.jpg)
កណ្តាលៈ ទីភ្នាក់ងារសហប្រតិបត្តិការអន្តរជាតិកូរ៉េ (KOICA) និងសមាគមអតីតកម្មសិក្សាការីកម្ពុជា-កូរ៉េ ឧបត្ថម្ភគ្រឿងឧបភោគបរិភោគ និងសម្ភារបង្ការជំងឺកូវីដ ១៩ ដល់គ្រួសារដែលងាយរងគ្រោះដោយជំងឺកូវីដ ១៩ ក្នុងឃុំលំហាច ស្រុកអង្គស្នួល ចំនួនប្រមាណ ១០០ គ្រួសារ ដែលផ្តល់ផលប្រយោជន៍ដល់ប្រជាជនប្រមាណ ៨០០ នាក់នៅថ្ងៃទី ២៤ ខែកញ្ញា នេះ។
អំណោយទាំងនោះរួមមាន មីកញ្ចប់ ១ កេះ ត្រីខកំប៉ុង ១ យួរ អង្ករ ២៥ គីឡូក្រាម ស្ករត្នោត ម៉ាស់ និងទឹកលាងដៃសម្រាប់ជួយដល់ជនងាយរងគ្រោះក្នុងគ្រាអាសន្ននេះ និងដើម្បីជួយប្រយុទ្ធប្រឆាំងនឹងការផ្ទុះឡើងជំងឺកូវីដ ១៩។
KOICA បញ្ជាក់ក្នុងហ្វេសប៊ុកនៅថ្ងៃទី ២៤ ខែកញ្ញាថា ការចែកអំណោយនេះត្រូវបានរៀបចំឡើងនៅក្នុងតំបន់គោលដៅតាមរយៈកិច្ចសហការរវាងអាជ្ញាធរមូលដ្ឋាន និងសមាគមអតីតកម្មសិក្សាការីកម្ពុជា-កូរ៉េ និងស្របតាមបេសកកម្ម របស់សមាគមអតីតកម្មសិក្សាការីកម្ពុជា-កូរ៉េដើម្បីគាំទ្រសុខុមាលភាពសហគមន៍ជនបទ។
ហ្វេសប៊ុក KOICA បញ្ជាក់ថា៖ «គ្រឿងឧបភោគបរិភោគនឹងជួយកាត់បន្ថយការលំបាករបស់គ្រួសារដែលមានប្រាក់ចំណូលទាប និងងាយរងគ្រោះ នៅក្នុងប្រទេសកម្ពុជាដែលកំពុងមានស្ថានការណ៍ធ្ងន់ធ្ងរ ដោយសារវិបត្តិជំងឺកូវីដ១៩»៕
