ភ្នំពេញៈ ជប៉ុនចុះហត្ថលេខាផ្តល់ឥណទានសម្បទាន និងហិរញ្ញប្បទានឥតសំណង ៧២ លានដុល្លារ ដល់កម្ពុជា ដើម្បីអនុវត្តគម្រោងចំនួន ៦ ក្នុងការរួមចំណែកដល់ការលើកកម្ពស់ការអភិវឌ្ឍសេដ្ឋកិច្ច-សង្គមនៃព្រះរាជាណាចក្រកម្ពុជា។
ការចុះហត្ថលេខានេះធ្វើឡើងរវាងលោក មិកាមិ ម៉ាសាហ៊ីរ៉ូ (MIKAMI Masahiro) ឯកអគ្គរាជទូតជប៉ុនប្រចាំកម្ពុជា និងលោក ប្រាក់ សុខុន រដ្ឋមន្ត្រីការបរទេសនាថ្ងៃទី ១១ តុលា នៅទីស្ដីការក្រសួងការបរទេស។ គម្រោងទាំង ៦ រួមមាន គម្រោងផ្គត់ផ្គង់ទឹកស្អាត គម្រោងបោសសម្អាតមីន គម្រោងបំពាក់សម្ភារបច្ចេកទេសសម្រាប់មន្ទីរពិសោធន៍ជាតិសំណង់ គម្រោងស្ថានីយវាស់វែងអចិន្រៃ្តយ៍ មជ្ឈមណ្ឌលទិន្នន័យ គម្រោងសម្រាប់គ្រឹះស្ថានអប់រំបណ្តុះបណ្តាលបច្ចេកទេស និងគម្រោងឧស្សាហកម្មគ្រឿងយន្ត អេឡិចត្រូនិក និងមេកានិក។
ក្រសួងការបរទេសបញ្ជាក់ក្នុងសេចក្តីប្រកាសព័ត៌មានកាលពីថ្ងៃទី ១១ ខែតុលាថា៖ «[ជំនួយនេះ] ដើម្បីរួមចំណែកដល់ការលើកកម្ពស់ការអភិវឌ្ឍសេដ្ឋកិច្ចសង្គមនៃព្រះរាជាណាចក្រកម្ពុជា»។
សេចក្តីប្រកាសព័ត៌មានបញ្ជាក់ ថា ឥណទានសម្បទាន មាន ១ គម្រោងគឺគម្រោងពង្រីកសមត្ថភាពផ្គត់ផ្គង់ទឹកស្អាតខេត្តសៀមរាបដំណាក់កាលទី ២ ដែលមានទឹកប្រាក់ប្រមាណ ៥៨ លានដុល្លារ។ រីឯហិរញ្ញប្បទានឥតសំណង មាន ៥ គម្រោង គឺគម្រោង គាំទ្រដំណើរការកសាងផែនការបោសសម្អាតមីន និងត្រួតពិនិត្យគុណភាពលើផ្ទៃដីបោសសម្អាតមីនដែលមានទឹកប្រាក់ប្រមាណ ១,៨ លានដុល្លារ។ គម្រោងសម្ភារបច្ចេកទេស សម្រាប់មន្ទីរពិសោធន៍ជាតិសំណង់ ដែលមានទឹកប្រាក់ប្រមាណ ២,២ លានដុល្លារ។
គម្រោងបំពាក់សម្ភារបច្ចេកទេស សម្រាប់ស្ថានីយវាស់វែងអចិន្រៃ្តយ៍ និងមជ្ឈមណ្ឌលទិន្នន័យដែលមានទឹកប្រាក់ប្រមាណ ២,២ លានដុល្លារ។ គម្រោងបំពាក់សម្ភារបច្ចេកទេសសម្រាប់គ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈ ដែលមានទឹកប្រាក់ប្រមាណ ៣,៦ លានដុល្លារ។ ចុងក្រោយ ហិរញ្ញប្បទានឥតសំណងនេះក៏នឹងត្រូវប្រើប្រាស់ ដើម្បីអនុវត្តគម្រោងបំពាក់សម្ភារបរិក្ខារ និងគ្រឿងម៉ាស៊ីនក្នុងវិស័យឧស្សាហកម្មគ្រឿងយន្ត អេឡិចត្រូនិក និងមេកានិកនៅសាកលវិទ្យាល័យភូមិន្ទភ្នំពេញ មានទឹកប្រាក់ប្រមាណ ៤,៥ លានដុល្លារផងដែរ។
យោងតាមសេចក្តីប្រកាសព័ត៌មាននេះ លោក ប្រាក់ សុខុន ថ្លែងក្នុងពិធីចុះហត្ថលេខាថា នេះគឺជាសក្ខីភាពនៃការបន្តជួយគាំទ្ររបស់ជប៉ុនដល់កម្ពុជា បើទោះបីជាមានការរីករាលដាលនៃជំងឺកូវីដ ១៩ ក្តី ហើយដែលជាការជួយគាំទ្រយ៉ាងរឹងមាំដល់ការអភិវឌ្ឍនៅកម្ពុជា។
លោកថ្លែងថា៖ «ប្រទេសជប៉ុនបាននិងកំពុងជួយគាំទ្រដល់កម្ពុជា ក្នុងការប្រយុទ្ធប្រឆាំងនឹងជំងឺកូវីដ ១៩ តាមរយៈការផ្តល់ឥណទានសម្បទាន ហិរញ្ញប្បទានឥតសំណង និងវ៉ាក់សាំង ហើយដែលជំនួយសប្បុរសធម៌ទាំងនេះ ឆ្លុះបញ្ចាំងនូវទំនាក់ទំនង និងកិច្ចសហប្រតិបត្តិការដ៏ជិតស្និទ្ធរវាងប្រទេសកម្ពុជា និងជប៉ុន ព្រមទាំងបានរួមចំណែកដល់យុទ្ធនាការចាក់វ៉ាក់សាំងនៅទូទាំងប្រទេសរបស់កម្ពុជា»។
លោក ប្រាក់ សុខុន បន្តថា ជំនួយរបស់ជប៉ុនបាននិងកំពុងរួមចំណែកយ៉ាងសំខាន់ដល់ការអភិវឌ្ឍសង្គម និងធនធានមនុស្សនៅកម្ពុជា។ ប្រទេសជប៉ុន គឺជាស្ថាបត្យករដ៏សកម្មក្នុងដំណើរការស្វែងរកសន្តិភាពនៅប្រទេសកម្ពុជា និងបានរួមចំណែកយ៉ាងសំខាន់បំផុតដល់ដំណើរការកសាងប្រទេសកម្ពុជាឡើងវិញ ក្រោយសង្គ្រាមហែកហួរប្រទេស និងការបំផ្លិចបំផ្លាញអស់ជាច្រើនទសវត្សរ៍។
ស្ថានទូតជប៉ុនប្រចាំកម្ពុជាបញ្ជាក់ក្នុងសេចក្តីប្រកាសព័ត៌មាន នាថ្ងៃទី ១១ តុលា ថា រដ្ឋាភិបាលជប៉ុនបានសម្រេចពង្រីកជំនួយអភិវឌ្ឍន៍ផ្លូវការ (ODA) ជាឥណទានសម្បទាន និងហិរញ្ញប្បទានឥតសំណងដើម្បីឆ្លើយតបទៅនឹងសំណើរបស់រាជរដ្ឋាភិបាលកម្ពុជា និងដើម្បីពង្រឹងទំនាក់ទំនង មិត្តភាព និងកិច្ចសហប្រតិបត្តិការរវាងប្រទេសទាំង ២។
ស្ថានទូតជប៉ុនបានឱ្យដឹងថា គម្រោង ពង្រីកសមត្ថភាពផ្គត់ផ្គង់ទឹកស្អាត ខេត្តសៀមរាបនៅដំណាក់កាលទី ២ នេះនឹងបន្តអភិវឌ្ឍបរិក្ខារបូមទឹកឆៅ និងរោងចក្រប្រព្រឹត្តិកម្មទឹកស្អាត ដែលមានសមត្ថភាពផលិត ៦០ ០០០ ម៉ែត្រគុបក្នុង ១ ថ្ងៃ និងបណ្ដាញចែកចាយទឹកដែលមានប្រវែងលើស ២០០ គីឡូម៉ែត្រ នៅខេត្តសៀមរាប បន្ទាប់ពីដំណាក់កាលទី ១។
ស្ថានទូតជប៉ុនបញ្ជាក់ថា៖ «គម្រាងសហប្រតិបត្តិការទាំងនេះត្រូវបានរំពឹងទុកថា នឹងចូលរួមចំណែកដល់ការអភិវឌ្ឍវិស័យនីមួយៗនាពេលអនាគត និងការយោគយល់គ្នាទៅវិញទៅមក ក៏ដូចជាការពង្រឹងទំនាក់ទំនងមិត្តភាព រវាងជប៉ុន និងកម្ពុជា»៕