ភ្នំពេញៈ តុលាការកំពូលនៅថ្ងៃទី២៣កញ្ញាបានជម្រះកំបាំងមុខបុរសជាប់ចោទជនជាតិកូរ៉េខាងត្បូង ២ នាក់ ខណៈត្រូវសាលាឧទ្ធរណ៍ខេត្តបាត់ដំបង ផ្តន្ទាទោសដាក់ពន្ធនាគារក្នុងម្នាក់ៗ ២ ឆ្នាំ ពាក់ព័ន្ធនាំលុយពីហុងកុងមកកម្ពុជាជាង ២ លានដុល្លារអាមេរិក។
លោក ជីវ កេង ប្រធានក្រុមប្រឹក្សាជំនុំជម្រះបានអានអង្គហេតុក្នុងអង្គសវនាការថា ជនជាប់ចោទឈ្មោះ SONG HYUNHOO អាយុ ៤៤ ឆ្នាំ និងម្នាក់ទៀតឈ្មោះ YOON WONGI អាយុ ៣៤ ឆ្នាំ។ ពួកគេជាជនជាតិកូរ៉េខាងត្បូង ត្រូវបានសមត្ថកិច្ចឃាត់ខ្លួនកាលពីថ្ងៃទី ៧ កក្កដា ឆ្នាំ ២០១៩ ក្នុងព្រលានយន្តហោះខេត្តសៀមរាប។
លោកបន្តថា ជនជាប់ទាំង ២ នាក់ ត្រូវបានសាលាដំបូងខេត្តសៀមរាបបើកសវនាការជំនុំជម្រះ និងប្រកាសសាលក្រមនៅថ្ងៃទី ១ ខែ តុលា ឆ្នាំ ២០១៩។
លោកថ្លែងថា៖ «ជនជាប់ចោទត្រូវផ្តន្ទាទោសក្នុងម្នាក់ៗដាក់ពន្ធនាគារ ២ ឆ្នាំ និងពិន័យប្រាក់ម្នាក់ៗ ៦០ លានរៀល»។
លោក អ៊ុក គឹមសិទ្ធិ តំណាងមហាអយ្យការបានសន្និដ្ឋានថា យោងអង្គហេតុ គឺជនជាប់ចោទទាំង ២ នាក់ បាននាំប្រាក់ដុល្លារមកប្រទេសកម្ពុជាគ្មានប្រភពច្បាស់លាស់។ ហេតុអ្វីបានជាពួកគេមិនផ្ញើតាមធនាគារ។
លោថ្លែងថា៖ «ខ្ញុំយល់ឃើញថាសាលដីការបស់សាលាឧទ្ធរណ៍ខេត្តបាត់ដំបងត្រឹមត្រូវហើយ។ ខ្ញុំសូមតម្កល់សាលដីកានៅដដែល»។
គួរបញ្ជាក់ថា សវនាការជំនុំជម្រះនៅតុលាការកំពូលនៅថ្ងៃទី ២៣ កញ្ញា ពុំមានវត្តមានជនជាប់ចោទ និងលោក ហ៊ុន ពិសិដ្ឋ ជាមេធាវីការពារសិទ្ធិឱ្យជនទាំង ២ នាក់ទេ។ ប៉ុន្តែបើយោងតាមសារណារបស់លោកមេធាវី ហ៊ុន ពិសិដ្ឋ ដែលបានដាក់ចូលតុលាការកំពូលបានរៀបរាប់ថា ជនជាប់ចោទទាំង ២ នាក់ ជាបុគ្គលិករបស់ក្រុមហ៊ុនCNC.coltd នៅប្រទេសកូរ៉េ ក្រុមហ៊ុននេះបានវិនិយោគទិញដីនៅខេត្តកំពង់ធំចំនួន ២១០ ហិកតា។ ដីនេះមានតម្លៃ ២ លាន ២ សែនដុល្លារអាមេរិក។ ប៉ុន្តែដោយសារកូនក្តីរបស់លោកធ្វើការនៅហុងកុងក៏ខាងក្រុមហ៊ុនបានដកលុយនេះពីធនាគារនៅប្រទេសកូរ៉េចូលធនាគារហុងកុង ដើម្បីឱ្យកូនក្តីរបស់លោកដកយកមកប្រទេសកម្ពុជាផ្ទាល់តែម្តង។
លោកមេធាវី ហ៊ុន ពិសិដ្ឋ បញ្ជាក់នៅក្នុងសារណាបន្តថា ជនជាប់ចោទគិតថាបើវេរលុយពីធនាគារហុងកុងមកកម្ពុជាមានការបង់ពន្ធ។ ដូច្នេះពួកគេដាក់លុយជាប់ខ្លួនមកតែម្តងហើយខាងគយនៅប្រទេសកូរ៉េ ក៏អះអាងដែរថា ប្រាក់ដុល្លារនេះមិនជាប់បទល្មើសអីទេ។ លោកថា៖ «ខ្ញុំស្នើសុំដល់តុលាកាកំពូលឱ្យកូនក្តីខ្ញុំបានរួចពីបទចោទ»។
យោងតាមកំណត់ហេតុរបស់តុលាការកំពូលបានបង្ហាញថាកាលពីថ្ងៃទី ៧ កក្កដា ឆ្នាំ ២០១៩ មានជើងយន្តហោះ១គ្រឿងលេខ UO-706 (HKG-REP) ហោះមកពីទីក្រុងហុងកុង ប្រទេសចិន បានចុះចតនៅព្រលានយន្តហោះអន្តរជាតិខេត្តសៀមរាប។ នៅពេលនោះដោយមានការសង្ស័យសមត្ថកិច្ចគយ និងនគរបាលប្រចាំនៅក្នុងព្រលានយន្តហោះបានហៅបុរសជនជាតិកូរ៉េខាងត្បូងចំនួន ២ នាក់ ដើម្បីធ្វើការត្រួតពិនិត្យអីវ៉ាន់។
អង្គហេតុបង្ហាញបន្តថា ពេលនោះសមត្ថកិច្ចបានឆែកក្នុងសាកាដូស្ពាយរបស់ជនទាំង ២ នាក់ក៏ឃើញប្រាក់ដុល្លារជាច្រើនដុំ ហើយក៏ឃាត់ខ្លួនពួកគេតែម្តង។ ក្រោយការត្រួតពិនិត្យមកសមត្ថកិច្ចរាប់ប្រាក់ដុល្លារនោះឃើញមានចំនួន ២ លាន ២ សែនដុល្លារអាមេរិក (ក្រដាស ៥០ និង ១០០ ដុល្លារ)។
តាមអង្គហេតុដដែលថា ជនទាំង ២ នាក់ ត្រូវបានសាលាដំបូងខេត្តសៀមរាបបើកសវនាការជំនុំជម្រះ និងប្រកាសសាលក្រមនៅថ្ងៃទី ១ ខែ តុលា ឆ្នាំ ២០១៩ សម្រេចផ្តន្ទាទោសក្នុងម្នាក់ៗ ២ ឆ្នាំ និងពិន័យប្រាក់ម្នាក់ៗ ៦០ លានរៀលចូលថវិការដ្ឋ។ ជនទាំង ២ នាក់ ត្រូវចោទតាមមាត្រា ៣ មាត្រា ២៩ និងមាត្រា ៣០ នៃច្បាប់ស្តីពីការប្រឆាំងការសម្អាតប្រាក់ និងហិរញ្ញប្បទាន។ ដោយមិនសុខចិត្តនឹងទណ្ឌកម្មនេះជនជាប់ចោទទាំង ២ នាក់ បានប្តឹងទាស់ទៅសាលាឧទ្ធរណ៍តំបន់ខេត្តបាត់ដំបង ហើយត្រូវប្រកាសសាលដីកានៅថ្ងៃទី ២៤ ខែ មីនា ឆ្នាំ ២០២១ តម្កល់សាលក្រមរបស់សាលាដំបូងខេត្តសៀមរាបទុកជាបានការដដែល។ តុលាការកំពូលគ្រោងនឹងប្រកាសសាលដីកានៅថ្ងៃទី ២៩ កញ្ញានេះ៕