.jpg)
វ៉ាក់សាំងកូវីដ ១៩ ប្រភេទស៊ីណូវ៉ាក់របស់ចិនលើកមុន ត្រូវបានដឹកមកដល់កម្ពុជា កាលពីថ្ងៃទី ៤ កញ្ញា។ ហេង ជីវ័ន
ភ្នំពេញៈ វ៉ាក់សាំងប្រឆាំងជំងឺកូវីដ ១៩ ប្រភេទស៊ីណូវ៉ាក់ចំនួន ៣ លានដូស ក្នុងចំណោម ៩ លានដូស នឹងដឹកមកដល់ប្រទេសកម្ពុជា នាព្រឹកថ្ងៃទី ២៤ ខែកញ្ញា នេះ តាមការបញ្ជាទិញរបស់លោកនាយករដ្ឋមន្រ្តី ហ៊ុន សែន ពីសាធារណរដ្ឋប្រជាមានិតចិន ខណៈវ៉ាក់សាំង៣លានដូសទៀតនឹងដឹកមកដល់នៅដើមសប្តាហ៍ក្រោយនេះ។
លោកស្រី យក់ សម្បត្តិ រដ្ឋលេខាធិការក្រសួងសុខាភិបាល បានបញ្ជាក់យ៉ាងខ្លីនៅថ្ងៃទី ២២ កញ្ញាថា វ៉ាក់សាំងកូវីដ ១៩ ប្រភេទស៊ីណូវ៉ាក់ដែលជាការបញ្ជាទិញរបស់រាជរដ្ឋាភិបាលកម្ពុជាចំនួន៣ លានដូស នឹងដឹកមកដល់នៅព្រឹកថ្ងៃទី ២៤ នេះ ដើម្បីចាក់ជូនប្រជាពលរដ្ឋសម្រាប់ដូសជំរុញ និងកុមារ អាយុពី ៦ ឆ្នាំ ដល់ក្រោម ១២ ឆ្នាំ។
វ៉ាក់សាំងកូវីដ ១៩ ចំនួន ៣ លានដូសនេះ ជាវ៉ាក់សាំងក្នុងចំណោម ៩ លានដូសដែលនឹងដឹកមកដល់កម្ពុជាក្នុងខែកញ្ញានេះ។ រីឯ ៣ លានដូសទៀត នឹងមកដល់ក្នុងអំឡុងថ្ងៃទី ២៦ ឬ ២៧ ខែកញ្ញា និង ៣ លានដូសផ្សេងទៀត ដែលជាការសន្យាផ្តល់ជូនពីរដ្ឋមន្រ្តីការបរទេសចិន លោក វ៉ាង យី នឹងដឹកមកដល់ក្នុងខែនេះដូចគ្នាផងដែរ។
ក្នុងយុទ្ធនាការថ្នាក់ជាតិចាក់វ៉ាក់សាំងការពារជំងឺកូវីដ ១៩ ដល់កុមារអាយុចាប់ពី ៦ ឆ្នាំ ដល់អាយុក្រោម ១២ ឆ្នាំ និងយុទ្ធនាការចាក់វ៉ាក់សាំងដូសជំរុញសម្រាប់ក្រុមមនុស្សអាយុ ១៨ ឆ្នាំឡើង កាលពីថ្ងៃទី ១៧ កញ្ញា លោកនាយករដ្ឋមន្រ្តី ហ៊ុន សែន ថ្លែងថា វ៉ាក់សាំង ៦ លានដូសដែលនឹងមកដល់បន្ថែមនេះ ជាការបញ្ជាទិញរបស់រាជរដ្ឋាភិបាល។ ឯវ៉ាក់សាំងចំនួន ៣ លានដូស ដែលលោក វ៉ាង យី សន្យាផ្តល់ឱ្យមកកម្ពុជា ក៏នឹងដឹកមកដល់ផងដែរ។
គួរបញ្ជាក់ផងដែរថា ក្រសួងសុខាភិបាលបានប្រកាសបើកយុទ្ធនាការចាក់វ៉ាក់សាំងកូវីដ ១៩ ប្រភេទស៊ីណូវ៉ាក់ដូសជំរុញ ជូនប្រជាពលរដ្ឋ ដែលមានអាយុពី១៨ឆ្នាំឡើង ដែលបានចាក់វ៉ាក់សាំងកូវីដ ១៩ ដូសទី២ ឬគ្រប់ដូសរួច ហើយមានគម្លាតចាប់ពី ៤ ខែឡើង។ អ្នកទាំងនោះនឹងត្រូវចាប់ផ្តើមចាក់ពីថ្ងៃទី ១១ ខែតុលា ដោយចាប់ចេញពីរាជធានីភ្នំពេញមុនគេ និងបន្តទៅតាមបណ្តាខេត្តជាបន្តបន្ទាប់នៅទូទាំងប្រទេសរហូតដល់ចុងឆ្នាំ ២០២១ នេះ។
យោងតាមរបាយការណ៍របស់ក្រសួងសុខាភិបាល គិតត្រឹមថ្ងៃទី ២២ ខែ កញ្ញា ឆ្នាំ ២០២១ ប្រជាពលរដ្ឋអាយុពី ១៨ ឆ្នាំឡើងចំនួន ៩៨,៥៣% ធៀបនឹងចំនួនប្រជាជនគោលដៅ ១០ លាននាក់បានចាក់វ៉ាក់សាំងកូវីដ១៩។ ក្រុមមនុស្សអាយុពី ១២ ឆ្នាំ ទៅក្រោម ១៨ ឆ្នាំ ចំនួន ៨៨,៥៥% ធៀបនឹងចំនួនប្រជាជនគោលដៅជិត ២ លាននាក់ បានចាក់វ៉ាក់សាំងរួចរាល់។
ចំណែកក្រុមកុមារអាយុពី ៦ឆ្នាំ ដល់ក្រោម ១២ ឆ្នាំ ចំនួន ៥៦,៤៩% ធៀបនឹងប្រជាជនគោលដៅ ជាង ១,៨ លាននាក់ក៏ទទួលបានវ៉ាក់សាំងរួចហើយផងដែរ។ រីឯអ្នកដែលបានចាក់វ៉ាក់សាំងកូវីដ ១៩ ដូសជំរុញ មកដល់ពេលនេះចាក់បានចំនួនជិត ៨៥ ម៉ឺននាក់។
ដោយឡែក យោងតាមការឱ្យដឹងរបស់មន្ទីរពេទ្យគន្ធបុប្ផាទី៣ កាលពីថ្ងៃទី ២១ កញ្ញា ក្រុមគ្រូពេទ្យយុទ្ធជនអាវស ផ្នែកសម្ភព នៅមន្ទីរពេទ្យជ័យវរ្ម័នទី៧ (គន្ធបុប្ផាទី៣) បានជួយស្ត្រីគ្រប់ខែ ដែលវិជ្ជមានកូវីដ ១៩ ចំនួន ៦ នាក់ បានសម្រាលកូនប្រកបដោយជោគជ័យផងដែរ។
មន្ទីរពេទ្យនេះបានឱ្យដឹងដែរថា រាល់ការព្យាបាលទាំងអស់ គឺឥតគិតថ្លៃ សម្រាប់គ្រប់ៗគ្នា ដោយគ្មានការរើសអើងដើម្បីជួយព្យាបាល សង្គ្រោះ និងការពារជីវិតរបស់ប្រជាពលរដ្ឋគ្រប់រូប៕
