ភ្នំពេញៈ អភិបាលរាជធានីភ្នំពេញលោក ឃួង ស្រេង បានជំរុញឱ្យអាជ្ញាធរទាំងអស់ក្នុងរាជធានីភ្នំពេញយកចិត្តទុកដាក់ និងពង្រឹងវិធានការឱ្យបានម៉ឺងម៉ាត់នៅតាមគ្រឹះស្ថានសិក្សា ផ្សារ និងទីតាំងអាជីវកម្មនានាក្នុងការទប់ស្កាត់ការរីករាលដាលជំងឺកូវីដ ១៩ ដើម្បីឈានទៅបើកដំណើរការឡើងវិញលើគ្រប់វិស័យនាពេលឆាប់ៗខាងមុខនេះ។
លោកបានលើកឡើងដូចនេះនៅក្នុងកិច្ចប្រជុំនារសៀលថ្ងៃទី ១១ តុលា ជាមួយនឹងអាជ្ញាធរខណ្ឌទាំង ១៤ មន្ទីរពាក់ព័ន្ធ និងកម្លាំងមានសមត្ថកិច្ចចំណុះមួយចំនួនទៀត។
រដ្ឋបាលរាជធានីភ្នំពេញបានដាក់ចេញនូវគោលការណ៍ថ្មីៗមួយចំនួនដូចជារាល់ពេលចេញ-ចូលគ្រឹះស្ថានសិក្សា ផ្សារ និងទីតាំងអាជីវកម្មនានាត្រូវបង្ហាញបណ្ណចាក់វ៉ាក់សាំងកូវីដ ១៩ ឬលិខិតបញ្ជាក់ការចាក់វ៉ាក់សាំង។
លោក ឃួង ស្រេង បានថ្លែងថា៖ «យើងធ្វើដូចនេះគឺដើម្បីទប់ស្កាត់កូវីដ ១៩ ឱ្យបានល្អប្រសើរចៀសវាងការរីករាលដាលបន្តទៀត ហើយកិច្ចការងារនេះរដ្ឋបាលរាជធានី-ភ្នំពេញក៏បានចេញនូវសេចក្តីជូនដំណឹងរួចហើយដែរ កាលពីសប្តាហ៍មុននេះ»។ ដូច្នេះអាជ្ញាធរខណ្ឌទាំង ១៤ ត្រូវអនុវត្តការងារនេះឱ្យមានប្រសិទ្ធភាពខ្ពស់។
លោកថា៖ «បើយើងអនុវត្តការងារនេះបានល្អប្រសើរ និងមានភាពម៉ឺងម៉ាត់នោះវានឹងកាត់បន្ថយបាននូវការរីករាលដាលជំងឺកូវីដ ១៩ បន្តទៀត»។
ក្នុងឱកាសនោះដែរ លោក ឃួងស្រេង ក៏បានកោតសរសើរ ចំពោះអាជ្ញាធរខណ្ឌទាំង ១៤ ក្រុមការងារពាក់ព័ន្ធក្រុមគ្រូពេទ្យគ្រប់ក្រុមទាំងអស់ដែលកន្លងមកត្រូវបានប្រជាពលរដ្ឋដាក់រហស្សនាមថា ជាកងទ័ពអាវស ដែលបានយកចិត្តទុកដាក់ក្នុងការថែទាំ និងព្យាបាលប្រជាពលរដ្ឋបានល្អ ក៏ដូចជាកម្លាំងមានសមត្ថកិច្ចទាំងអស់ ដែលបានលះបង់អស់កម្លាំងកាយចិត្ត បំពេញការងារ ទាំងយប់ ទាំងថ្ងៃ ដើម្បីទប់ស្កាត់នូវការឆ្លងរាលដាលជំងឺកូវីដ ១៩ នេះ។
ទាក់ទងនឹងការតម្រូវឱ្យមានការបង្ហាញកាតចាក់វ៉ា់ក់សាំងនៅតាមបណ្តាគ្រឹះស្ថានសិក្សា ផ្សារ និងទីតាំងអាជីវកម្មផ្សេងៗទៀត លោកស្រី ប៉ុន ដានី ប្រធានផ្សារធំថ្មីបានអនុវត្តតាមការជូនដំណឹងនេះ ដោយបានតម្រូវឱ្យអតិថិជន និងអាជីវករទាំងអស់បង្ហាញកាតចាក់វ៉ាក់សាំងមុននឹងចូលក្នុងផ្សារនេះ។
លោកស្រីបានថ្លែងថា អាជីវករដែលលក់ដូរក្នុងផ្សារធំថ្មីនេះស្ទើរតែ ១០០ ភាគរយបានចាក់វ៉ាក់សាំងកូវីដ ១៩ រួចរាល់ហើយ ហើយមានតិចតួចបំផុតដែលមិនបានចាក់ដោយសារតែបញ្ហាសុខភាពរបស់ពួកគាត់។
លោកស្រី ប៉ុន ដានី បានបញ្ជាក់ថា៖ «សូមប្រជាពលរដ្ឋទាំងអស់ត្រូវចូលរួមគោរព និងអនុវត្តតាមការណែនាំនានារបស់អាជ្ញាធរក៏ដូចជាក្រសួងសុខាភិបាល និងប្រមុខរាជរដ្ឋាភិបាល ដើម្បីបង្ការការឆ្លងរាលដាលនៃវីរុសកូវីដ ១៩ និងត្រូវយកកាតចាក់វ៉ាក់សាំងតាមជាប់ខ្លួនជានិច្ច ដោយសារស្ទើរគ្រប់កន្លែងគឺតម្រូវឱ្យពិនិត្យកាត ឬបណ្ណបញ្ជាក់ថាបានចាក់វ៉ាក់សាំងរួច ទើបអនុញ្ញាតឱ្យចូលបាន»។
គួរបញ្ជាក់ផងដែរថា រដ្ឋបាលរាជធានីភ្នំពេញកាលពីសប្តាហ៍មុនបានណែនាំបន្ថែមដល់ប្រជាពលរដ្ឋ គណៈគ្រប់គ្រងគ្រឹះស្ថានសិក្សា គណៈកម្មការផ្សារ ម្ចាស់អាជីវកម្មដ្ឋាន ម្ចាស់ទីតាំង អាជីវករវិស័យឯកជន និងសាធារណជនទាំងអស់ត្រូវមានកាតព្វកិច្ចបង្ហាញបណ្ណចាក់វ៉ាក់សាំងបង្ការជំងឺកូវីដ ១៩ ឬលិខិតបញ្ជាក់ការចាក់វ៉ាក់សាំង រាល់ពេលចេញ-ចូលគ្រឹះស្ថានសិក្សា ផ្សារ និងទីតាំងអាជីវកម្មនានា ដើម្បីត្រៀមលក្ខណៈសម្រាប់ការរស់នៅជាមួយជំងឺកូវីដ ១៩ តាមគន្លងថ្មី និងឈានទៅរកការបើកដំណើរការឡើងវិញលើគ្រប់វិស័យ នាពេលឆាប់ៗខាងមុខ៕