.jpg)
គ្រូពេទ្យយកសំណាកគ្រូបង្រៀនកាលពីថ្ងៃម្សិលមិញ មុននឹងបើកសាលារៀនឡើងវិញ។ ហេង ជីវ័ន
ស្វាយរៀងៈ អ្នកនាំពាក្យក្រសួងសុខាភិបាល លោកស្រី ឱ វណ្ណឌីន បង្ហាញក្តីបារម្ភក្នុងករណីណាមួយ ដែលអាចនាំឱ្យមានការនាំចូលនូវវីរុសកូវីដ ១៩ បំប្លែងថ្មីប្រភេទមូ (Mu) ចូលមកក្នុងប្រទេសកម្ពុជា ដូចករណីការឆ្លងចូលនៃវីរុសប្រភេទអាល់ហ្វា និងដែលតា នាពេលកន្លងមកដែរ។ លោកស្រីអំពាវនាវដល់ពលរដ្ឋឱ្យមានការប្រុងប្រយ័ត្នពីវត្តមានមេរោគថ្មីនេះ។
ថ្លែងប្រាប់អ្នកសារព័ត៌មាននាថ្ងៃទី ១៣ កញ្ញា ក្នុងពេលបិទបញ្ចប់យុទ្ធនាការចាក់វ៉ាក់សាំងកូវីដ ១៩ នៅខេត្តស្វាយរៀង លោកស្រី ឱ វណ្ណឌីន ដែលក៏ជាប្រធានគណៈកម្មការចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស បញ្ជាក់ថា មកដល់ពេលនេះមិនទាន់មានព័ត៌មានណាមួយដែលបង្ហាញពីវត្តមាននៃការឆ្លងចូលនូវវីរុសកូវីដ ១៩ បំប្លែងថ្មីប្រភេទមូ នៅប្រទេសកម្ពុជាទេ។ លោកស្រីថា ជាការកត់សម្គាល់ មកដល់ពេលនេះមានប្រទេសប្រមាណជា ៣០ ទៅ ៤០ ហើយ ដែលបានឆ្លងរាលដាលនៃវីរុសកូវីដ ១៩ បំប្លែងថ្មីប្រភេទមូ (Mu) នេះ។
លោកស្រីថ្លែងថា៖ «ដូចនេះមិនខុសអ្វីពីអាល់ហ្វា ឬដែលតាទេ ប្រសិនបើបងប្អូនប្រជាពលរដ្ឋមិនបន្តអនុវត្តនូវការការពារទប់ស្កាត់នូវការចម្លងវីរុសកូវីដ-១៩នេះទេ ខ្ញុំគិតថា វីរុសប្រភេទមូនេះ ប្រហែលនឹងអាចមានដោយសារពីមុនយើងមិនមានវីរុសអាល់ហ្វា និងដែលតាទេ។ ប៉ុន្តែក្រោយមក ក៏មាន ១ ឬ ២ ករណី រហូតមានការចម្លងទៅដល់បងប្អូនយើង ពីព្រោះការអនុវត្តវិធានការការពារ មានការខ្វះចន្លោះ»។
មន្ត្រីនាំពាក្យរូបនេះបន្ថែមថា ទោះបីជាយ៉ាងណាកម្ពុជាបានអនុវត្តនូវវិធានការទប់ស្កាត់នេះ ដោយបានគ្រប់គ្រងសភាពការណ៍បានល្អប្រសើរ ដោយមិនបានបណ្តោយឱ្យសភាពការណ៍នេះទៅហួសពីសមត្ថភាពដែលនាំឱ្យមានមហន្តរាយសាធារណៈនោះទេ។
លោកស្រីអំពាវនាវថា៖ «សុំបងប្អូនយើងមានការប្រុងប្រយ័ត្នបន្តទៀត ហើយខ្ញុំសុំធ្វើការអំពាវនាវហើយអំពាវនាវទៀត សុំឱ្យបងប្អូនយើងបន្តការពារជាប់ជាប្រចាំ ទោះបីជាបានចាក់វ៉ាក់សាំងកូវីដ ១៩ ដូសទី ២ ឬដូសជំរុញហើយក៏ដោយ ក៏ត្រូវតែធ្វើការការពារខ្លួនជានិច្ច។ ជាពិសេស យើងធ្វើការជំរុញឱ្យបុគ្គលមានការទទួលខុសត្រូវច្បាស់លាស់ ហើយនិងការចូលរួមរបស់សហគមន៍ផងដែរ»។
សម្រាប់វីរុសកូវីដ ១៩ បំប្លែងថ្មីប្រភេទមូនេះ អង្គការសុខភាពពិភពលោក (WHO) ក៏កំពុងតែតាមដានយ៉ាងជិតដិតជាទីបំផុត។ បច្ចុប្បន្ន ក៏មិនទាន់បានដាក់វីរុសនេះចូលទៅក្នុងប្រភេទវីរុស ដែលខ្លាំងដូចប្រភេទវីរុសដែលតា និងអាល់ហ្វានៅឡើយទេ។ ប៉ុន្តែវាស្ថិតក្នុងក្រុមមួយ ដែលកំពុងត្រូវបានយកចិត្តទុកដាក់ ដោយអ្នកជំនាញកំពុងសិក្សាទៅលើរបៀបរបបរបស់វា។ នេះបើតាមការពន្យល់ពីលោកស្រី ឱ វណ្ណឌីន។
លោកស្រីថ្លែងថា៖ «បច្ចុប្បន្ននេះ ក៏មិនទាន់មានការបញ្ជាក់នៅឡើយដែរថា វាមានលក្ខណៈយ៉ាងណា។ ប៉ុន្តែគេក៏កំពុងតែសិក្សាផងដែរថា តើវីរុសមូនេះ វានឹងអាចមានសភាពខ្លាំង ដូចដែលតា និងអាល់ហ្វា ឬក៏ មូ នេះមានភាពខ្សោយជាង។ ដូចនេះ ចំណុចនេះយើងនឹងរង់ចាំការបញ្ជាក់ពីអ្នកវិទ្យាសាស្ត្របន្តទៀត»។
ទាក់ទងនឹងការបិទបញ្ចប់នូវយុទ្ធនាការនៃការចាក់វ៉ាក់សាំងកូវីដ ១៩ លោកស្រី ឱ វណ្ណឌីន បញ្ជាក់ដែរថា គិតមកដល់ថ្ងៃទី ១៣ ខែកញ្ញា រាជធានី និងខេត្តចំនួន ៧ ហើយ ដែលបានប្រកាសបិទបញ្ចប់។ ខេត្តដែលនឹងត្រូវប្រកាសបិទបញ្ចប់បន្តបន្ទាប់ទៀតនោះ មានខេត្តកោះកុង ខេត្តរតនគិរី ខេត្តស្ទឹងត្រែង ខេត្តព្រះវិហារ ខេត្តសៀមរាប និងខេត្តបន្ទាយមានជ័យ។
គិតត្រឹមថ្ងៃទី ១៣ ខែកញ្ញា ប្រជាពលរដ្ឋដែលមានអាយុពី ១៨ ឆ្នាំឡើង ដែលបានចាក់វ៉ាក់សាំងរួចហើយ មានចំនួន ៩៧,៥៨% ធៀបនឹងចំនួនប្រជាជនគោលដៅ ១០ លាននាក់ ខណៈដែលអ្នកទី ១០ លាននឹងត្រូវបានរកឃើញក្នុងដំណាច់ខែកញ្ញានេះផងដែរ។
ទន្ទឹមនឹងនេះ លោកនាយករដ្ឋមន្ត្រី ហ៊ុន សែន និងភរិយាបានទទួលវ៉ាក់សាំងដូសទី ៣ ឬដូសជំរុញ កាលពីថ្ងៃទី ១៤ កញ្ញា ផងដែរ។ លោកបានសរសេរលើបណ្តាញហ្វេសប៊ុករបស់លោកថា នៅទូទាំងប្រទេស ចាក់ដូសទី ៣ ឬដូសជំរុញបានប្រមាណជិត ៧៨ ម៉ឺននាក់រួចទៅហើយ។
លោក ហ៊ុន សែន បានបន្តថា៖ «យើងនឹងបន្តការចាក់ដូសទី ៣ ឱ្យបានគ្រប់ៗគ្នាសម្រាប់បងប្អូនដែលបានចាក់ដូសទី ១ និងដូសទី ២ រួចរាល់ ទៅតាមពេលវេលា ដែលត្រូវចាក់ ដោយគិតពីដូសទី ២ ទៅដូសទី ៣ ក្នុងរយៈពេលពី ៤ ទៅ ៦ ខែ»៕
វីដេអូ៖
