ភ្នំពេញៈ រាជធានីភ្នំពេញនឹងចាប់ផ្តើមយុទ្ធនាការចាក់វ៉ាក់សាំងបង្ការជំងឺកូវីដ ១៩ ដូសទី ៣ ឬ ដូសជំរុញជូនដល់បុគ្គលិក និងកម្មករ ដែលបម្រើការងារដឹកជញ្ជូនទំនិញ ម្ហូបអាហារ និងអ្នកប្រកបមុខរបរសេដ្ឋកិច្ចក្រៅប្រព័ន្ធចាប់ពីថ្ងៃទី ១៨ ខែកញ្ញា ដើម្បីទប់ទល់នឹងមេរោគបំប្លែងខ្លួនថ្មីប្រភេទដែលតា (Delta)។
យុទ្ធនាការនេះត្រូវបានដាក់ចេញភ្លាមៗ បន្ទាប់ពីលោកនាយករដ្ឋមន្ត្រី ហ៊ុន សែន កាលពីថ្ងៃទី ១៧ ខែកញ្ញា បានបញ្ជាឱ្យលោក ឃួង ស្រេង អភិបាលរាជធានីភ្នំពេញ ឱ្យយកចិត្តទុកដាក់ទៅលើអ្នកធ្វើការក្នុងវិស័យសេដ្ឋកិច្ចក្រៅប្រព័ន្ធ និងអ្នកដឹកអីវ៉ាន់អនឡាញ ដែលត្រូវមានអាទិភាពក្នុងការទទួលបានការចាក់វ៉ាក់សាំងដូសជំរុញនេះ។
រដ្ឋបាលរាជធានីភ្នំពេញបញ្ជាក់ក្នុងសេចក្តីជូនដំណឹងកាលពីថ្ងៃទី ១៧ ខែកញ្ញាថា៖ «(យុទ្ធនាការនេះ) សំដៅបង្កើតឱ្យបានភាពស៊ាំសហគមន៍រឹងមាំពិតប្រាកដមួយ ទប់ទល់នឹងជំងឺរាតត្បាតសកល កូវីដ ១៩ ជាពិសេសមេរោគបំប្លែងខ្លួនថ្មី ប្រភេទដែលតា (Delta)»។
យុទ្ធនាការក៏មានគោលដៅ ដើម្បីត្រៀមលក្ខណៈសម្រាប់ការរស់នៅជាមួយជំងឺកូវីដ ១៩ តាមបែបគន្លងប្រក្រតីភាពថ្មីក្នុងការឈានឆ្ពោះទៅរកការបើកដំណើរការឡើងវិញលើគ្រប់វិស័យ។
រដ្ឋបាលរាជធានីភ្នំពេញស្នើក្រុមហ៊ុន និងសហគ្រាសដឹកជញ្ជូនទំនិញ និងម្ហូបអាហារ និងភាគីពាក់ព័ន្ធ ត្រូវជំរុញលើកទឹកចិត្ត និងបង្កលក្ខណៈងាយស្រួលដល់បុគ្គលិក និងកម្មករ និងអ្នកប្រកបមុខរបរសេដ្ឋកិច្ចក្រៅប្រព័ន្ធឱ្យទៅទទួលវ៉ាក់សាំងបានទាន់ពេលវេលា។
រដ្ឋបាលរាជធានីភ្នំពេញស្នើដល់អ្នកដែលមានបញ្ហាសុខភាព ដូចជា ក្តៅខ្លួន ក្អក កណ្តាស់ ផ្តាសាយ ពិបាកដកដង្ហើម ឬរោគសញ្ញាផ្សេងទៀតឱ្យប្រើប្រាស់តេស្តរហ័សរកមេរោគកូវីដ ១៩ ដោយខ្លួនឯង ដើម្បីបញ្ជាក់ពីលទ្ធផលតេស្តអវិជ្ជមាន ឬយកសំណាកមេរោគកូវីដ ១៩ នៅតាមទីតាំងយកសំណាករបស់រដ្ឋ ជាមុនសិនមុនទៅទទួលវ៉ាក់សាំង ដើម្បីចៀសវាងប៉ះពាល់ដល់ក្រុមគ្រូពេទ្យ និងប្រជាពលរដ្ឋដទៃទៀត៕