.jpg)
មន្ត្រីនៃអាជ្ញាធរជាតិអប្សរាក្នុងពេលចុះពិនិត្យលំនៅឋានពលរដ្ឋក្នុងតំបន់អង្គរនៅខែតុលានេះ ៕ រូបថត អាជ្ញាធរជាតិអប្សរា
សៀមរាបៈ ក្នុងរយៈពេល ៩ ខែ ឆ្នាំនេះ អាជ្ញាធរជាតិអប្សរាបានអនុញ្ញាតឱ្យប្រជាពលរដ្ឋដែលជាអ្នកស្រុកនៅក្នុងតំបន់អង្គរជាង១ពាន់គ្រួសារជួសជុលកែលម្អលំនៅឋាន និងសាងសង់សំណង់តូចៗក្នុងតំបន់រមណីយដ្ឋានអង្គរ ដើម្បីឱ្យការរស់នៅរបស់ពួកគាត់មានភាពល្អប្រសើរ។
របាយការណ៍អាជ្ញាធរជាតិអប្សរាបានឱ្យដឹងកាលពីថ្ងៃទី ១២ ខែតុលាថា «រយៈពេល ៩ ខែ ក្នុងឆ្នាំ ២០២១ ក្រុមការងារលេខាធិការដ្ឋានសហគមន៍ទាំង ៥ និងក្រុមការងារក្រៅឧទ្យាននៃអាជ្ញាធរជាតិអប្សរាបានបន្តការងារចុះពិនិត្យផ្ទះចំនួន ១ ៨៧៤ គ្រួសារ ក្នុងនោះក្រុមការងារបានអនុញ្ញាតឱ្យមានការជួសជុលកែលម្អលំនៅឋាន និងសាងសង់សំណង់ស្រាលតូចតាចបានចំនួន ១ ១៦២ គ្រួសារ»។
ក្នុងចំណោមប្រជាពលរដ្ឋចំនួន ១ ១៦២ គ្រួសារនេះ រួមមាន ស្រុកប្រាសាទបាគងចំនួន ១៧៤ គ្រួសារ ស្រុកអង្គរធំចំនួន ២៦៣ គ្រួសារ ស្រុកពួកចំនួន ១៨០ គ្រួសារ ក្រុងសៀមរាបចំនួន ២៦៩ គ្រួសារ ស្រុកបន្ទាយស្រីចំនួន ២៤៤ គ្រួសារ និងក្រុមការងារក្រៅឧទ្យានចំនួន ៣២ គ្រួសារ។
ប្រភេទនៃការជួសជុលកែលម្អលំនៅឋាន និងសាងសង់សំណង់ស្រាលតូចតាចរួមមានការជួសជុល ឬប្តូរដំបូល ជួសជុលជញ្ជាំង ប្តូរសសរ ប្តូរជណ្តើរ តសំយាប រៀបឥដ្ឋក្រោមផ្ទះ សាងសង់បង្គន់អនាម័យ ទ្រុងមាន់ ចាក់ដី ក្រោលគោ ទ្រុងជ្រូក ។ល។ ដែលជាតម្រូវការចាំបាច់ផ្សេងៗទៀតក្នុងការរស់នៅប្រចាំថ្ងៃ។
អាជ្ញាធរជាតិអប្សរាបញ្ជាក់ថា ការអនុញ្ញាតនេះធ្វើឡើង បន្ទាប់ពីក្រុមការងារសហគមន៍នៃអាជ្ញាធរជាតិអប្សរាបានចុះពិនិត្យទៅដល់ខ្នងផ្ទះជាក់ស្តែង និងមានឯកសារចាំបាច់ពាក់ព័ន្ធមួយចំនួនទៀត ដើម្បីជាមូលដ្ឋានបច្ចេកទេសក្នុងការវាយតម្លៃថា ពួកគាត់គឺជាប្រជាពលដ្ឋរស់នៅក្នុងតំបន់អង្គរពិតប្រាកដតាំងពីយូរយារ មានការបញ្ជាក់យ៉ាងច្បាស់លាស់ពីអាជ្ញាធរភូមិ និងឃុំសង្កាត់ និងមានតម្រូវការជាក់ស្តែងក្នុងការកែលម្អការរស់នៅឱ្យបានល្អប្រសើរ។
របាយការណ៍លើកឡើងថា «អាជ្ញាធរជាតិអប្សរាមិនត្រឹមតែផ្តល់ការជួសជុលដល់ផ្ទះចាស់ និងសាងសង់សំណង់ស្រាលតូចតាច ក្នុងនោះក៏បានធ្វើការដោះស្រាយបញ្ហាប្រឈមនានា ការជួយសង្គ្រោះពេលប្រជាជនមានទុក្ខលំបាក រួមទាំងផ្សព្វផ្សាយការយល់ដឹងអំពីបេតិកភណ្ឌដល់ប្រជាជនគ្រប់ៗគ្នា»។
របាយការណ៍បន្ថែមថា សកម្មភាពទាំងនេះ គឺជាចូលរួមចំណែករបស់អាជ្ញាធរជាតិអប្សរាក្នុងការបង្ខិតសេវាសាធារណៈរបស់រដ្ឋឲ្យចូលទៅជិត ប្រជាពលរដ្ឋ និងកាត់បន្ថយរាល់ការចំណាយទាំងពេលវេលា និងការធ្វើដំណើរទៅមក។
អាជ្ញាធរជាតិអប្សរា បានបង្កើតក្រុមការងារសហគមន៍របស់ខ្លួនឡើងក្នុងគោលបំណង ដើម្បីសម្រួលដល់ការរស់នៅរបស់ប្រជាពលរដ្ឋក្នុងតំបន់អង្គរ ដែលគ្របដណ្តប់លើផ្ទៃដី ៤០១ គីឡូម៉ែត្រការ៉េ ស្ថិតនៅក្នុងក្រុងស្រុកចំនួន ៥ ឃុំចំនួន ២១ និងភូមិចំនួន ១១។
លោក ឡុង កុសល អ្នកនាំពាក្យអាជ្ញាធរជាតិអប្សរាប្រាប់ ភ្នំពេញ ប៉ុស្តិ៍ កាលពីថ្ងៃទី ១២ តុលាថា ចំនួនគ្រួសារផ្សេងទៀត ដែលមិនត្រូវបានអនុញ្ញាតឱ្យជួសជុលកែលម្អលំនៅឋានដោយសារពួកគាត់មិនមានឯកសារគ្រប់គ្រាន់ដើម្បីបញ្ជាក់ថា ពួកគាត់ជាអ្នកដែលរស់នៅតំបន់អង្គរនេះនិងមូលហេតុមួយទៀតអាចមកពីសំណូមពររបស់ពួកគាត់ហួសពីសមត្ថកិច្ចរបស់ក្រុមការងារសហគមន៍។
លោកថ្លែងថា៖ «ក្នុងករណីដែលវាហួសពីសមត្ថកិច្ចរបស់ក្រុមការងារ អាហ្នឹងក្រុមការងារបញ្ជូនទៅខាងផ្នែកមួយទៀត (នាយកដ្ឋានរៀបចំដែនដី និងគ្រប់គ្រងលំនៅឋានក្នុងឧទ្យានអង្គរ) ដែលមានសមត្ថកិច្ចធំជាងហ្នឹង »។
បើតាមលោក ឡុង កុសល ក្នុងករណីប្រជាពលរដ្ឋចង់រុះរើលំនៅឋានទាំងស្រុង ហើយសាងសង់ថ្មី ឬជួសជុលច្រើនកន្លែងក្រុមការងារសហគមន៍មិនមានសមត្ថកិច្ចទេ តែត្រូវបញ្ជូនសំណូមពររបស់ប្រជាពលរដ្ឋទៅកាន់នាយកដ្ឋានរៀបចំដែនដី និងគ្រប់គ្រងលំនៅឋានក្នុងឧទ្យានអង្គររបស់អាជ្ញាធរជាតិអប្សរាដែលមានភារកិច្ចពិនិត្យទៅលើសំណូមពរនេះក្នុងការរុះរើលំនៅឋានចាស់ ហើយសាងសង់ថ្មី៕
