.jpg)
លោកនាយករដ្ឋមន្ត្រីក្នុងពេលប្រជុំអាស៊ាននាពេលកន្លងទៅ។ រូបថត SPM
ភ្នំពេញៈ លោកនាយករដ្ឋមន្ត្រី ហ៊ុន សែន បានបញ្ជាក់ថា ការដែលលោកចូលទៅក្នុងកិច្ចប្រជុំផ្ទៃក្នុងរបស់មន្ត្រីអតីតគណបក្សសង្គ្រោះជាតិតាមប្រព័ន្ធអនឡាញ (Zoom) គឺមិនមែនជាការផ្តល់សញ្ញាសម្រាប់ការចរចានយោបាយនោះទេ តែលោកចង់ផ្ញើសារ «ព្រមាន» ទៅកាន់មន្ត្រីអតីតបក្សប្រឆាំងថា នៅទីណាក៏មានមនុស្សរបស់លោកដែរ។
ឆ្លើយតបទៅនឹងអ្នកលេងហ្វេសប៊ុកដែលបាន Comment ចូលក្នុងហ្វេសប៊ុករបស់លោកលោក ហ៊ុន សែន សរសេរកាលពីថ្ងៃទី ១៥ ខែកញ្ញាថា៖ «តាមចាប់ពួកក្បត់ជាតិត្រូវចូលដល់កន្លែងពួកក្បត់ជាតិទើបចាប់បាន។ យល់ទេ?»។
លោកសរសេរបន្ថែមកាលពីថ្ងៃទី ១៦ ខែកញ្ញាថា៖ «សុំកុំយល់ខុសថា ខ្ញុំចូលក្នុង Zoom ជាមួយបងប្អូនថ្ងៃមុនថាជាការផ្តល់សញ្ញាសម្រាប់ការចរចាឱ្យសោះតែការចូលទៅនោះចង់ជូនសារព្រមានទៅក្រុមឧទ្ទាមឱ្យភ្លឺភ្នែកថានៅកន្លែងណាក៏មានមនុស្សរបស់ ហ៊ុន សែន ដែរ។ សូមប្រុងប្រយ័ត្នកុំធ្វើសកម្មភាពណាមួយប្រឆាំងជាមួយផលប្រយោជន៍ជាតិ»។
កាលពីប៉ុន្មានថ្ងៃមុននេះ មានការបង្ហោះវីដេអូតាមបណ្តាញសង្គមហ្វេសប៊ុកដោយ លោក ហ៊ុន សែន បានចូលទៅក្នុងកិច្ចប្រជុំរបស់មន្ត្រីអតីតគណបក្សសង្គ្រោះជាតិកាលពីថ្ងៃទី ៩ ខែកញ្ញា ដែលដឹកនាំដោយលោក ឡុង រី អតីតតំណាងរាស្ត្រមកពីអតីតគណបក្សសង្គ្រោះជាតិដោយក្នុងកិច្ចប្រជុំនោះលោក ហ៊ុន សែន បានសន្ទនាជាមួយលោក ឡុង រី។
ឆ្លើយតបទៅនឹង Comment អ្នកលេងហ្វេសប៊ុកដដែលនេះ លោក ហ៊ុន សែន សរសេរថា លោកបានធ្វើកិច្ចការច្រើនណាស់មកហើយក្នុងរឿងបង្រួបបង្រួមជាតិ ប៉ុន្តែ «ពួកក្បត់ជាតិ» វាមិនយល់អំពីការបង្រួបបង្រួមជាតិ។ពេលនេះ «គ្មាន» រឿងនយោបាយដែលត្រូវដោះស្រាយដោយការចរចានោះទេ។អ្វីដែលត្រូវធ្វើគឺអ្នកមានទោសត្រូវជាប់ «គុក» ២ ភាគ ៣ ជាមុនសិន បន្ទាប់មកចាំគិតដល់ការលើកលែងទោសឬបន្ធូរបន្ថយទោស ។
លោកបន្តថា សម្រាប់ដំណើការនយោបាយ កម្ពុជាបាន និងកំពុងឈានទៅកាន់ការបោះឆ្នោតជ្រើសរើសក្រុមប្រឹក្សាឃុំសង្កាត់នៅឆ្នាំ ២០២២ និងការបោះឆ្នោតជ្រើសរើសតំណាងរាស្ត្រឆ្នាំ ២០២៣ ដោយមានការចូលរួមពីគណបក្សនយោបាយទាំងគណបក្សចាស់ និងគណបក្សដែលទើបបង្កើតថ្មីយ៉ាងច្រើន។
លោក ហ៊ុន សែន បានសរសេរថា៖ «សូមឈប់ស្រមើស្រមៃថាបក្សដែលតុលាការរំលាយនឹងរស់ឡើងវិញ ហ៊ុន សែន នឹងលើកលែងទោសឱ្យ ហ៊ុន សែន នឹងបើកការចរចារកដំណោះស្រាយនយោបាយ ហ៊ុន សែន ខ្លាចអន្តរជាតិ។ល»។
លោកសរសេរថា៖ «សង្ឃឹមថា ការបកស្រាយនេះនឹងធ្វើឱ្យអ្នកវិភាគល្ងង់ទូនិងអ្នករង់ចាំការយោគយល់ពី ហ៊ុន សែន ឬ ហ៊ុន សែន ភ័យខ្លាច បានភ្លឺស្វាងឡើងវិញ បន្ទាប់ពីសន្លប់ធំអស់ប៉ុន្មានថ្ងៃក្រោយ Zoom»។
លោក សម រង្ស៊ី អតីតអនុប្រធានគណបក្សសង្គ្រោះជាតិថ្លែងទៅកាន់អ្នកគាំទ្រអតីតបក្សសង្គ្រោះជាតិនៅសហរដ្ឋអាមេរិក កាលពីថ្ងៃ ១២ ខែកញ្ញាថា៖ «គាត់និយាយនេះ (លោក ហ៊ុន សែន លើកឡើងក្នុងកិច្ចប្រជុំផ្ទៃក្នុងបក្សសង្គ្រោះជាតិ) ហាក់ដូចជា គាត់ចង់បង្ហាញថា គាត់អត់មានអ្វីដែលរារាំងមិនឱ្យយើងជជែកគ្នា រាប់អានគ្នា រកច្រកណាមួយចេញ»៕
វីដេអូ៖
