ភ្នំពេញៈ ក្រុងប៉ោយប៉ែតនៃខេត្តបន្ទាយមានជ័យ នៅសប្ដាហ៍ខាងមុខនេះ ជំនន់ទឹកភ្លៀងនៅទីក្រុងនេះ អាចនឹងរងផលអាក្រក់ជាងពេលបច្ចុប្បន្ន ដោយសារលំហូរទឹកធ្លាក់ចុះពីស្រុកអារញ្ញ ខេត្តស្រះកែវ ប្រទេសថៃ។ រីឯស្រុកចំនួន៣ទៀតនៃខេត្តនេះ ក៏ទទួលរងគ្រោះ ដោយជំនន់ទឹកភ្លៀងដែរ។ នេះបើតាមមន្ត្រីអាជ្ញាធរ។
លោក គាត ហ៊ុល អភិបាលក្រុងប៉ោយប៉ែត ប្រាប់ ភ្នំពេញ ប៉ុស្តិ៍ នាថ្ងៃទី ២៣ កញ្ញាថា អាជ្ញាធរស្រុកអារញ្ញ នៃខេត្តស្រះកែវប្រទេសថៃ បានផ្ដល់លិខិតជូនដំណឹងមួយច្បាប់ មករដ្ឋបាលក្រុងប៉ោយប៉ែត កាលពីថ្ងៃទី ២២ ខែកញ្ញា ដោយបានបញ្ជាក់ថា ស្ថានភាពទឹក នៅស្រុកអារញ្ញប្រាថេត បានកំពុងហក់ឡើងលឿនគួរឱ្យព្រួយបារម្ភ ដែលបណ្តាលមកពី ឥទ្ធិពលកម្ពស់ទឹកហក់ឡើងខ្ពស់នៅតំបន់ខៅយ៉ៃ នៃខេត្តនគររាជសីមា។
លោក គាត ហ៊ុល បន្តថា៖ «ក្នុងលិខិតនោះ ភាគីថៃបានគូសបញ្ជាក់ទៀតថាស្ថិតក្នុងស្ថានភាពទឹកជំនន់បែបនេះ វានឹងបង្កឱ្យហូរស្រុងចុះពីតំបន់ខ្ពស់ក្នុងទឹកដីថៃ ចុះមកតំបន់ទាបជាងនៅក្នុងផ្នែកខ្លះនៃភូមិសាស្ត្រ ក្រុងប៉ោយប៉ែត ខេត្តបន្ទាយមានជ័យនៃប្រទេសកម្ពុជា ដែលនឹងធ្វើឱ្យមានគ្រោះជំនន់ទឹកភ្លៀង ក្នុងកម្រិតធ្ងន់ធ្ងរផងដែរ»។
បើតាមលោក គាត ហ៊ុល នេះគឺជាការផ្ដល់ដំណឹងលើកទី១ របស់ភាគីថៃ ក្នុងរដូវវស្សាឆ្នាំនេះ អំពីស្ថានភាពនិងលទ្ធភាពនៃទឹកជំនន់ក្នុងប្រទេសរបស់ខ្លួន។ ពិសេសនៅផ្នែកខ្លះនៃស្រុកអារញ្ញ ខេត្តស្រះកែវ ដែលឥទ្ធិពលរបស់វា អាចនឹងបង្កឱ្យជន់លិចនិងប៉ះពាល់ដល់ផ្នែកខ្លះនៃក្រុងប៉ោយប៉ែត ខេត្តបន្ទាយមានជ័យនៃប្រទេសកម្ពុជា។ «ទោះយ៉ាងណា យើងអរគុណភាគីថៃ ដែលបានផ្ដល់ដំណឹងនេះ»។
គិតត្រឹមរសៀលថ្ងៃទី ២៣ ខែ កញ្ញា ឆ្នាំ ២០២១ នេះ ជំនន់ទឹកភ្លៀងនៅក្រុងប៉ោយប៉ែត នៅមិនទាន់ថមថយនៅឡើយទេ ព្រោះភ្លៀងនៅតែបន្តធ្លាក់។
លោក ហ៊ុល បន្តថា តាមរយៈសេចក្ដីជូនដំណឹងរបស់ភាគីថៃ រដ្ឋបាលក្រុងប៉ោយបែត បានផ្សព្វផ្សាយជូនដំណឹងដល់អាជ្ញាធរមូលដ្ឋាន និងប្រជាពលរដ្ឋ ដែលរស់នៅក្នុងតំបន់ងាយប្រឈមការលិចលង់ដោយគ្រោះទឹកជំនន់ ពិសេសអ្នកដែលរស់នៅប្របជាប់មាត់អូរព្រំដែនកម្ពុជា-ថៃ ត្រូវបង្កើនការប្រុងប្រយ័ត្នខ្ពស់បន្ថែមទៀតចំពោះគ្រោះទឹកជំនន់នេះ។
លោកបញ្ជាក់ថា៖ «ក្នុងខណៈនេះ ខ្ញុំកំពុងបន្តដឹកនាំក្រុមការងារចុះសួរសុខទុក្ខ និងផ្ដល់ជំនួយសង្គ្រោះបឋមដល់ពលរដ្ឋជាង ១០០ គ្រួសារ ដែលបានជម្លៀសមកកាន់ទីទួលសុវត្ថិភាព និងណែនាំឱ្យពួកគាត់ ត្រូវអនុវត្តវិធានអនាម័យ និងវិធានបង្ការការឆ្លងរីករាលដាលនៃជំងឺកូវិដ១៩ និងអនុវត្ត ៣ កុំ ៣ ការពារ ឱ្យបានជាប្រចាំ»។
ចំណែកនៅស្រុកម៉ាឡៃវិញ ភ្លៀងបានជន់លិចហូរកាត់ផ្លូវ និងចូលដល់ដីលំនៅឋានប្រជាពលរដ្ឋក្នុងឃុំតាគុង ព្រមទាំងឃុំមួយចំនួនទៀត ដែលនៅទីទំនាប ខណៈនៅតំបន់អភិវឌ្ឍន៍បឹងជង្រុក នៃឃុំទួលពង្រ ទឹកនៅមិនទាន់ថមថយនៅឡើយ។ នេះបើតាមលោក ប៉ាន់ខែម ប៊ុនថន នាយករងខុទ្ទកាល័យលោកនាយករដ្ឋមន្ត្រី ហ៊ុន សែន កាលពីល្ងាចថ្ងៃទី ២៣ ខែកញ្ញា ខណៈលោកចុះដឹកនាំក្រុមការងារជួយអន្តរាគមន៍សង្គ្រោះពលរដ្ឋរងគ្រោះ នៅតំបន់អភិវឌ្ឍន៍បឹងជង្រុក។
លោកថ្លែងថា៖ «កាលពីព្រឹក [២៣-៩-២០២១] ជំនន់ទឹកភ្លៀងនៅតំបន់បឹងជង្រុកយើងបានស្រកជិតកន្លះម៉ែត្រ។ ប៉ុន្តែនៅល្ងាចថ្ងៃដដែលនេះ មានភ្លៀងធ្លាក់ខ្លះនៅតំបន់ផ្នែកខាងលើ ធ្វើឱ្យទឹកជន់ឡើងសាជាថ្មី។ ប៉ុន្តែមិនទាន់មានហានិភ័យធ្ងន់ធ្ងរនៅឡើយទេ ព្រោះកម្លាំងសមត្ថកិច្ចយើងបានអន្តរាគមន៍ពលរដ្ឋ ដែលផ្ទះរបស់ពួកគាត់រងការជន់លិចនៅពុំបាននោះមកកាន់ទីទួលសុវត្ថិភាពអស់ហើយ»។
លោក ប៊ុនថន ថ្លែងថា វិធានការនៅចំពោះមុខនេះ គឺក្រុមការងារថ្នាក់ជាតិ ថ្នាក់ខេត្ត និងថ្នាក់មូលដ្ឋានក្រុង-ស្រុក នៃខេត្តបន្ទាយមានជ័យ ដែលកំពុងប្រឈមគ្រោះជំនន់ទឹកភ្លៀងបានរួមសហការគ្នា យ៉ាងសកម្មក្នុងការចុះជួយអន្តរាគមន៍ដល់ពលរដ្ឋក្នុងតំបន់រងគ្រោះ។ ក្រុមការងារបានរៀបចំទីទួលសុវត្ថិភាពចំនួន ៦ កន្លែង និងបានត្រៀមស្បៀងបម្រុង រួចជាស្រេចដើម្បីផ្ដល់ជូនដល់ពលរដ្ឋរងគ្រោះ គឺ«យើងមិនឱ្យពលរដ្ឋណាម្នាក់រងានោះទេ»។
ជាមួយគ្នានេះ នៅឯក្រុងសេរីសោភ័ណ អាជ្ញាធរបានរាយការណ៍ថា ជំនន់ទឹកស្ទឹងសេរីសោភ័ណ បានហក់ឡើងនិងជន់លិចផ្ទះពលរដ្ឋ ដែលនៅប្របជាប់មាត់ស្ទឹងចំនួន ៤០ គ្រួសារ។ លោក ហ៊ឹល រ៉ាយ៉ា អភិបាលក្រុងសេរីសោភ័ណ ប្រាប់ ភ្នំពេញ ប៉ុស្តិ៍ថា៖ «នៅពេលនេះ សមត្ថកិច្ចយើងបានជួយអន្តរាគមន៍បងប្អូនប្រជាពលរដ្ឋទាំងនោះមកកាន់ទីទួលសុវត្ថិភាពអស់ហើយ»។
ចំណែកលោក រ័ត្ន ដាស៊ីណង់ អភិបាលស្រុកមង្គលបូរីបាននិយាយថា កម្ពស់ទឹកស្ទឹងមង្គលបូរី បានហក់ឡើងដល់ចំណុចប្រកាសអាសន្ន គឺ ៩ ម៉ែត្រហើយ ខណៈពលរដ្ឋចំនួន ១៦ គ្រួសារ បានជម្លៀសទៅកាន់ទីទួលសុវត្ថិភាព។
បើទោះជាមកទល់ពេលនេះ នៅមិនទាន់មានពលរដ្ឋណាម្នាក់ជួបគ្រោះថ្នាក់ដល់ជីវិត ដោយសារគ្រោះជំនន់ទឹកភ្លៀងនេះក៏ដោយ លោកដាស៊ីណង់ បានអំពាវនាវឱ្យពលរដ្ឋក្នុងតំបន់រងគ្រោះដោយជំនន់ទឹកភ្លៀង ពិសេសអ្នកដែលរស់នៅតាមមាត់ស្ទឹង ព្រែក ឱ្យបង្កើតការប្រុងប្រយ័ត្នពីសុវត្ថិភាពនៃសមាជិកក្រុមគ្រួសាររបស់ខ្លួន ពិសេសកុមារតូចៗ ចាស់ជរា និងស្ត្រីមានផ្ទៃពោះ ឱ្យនៅឆ្ងាយពីមាត់ទឹក៕