.jpg)
ពលរដ្ឋផ្តិតមេដៃសុំបង្កើតសហគមន៍ការពារធម្មជាតិនៅខេត្តកំពង់ធំ។ រូប National Life
កំពង់ធំៈ ប្រជាសហគមន៍ចំនួន ៥១ គ្រួសារ រស់នៅអនុភូមិផ្សោតនៃតំបន់រ៉ាមសាស្ទឹងសែន ស្ថិតក្នុងភូមិទួលនាងសាវ ឃុំផាត់សណ្តាយ ស្រុកកំពង់ស្វាយ តាមរយៈការសម្របសម្រួល ដោយអង្គការជីវិតធម្មជាតិនៅកម្ពុជាកំពុងរៀបចំស្នើអាជ្ញាធរពាក់ព័ន្ធ និងក្រសួងបរិស្ថាន បង្កើតសហគមន៍តំបន់ការពារធម្មជាតិក្នុងតំបន់នេះ។
លោក ប៊ូ វរសក្ស តំណាងអង្គការជីវិតធម្មជាតិនៅកម្ពុជាប្រាប់ ភ្នំពេញ ប៉ុស្ដិ៍ នៅថ្ងៃទី ២១ កញ្ញាថា អង្គការជីវិតធម្មជាតិនៅកម្ពុជា សហការជាមួយអាជ្ញាធរភូមិ-ឃុំ កាលពីខែសីហា បានចុះធ្វើការផ្សព្វផ្សាយស្តីអំពីគោលការណ៍ណែនាំក្នុងការបង្កើតសហគមន៍តំបន់ការពារធម្មជាតិដល់ប្រជាពលរដ្ឋរស់នៅអនុភូមិផ្សោត តំបន់រ៉ាមសាស្ទឹងសែន តាមរយៈការរៀបចំប្រជុំជាក្រុមតូចៗ។
លោកបានថ្លែងថា បន្ទាប់ពីយល់សារៈសំខាន់របស់សហគមន៍តំបន់ការពារធម្មជាតិ ប្រជាសហគមន៍ចំនួន ៥១ គ្រួសារស្មើនឹង ៨៧% នៃគ្រួសារសរុបក្នុងអនុភូមិផ្សោត ឃុំផាត់សណ្តាយ បានដាក់ពាក្យស្នើបង្កើតសហគមន៍តំបន់ការពារធម្មជាតិនៅក្នុងតំបន់នេះដែលស្ថិតលើផ្ទៃដីប្រមាណ ១ ពាន់ហិកតា។
លោកបញ្ជាក់ថា៖ «ផែនការបន្ត យើងនឹងបញ្ជូនស្នាមមេដៃពាក្យស្នើសុំបង្កើតសហគមន៍ទៅកាន់ភាគីពាក់ព័ន្ធ ដូចជា ឃុំ-ស្រុក-ខេត្ត មន្ទីរបរិស្ថានខេត្ត និងក្រសួងបរិស្ថាន ដើម្បីពិនិត្យលទ្ធភាពក្នុងការបង្កើតសហគមន៍នៅតំបន់ផ្សោតនៃតំបន់រ៉ាមសាស្ទឹងសែន ឃុំផាត់សណ្តាយ ស្រុកកំពង់ស្វាយ ខេត្តកំពង់ធំនេះ»។
លោក វរសក្ស បានឱ្យដឹងថាតំបន់រ៉ាមសាស្ទឹងសែនជាតំបន់សម្បូរទៅដោយត្រីពងកូន ត្រីរាជ ត្រីគល់រាំង ដែលគ្របដណ្ដប់លើផ្ទៃដីព្រៃលិចទឹកនៃបឹងទន្លេសាប ស្ថិតនៅស្រុកកំពង់ស្វាយមានទំហំជាង ១ ម៉ឺនហិកតា និងមានភូមិចំនួន ៥។ ប៉ុន្ដែតំបន់នេះទើបតែមានសហគមន៍ការពារធម្មជាតិ ១ ប៉ុណ្ណោះ គឺសហគមន៍តំបន់ការពារធម្មជាតិនាងសាវ។
លោកបញ្ជាក់ថា៖ «ដោយមានការសំណូមពរពីអាជ្ញាធរមូលដ្ឋាន និងប្រជាពលរដ្ឋរស់នៅក្នុងសហគមន៍ ដើម្បីបង្កើតទៅជាតំបន់ការពារ តំបន់ការពារធម្មជាតិ និងឱ្យក្លាយទៅជាតំបន់ប្រើប្រាស់ប្រកបដោយចីរភាពនៅក្នុងតំបន់រ៉ាមសាស្ទឹងសែន ទើបយើងស្វែងរកថវិកា ដើម្បីគាំទ្រដល់ការបង្កើតតំបន់សហគមន៍ការពារធម្មជាតិថ្មី»។
លោកបន្តថា គោលនយោបាយនៃការបង្កើតសហគមន៍តំបន់ការពារធម្មជាតិថ្មីនេះ ក៏ដើម្បីលើកកម្ពស់ការប្រើប្រាស់ធនធានធម្មជាតិឱ្យមាននិរន្តរភាព តាមរយៈការចូលរួមពីប្រជាពលរដ្ឋក្នុងសហគន៍ក្នុងការទប់ស្កាត់បទល្មើសធនធានធម្មជាតិផ្សេងៗនៅក្នុងតំបន់នេះ។
លោក តុប កក្កដា ប្រធានមន្ទីរបរិស្ថានខេត្តកំពង់ធំថ្លែង នៅថ្ងៃទី ២១ ខែកញ្ញា ថា ការបង្កើតសហគមន៍តំបន់ការពារធម្មជាតិថ្មីនេះ គឺត្រូវសិក្សាលម្អិតបន្ថែមទៀតជាមួយប្រជាពលរដ្ឋ ដែលរស់នៅក្នុងសហគមន៍ និងសហគមន៍តំបន់ការពារធម្មជាតិទួលនាងសាវដែលមានស្រាប់ដើម្បីកុំឱ្យបង្កើតជាន់តំបន់គ្នា។
លោកថ្លែងថា៖ «ទាក់ទងនឹងការបង្កើតសហគមន៍តំបន់ការពារធម្មជាតិថ្មីនេះ ខ្ញុំមិនទាន់បានឃើញឯកសារស្នើសុំបង្កើតសហគមន៍នេះទេ។ យើងមានសហគមន៍ទួលនាងសាវមួយហើយ ដែលគ្របដណ្ដប់លើផ្ទៃដីប្រមាណ ៩ ពាន់ហិកតាក្នុងតំបន់រ៉ាមសាស្ទឹងសែននេះ។ ដូច្នេះបើចង់បង្កើតសហគមន៍ទៀត ទាល់តែមានការពិចារណាបន្តិច ដើម្បីកុំឱ្យមានបញ្ហាជាន់តំបន់គ្នាកើតឡើង»។
មន្ដ្រីឧទ្យានុរក្ស និងអង្គការជីវិតធម្មជាតិនៅកម្ពុជា និងអង្គការ Bird Life ក្នុងរដូវវស្សានេះបានកត់ត្រាប្រភេទសត្វស្លាបពិសេសសត្វស្លាប ដែលកំពុងឈានទៅរកការគំរាមកំហែងនៅលើពិភពលោក ដែលមានវត្ដមានជាង ៦០ ប្រភេទ នៅតំបន់រ៉ាមសាស្ទឹងសែន និងបឹងឆ្មានៃខេត្ដកំពង់ធំនេះផងដែរ។
នៅរៀងរាល់ដើមរដូវវស្សាមានសត្វស្លាបជាច្រើនប្រភេទ ដូចជា សត្វទុងប្រផេះ ជាដើម តែងតែផ្លាស់ទីមកតំបន់រ៉ាមសាស្ទឹងសែននេះ ដើម្បីរកចំណី។ បន្ទាប់មក ដល់ពេលទឹកស្រក វាក៏ផ្លាស់ទី ទៅរកចំណីនៅកន្លែងផ្សេង។ សត្វទុងប្រផេះបាននិងកំពុងបង្ហាញខ្លួននៅក្នុងតំបន់ដីសើមនេះប្រមាណជា ៤០ ក្បាល។ នេះបើយោងតាមកំណត់ត្រា ក្នុងខែសីហាកន្លងទៅរបស់អង្គការជីវិតធម្មជាតិនៅកម្ពុជា៕
