទី ១២ ខែកញ្ញា ខេត្តចំនួន ៦ បានប្រកាសបិទបញ្ចប់យុទ្ធនាការចាក់វ៉ាក់សាំងកូវីដ ១៩ រួចហើយ ហើយបន្តធ្វើការបិទជាបន្តបន្ទាប់ទៀតដែលក្នុងសប្តាហ៍នេះ មានប្រមាណជា ១០ ខេត្តបន្ថែមទៀត។
នៅថ្ងៃទី ១៣ ខែកញ្ញា រដ្ឋបាលខេត្តស្វាយរៀងក៏បានប្រកាសបិទយុទ្ធនាការចាក់វ៉ាក់សាំងកូវីដ ១៩ ជុំទី១ ជូនប្រជាពលរដ្ឋដែលមានអាយុចាប់ពី ១៨ ឆ្នាំឡើងក្នុងភូមិសាស្ត្រខេត្តនេះផងដែរ។
យោងតាមរបាយការណ៍របស់ក្រសួងសុខាភិបាលបានឱ្យដឹងថា គិតត្រឹមថ្ងៃទី ១២ ខែកញ្ញា ប្រជាពលរដ្ឋអាយុពី ១៨ ឆ្នាំឡើងជាង ៩,៧ លាននាក់ ឬស្មើនឹង ៩៧,៣៨% ធៀបជាមួយចំនួនប្រជាជនគោលដៅ ១០ លាននាក់ ហើយសម្រាប់មនុស្សអាយុពី ១២ ឆ្នាំ ទៅក្រោម ១៨ ឆ្នាំ ចំនួនមានជាង ១,៧ លាននាក់ស្មើនឹង ៨៦,៨៦% ធៀបជាមួយនឹងប្រជាជនគោលដៅជិត ២ លាននាក់ បានចាក់វ៉ាក់សាំងកូវីដ ១៩ រួចរាល់ហើយ។
ទន្ទឹមនឹងនេះដែរ នាថ្ងៃទី ១៣ ខែកញ្ញា ក្រសួងសុខាភិបាលបានធ្វើការណែនាំឱ្យប្រជាពលរដ្ឋទាំងអស់បង្កើនការប្រុងប្រយ័ត្នបន្ថែម ដើម្បីការពារការចម្លងវីរុសកូវីដ ១៩ បើទោះបីជាករណីឆ្លងជំងឺកូវីដ ១៩ ក្នុងប្រទេសបន្តធ្លាក់ចុះជាបន្តបន្ទាប់ជាទីមោទនៈ ក្នុងអំឡុងខែសីហារហូតដល់ដើមខែកញ្ញានេះក៏ដោយ។
នៅបណ្តាប្រទេសលើសកលលោក និងក្នុងតំបន់ស្ថានភាពនៃការឆ្លងរាលដាលជំងឺកូវីដ ១៩ នៅមិនទាន់មានការធូរស្បើយនៅឡើយទេ ជាក់ស្តែងបើយោងតាមរបាយការណ៍របស់អង្គការសុខភាពពិភពលោក រហូតមកដល់ថ្ងៃទី ៦ ខែកញ្ញា នៅលើពិភពលោកមានករណីជំងឺកូវីដ ១៩ ចំនួនជាង ២២០ លាន ៥ សែននាក់ ដែលក្នុងនោះមានអ្នកស្លាប់ចំនួនជាង ៤ លាន ៥ សែននាក់។ រីឯបណ្តាប្រទេសដែលមានភូមិផងរបងជាប់នឹងប្រទេសកម្ពុជាវិញក៏នៅតែមានការចម្លងខ្ពស់នៅឡើយ ទោះបីជាមានការថយចុះបន្តិចក៏ដោយ។
ក្រសួងសុខាភិបាលបានបញ្ជាក់ថា៖ «ប្រទេសកម្ពុជាយើង នាប៉ុន្មានថ្ងៃចុងក្រោយនេះ យើងសង្កេតឃើញថាចំនួនករណីជំងឺកូវីដ ១៩ មានការហក់ឡើងបន្តិចនៅតាមបណ្តាខេត្តមួយចំនួន»។
ប្រភពដដែលថា ការឆ្លងនេះក្រសួងសុខាភិបាលបានរកឃើញមានការផ្ទុះភាគច្រើនបានកើតឡើងនៅទីផ្សារលក់ដូរ ដែលមិនមែនជាផ្សារទំនើប គឺផ្សារលក់ដូរនៅតាមបណ្តាខេត្ត ក្រុង ភូមិ ទីប្រជុំជននានាជាដើម ដែលប្រជាពលរដ្ឋយើងមានការទៅទិញម្ហូបអាហារ និងគ្រឿងឧបភោគបរិភោគ ឬជួបជុំគ្នាបរិភោគ ជាដើម។
ដើម្បីធានាឱ្យបាននូវការទប់ស្កាត់ការចម្លងជំងឺកូវីដ ១៩ និងឆ្ពោះទៅកាន់ការរស់នៅតាមបែបគន្លងប្រក្រតីភាពថ្មី ក្រសួងសុខាភិបាលបានអំពាវនាវដល់ប្រជាពលរដ្ឋទាំងអស់កុំមានអារម្មណ៍ស្កប់ស្កល់ ដោយមានការពឹងផ្អែកទាំងស្រុងទៅលើវ៉ាក់សាំងនោះទេ។ ជាមួយគ្នានេះដែរ វីរុសកូវីដ ១៩ បំប្លែងថ្មីប្រភេទដែលតា (Delta) បាននិងកំពុងវាយលុកយ៉ាងលឿននៅបណ្តាប្រទេសជាង ១៣០ ប្រទេស រួមទាំងប្រទេសកម្ពុជាផងដែរ ដែលមានចំនួនករណីឆ្លងវីរុសបំប្លែងថ្មីនេះមានការកើនឡើងជារៀងរាល់ថ្ងៃដែលគួរឱ្យមានការព្រួយបារម្ភជាខ្លាំង។
ក្រសួងសុខាភិបាលបានឱ្យដឹងថា៖ «ការចូលរួមរបស់បុគ្គល និងសហគមន៍ក្នុងការទប់ស្កាត់ការចម្លងវីរុសកូវីដ-១៩នៅតែចាំបាច់បំផុត និងត្រូវអនុវត្តជាប់ជាប្រចាំទោះជាបងប្អូនទាំងអស់បានចាក់វ៉ាក់សាំងរួចហើយក៏ដោយ»។ ដូច្នេះពលរដ្ឋទាំងអស់ចូលរួមទប់ស្កាត់ការចម្លងវីរុសកូវីដ ១៩ ដោយអនុវត្តឱ្យបាននូវវិធានការ ៣ ការពារ និង ៣ កុំ៕
